ەلباسى نۇرسۇلتان نازارباەۆ سامميت باستالماس بۇرىن تۇرىكمەنستان پرەزيدەنتى گۋربانگۋلى بەردىمۇحامەدوۆپەن كەزدەستى. كەزدەسۋ كەزىندە پرەزيدەنتتەر حالىقارالىق ارالدى قۇتقارۋ قورى ءسامميتىنىڭ ماڭىزدىلىعىن اتاپ ءوتتى.
قازاقستان پرەزيدەنتى جوعارى دەڭگەيدەگى تۇراقتى كەزدەسۋلەر ەكى تاراپتىڭ دا ستراتەگيالىق سەرىكتەستىكتى ودان ءارى نىعايتۋعا مۇددەلى ەكەندىگىنىڭ ايقىن كورىنىسى سانالاتىنىن ايتتى.
– مەملەكەتتەرىمىز ارقىلى وتەتىن ءامۋداريا مەن سىرداريا وزەندەرى باسسەيندەرىنىڭ ماسەلەلەرىن تالقىلايمىز. بۇل ەكى وزەن ءبىزدىڭ بالالارىمىز بەن نەمەرەلەرىمىزگە ءومىر سىيلايدى. وسى پروبلەمالاردى بىرلەسە تالقىلاۋدىڭ ماڭىزى زور, – دەدى نۇرسۇلتان نازارباەۆ.
قازاقستان باسشىسى ءسامميتتىڭ تۇرىكمەنستاندا دەر كەزىندە وتكىزىلىپ وتىرعانىنا توقتالىپ, حالىقارالىق ارالدى قۇتقارۋ قورىنىڭ بۇعان دەيىنگى ءسامميتى 2009 جىلى وتكەنىن اتاپ ءوتتى.
– مەن باۋىرلاس تۇرىكمەنستاننىڭ دامۋ بارىسىن ءجىتى قاداعالاپ وتىرامىن. تۇرىكمەن حالقىنا بارلىق جاقسىلىقتى تىلەيمىن, – دەپ تۇيىندەدى قازاقستان پرەزيدەنتى.
ال گۋربانگۋلى بەردىمۇحامەدوۆ نۇرسۇلتان نازارباەۆقا ءىلتيپات ءبىلدىرىپ, حالىقارالىق ارالدى قۇتقارۋ قورىنىڭ قۇرىلتايشى مەملەكەتتەرى باسشىلارىنىڭ وتىرىسىنا شاقىرۋدى قابىل العانى ءۇشىن العىس ايتتى. جانە قازاقستان پرەزيدەنتىن بەسىنشى كاسپي ءسامميتىنىڭ تابىستى وتۋىمەن جانە تاريحي قۇجات – كاسپي تەڭىزىنە قاتىستى كونۆەن- تسياعا قول قويىلۋىمەن قۇتتىقتادى.
ەكى ەل كوشباسشىلارى جول كارتاسىن ىسكە اسىرۋ, كولىك-ترانزيت سالاسىنداعى ىنتىماقتاستىقتى دامىتۋ, سونداي-اق وڭىرلىك قاۋىپسىزدىك ماسەلەلەرىن قاراستىردى.
سوڭىندا گۋربانگۋلى بەردىمۇحامەدوۆ نۇرسۇلتان نازارباەۆتى جانە بارشا قازاقستان حالقىن قۇربان ايت مەرەكەسىمەن قۇتتىقتادى.
سەرىك ابدىبەك,
«ەگەمەن قازاقستان» –
تۇرىكمەنباشىدان