زاماناۋي تەحنولوگيالار قالالىق جەرلەردىڭ پروبلەمالارىن ءتيىمدى شەشۋگە جول اشادى. شاھارلارىمىزدى دامىتۋعا ينۆەستورلار تارتۋ ءۇشىن باسەكەگە لايىق بولۋ شارت.
ينۆەستورلار نەعۇرلىم جايلى, ۋاقىت تالابىنا ساي قالالاردى تاڭدايدى. قازىر الەمدە «سمارت سيتي», ياعني «اقىلدى قالا» تۇسىنىگى كەڭ تاراعان. ەلىمىزدىڭ استانا باستاعان بىرنەشە ءىرى قالاسى وسى ۇدەدەن شىعۋعا تالپىنۋدا. ەلباسى ن.نازارباەۆ قازاقستان حالقىنا بيىلعى جولداۋىندا اتاپ كورسەتكەندەي, «اقىلدى قالالار» وڭىرلىك دامۋدىڭ, يننوۆاتسيانى تاراتۋدىڭ جانە ەلىمىزدىڭ بارلىق اۋماعىندا تۇرمىس ساپاسىن ارتتىرۋدىڭ لوكوموتيۆتەرىنە اينالادى».
«سمارت سيتي» تۇجىرىمداماسى قاراعاندىدا دا كورىنىس تابا باستادى. كەنشىلەر قالاسىنداعى «ابسوليۋت» ساۋدا ءۇيىنىڭ الدىنا قويىلعان التى سمارت ورىندىق وسى كۇنى جۇرتشىلىقتىڭ تالاي قاجەتىن اشىپ وتىر. كۇن كوزىنەن قۋات الاتىن ورىندىقتاردان قالتا تەلەفونىڭىزدى قۋاتتاندىرىپ الۋعا بولادى. سمارت ورىندىقتاردىڭ ارقايسىسىندا ەكى USB-پورتتان بار. سونىمەن قاتار, جالپىعا ورتاق ورىندىقتاردىڭ Wi-Fi جۇيەسى دە ءاردايىم قوسۋلى ءارى تەگىن. «اقىلدى قالا» تەحنولوگيالارىنىڭ باستى ارتىقشىلىعى – ولاردىڭ ادامدار مەن قورشاعان ورتاعا ەش زيانى جوق. ورناتىلعانىنا كوپ ۋاقىت وتە قويماسا دا, «اقىلدى ورىندىقتار» كوپشىلىكتىڭ ىقىلاسىنا بولەنىپ ۇلگەرگەن. باستاپقىدا بۇرىن تۇرعان ورىندىقتار ەستەتيكالىق كورىنىس ءۇشىن عانا اۋىستىرىلعان دەپ ويلاعاندار دا قازىر وسى تۇسقا ءجيى تاقالىپ, تەگىن ينتەرنەت جەلىسىن پايدالاناتىن بولعان.
جالعىز-اق ايتارى: قالا تۇرعىندارى مەن قوناقتارى جەرگىلىكتى بيلىك تارتۋ ەتكەن وسى يگىلىكتى ورىندى ۇقىپتى پايدالانسا جاقسى. ايتپەسە, وسى كەشە عانا قاراعاندىنىڭ ورتالىعىنداعى جاڭا ساياباقتا جاقىندا ورناتىلعان ورىندىق-ساكىنى ون شاقتى ءجاسوسپىرىم قاسكويلىكپەن قيراتىپ, ورنىنان ج ۇلىپ الىپتى. ولاردىڭ بۇزاقىلىق ءىسىن پوليتسيا قاراپ, اتا-انالارىنا قاتاڭ ەسكەرتۋ جاسادى. مۇنداي جاعداي قايتالاناتىن بولسا, قوماقتى ايىپپۇل سالىناتىنى ايتىلدى. ول – جاي ورىندىق. دەگەنمەن, سونداي سوتقارلار ەرتەڭ ميلليونداعان قاراجاتقا ورناتىلعان «اقىلدى ورىندىقتارعا» اۋىز سالماسىنا كىم كەپىل!؟ سول ۋايىم, ايتپەسە, وركەنيەت جەتىستىكتەرى دەگەن جاقسى عوي.
سمارت ورىندىقتار سانى, بيلىك وكىلدەرىنىڭ ايتۋىنشا, مۇنىمەن شەكتەلىپ قالمايدى. الداعى ۋاقىتتا باسقا دا كوپشىلىك ورىندار بىرتىندەپ وسىنداي زاماناۋي ورىندىقتارمەن قامتاماسىز ەتىلەدى. سونىمەن قاتار, «سمارت سيتي» تەحنولوگياسى باسقا سالالاردا دا قولدانىسقا ەنگىزىلمەك. ماسەلەن, قوعامدىق كولىكتەردە جول اقىسىن ەلەكتروندى جۇيە ارقىلى تولەۋ, قوعامدىق ءتارتىپتى باقىلاۋدى كۇشەيتۋ, دەنساۋلىق ساقتاۋ سالاسىن وڭتايلاندىرۋ ءۇشىن جاڭا تەحنولوگيالار كومەككە كەلەدى.قالاعا زامان تالابىنا ساي تۇجىرىمداما جوبالارىن ەنگىزەر الدىندا قاراعاندى وبلىسى اكىمىنىڭ ورىنباسارى الماس ايداروۆ: «بۇل جوبالاردى جۇزەگە اسىرۋعا ءبىز بيزنەس-قۇرىلىمداردى تارتامىز. «سمارت سيتي» جوبالارىن ىسكە اسىرۋعا قاجەتتى ۇزاق مەرزىمدىك ينۆەستيتسيالار جالعىز بيۋدجەتكە اۋىر بولادى. سوندىقتان, مەملەكەت پەن مەنشىك ارىپتەستىگى باعدارلاماسى بويىنشا جۇمىس ىستەيمىز. بۇگىنگى نارىقتا ون جىلعا دەيىنگى مەرزىمگە ينۆەستيتسيا سالا الاتىن ءىرى كومپانيالار بار. سولاردىڭ كومەگىمەن «سمارت سيتي» تۇجىرىمداماسىن ءوڭىر بيۋدجەتىنە زالال كەلتىرمەستەن ەنگىزۋگە بولادى», – دەگەن بولاتىن.
«تسيفرلىق قازاقستان» مەملەكەتتىك باعدارلاماسى اياسىندا سمارت تەحنولوگيالار ەلىمىزدىڭ بىرنەشە قالاسىندا ىسكە قوسىلعان. حالىق يگىلىگىنە قىزمەت ەتەتىن وركەنيەتتى باستاما ءورىسىن جايا بەرمەك.
قايرات ءابىلدا,
«ەگەمەن قازاقستان»
قاراعاندى