مەملەكەتتىك حاتشى گۇلشارا ابدىقالىقوۆانىڭ توراعالىعىمەن پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ وتىرىسى ءوتتى.
وتىرىستى اشقان گ.ابدىقالىقوۆا ەلباسى ن.نازارباەۆتىڭ «كۇن ساناپ وزگەرىپ جاتقان ءدۇبىرلى دۇنيەدە سانا-سەزىمىمىز بەن دۇنيەتانىمىمىزعا ابدەن ءسىڭىپ قالعان تاپتاۋرىن قاعيدالاردان ارىلماساق, كوش باسىنداعى ەلدەرمەن تەرەزەمىزدى تەڭەپ, يىق ءتۇيىستىرۋ مۇمكىن ەمەس. وزگەرۋ ءۇشىن ءوزىمىزدى مىقتاپ قولعا الىپ, زامان اعىمىنا يكەمدەلۋ ارقىلى جاڭا ءداۋىردىڭ جاعىمدى جاقتارىن بويعا ءسىڭىرۋىمىز كەرەك», دەگەن سوزىنە باسا نازار اۋداردى.
مەملەكەتتىك حاتشى «رۋحاني جاڭعىرۋ», «پرەزيدەنتتىڭ بەس الەۋمەتتىك باستاماسى» باعدارلامالارى قوعامدىق سانانى جاڭعىرتۋعا جانە ءومىر ءسۇرۋ ساپاسىن ارتتىرۋعا باعىتتالعانىن اتاپ ءوتتى. بۇل تۇرعىدا وسكەلەڭ ۇرپاقتىڭ رۋحاني-ادامگەرشىلىك قاسيەتتەرىن دامىتۋ جانە ولاردىڭ قۇقىقتارى مەن زاڭدى مۇددەلەرىن قامتاماسىز ەتۋ ماسەلەلەرى ەرەكشە مانگە يە بولىپ وتىر.
قازاقستاندا بالالاردىڭ قۇقىقتارى مەن مۇددەلەرىن قامتاماسىز ەتۋ ءۇشىن ينستيتۋتسيونالدىق نەگىز قۇرىلعان. بۇل رەتتە 15 حالىقارالىق قۇجات راتيفيكاتسيالاندى, بالالار قۇقىقتارى جونىندە ۋاكىل ينستيتۋتى, بالالاردىڭ قۇقىقتارىن قورعاۋ كوميتەتى, قيىن احۋالداعى بالالارعا قولداۋ كورسەتۋ ورتالىقتارى جۇمىس ىستەيدى.
ء «وزىن-ءوزى تانۋ» ادامگەرشىلىك-رۋحاني ءبىلىم بەرۋ باعدارلاماسى 71 ءبىلىم بەرۋ ۇيىمىندا قاناتقاقتى جوبا رەتىندە ىسكە قوسىلعان. سونىمەن قاتار كامەلەتكە تولماعاندار اراسىنداعى زورلىق-زومبىلىقتىڭ الدىن الۋعا باعىتتالعان «بالالاردى بىرگە قورعايمىز» اتتى جول كارتاسى باس پروكۋراتۋرامەن بىرلەسە جۇزەگە اسىرىلىپ كەلەدى. بۇگىندە مەكتەپتەردە 8 362 پسيحولوگ, 4 268 الەۋمەتتىك پەداگوگ, 2 177 پوليتسيا ينسپەكتورى قىزمەت ەتەدى.
دەنساۋلىق ساقتاۋ مينيسترلىگىنىڭ مالىمەتىنە سۇيەنسەك, ەلىمىزدە انا ءولىمىنىڭ دەڭگەيى 2017 جىلى 1,5 پروتسەنتكە, بالالار ءولىمى 7 پروتسەنتكە تومەندەدى. وڭىرلەردە 60 ۇكىمەتتىك ەمەس ۇيىمداردىڭ قاتىسۋىمەن وتباسىن جوسپارلاۋ, انا مەن بالا دەنساۋلىعىن قورعاۋ بويىنشا 112 الەۋمەتتىك جوبا ىسكە اسىرىلدى. بەس جاسقا دەيىنگى بالالارعا پاتروناجدىق پروفيلاكتيكالىق باقىلاۋ جۇرگىزىلىپ, 600-دەن استام بالالار دەنساۋلىعى بولمەلەرى ۇيىمداستىرىلدى. جاستار دەنساۋلىقتى ساقتاۋ ماسەلەلەرى بويىنشا كونسۋلتاتسيالىق, زاڭ جانە مەديتسينالىق-پسيحولوگيالىق كومەك كورسەتىلەدى.
وتىرىس سوڭىندا گ.ابدىقالىقوۆا مەملەكەتتىك ورگاندارعا بىرقاتار ناقتى تاپسىرمالار بەردى.
اباي اسانكەلدى ۇلى, «ەگەمەن قازاقستان»