بۇگىن وبلىستىق كارديولوگيالىق ورتالىقتىڭ بازاسىندا العاش رەت الماتى وبلىسىندا شەبەرلىك كلاسى ءوتتى. رەنتگەنوحيرۋرگيا دارىگەرلەرى جۇرەكشەلەر اراسىنداعى قالقان جەتىسپەۋشىلىگىن ەندوۆاسكۋليارلى جابۋ وپەراتسياسىن جاسادى. بۇل تۋرالى Mediko ءباسپاسوز قىزمەتى حابارلايدى.
وبلىستىڭ كارديولوگيالىق ورتالىقتىڭ قابىرعاسىندا بۇگىن وتكىزىلگەن شەبەرلىك سىنىبىنىڭ ماقساتى – ەمدەلۋشىلەر ءۇشىن زاماناۋي تەحنولوگيالاردى قامتاماسىز ەتۋ. دارىگەرلەر ۇيرەنگەن شەبەرلىكتەرىنىڭ ارقاسىندا ەندى كۇن سايىن وبلىستىق كارديولوگيالىق ورتالىقتىڭ ەمدەلۋشىلەرىنە وسىنداي وپەراتسيالار جاساي الاتىن بولادى.
جۇرەككە جاسالاتىن بۇل وپەراتسيا كەۋدە قۋىسىن ەش كەسپەي جۇرگىزىلەتىنىن ايتا كەتۋ كەرەك. جۇرەكشە اراسىنداعى قالقان جەتىسپەۋشىلىگىن ەندوۆاسكۋليارلى جابۋ ءادىسى قازىرگى اشىق وپەراتسيا جاساعان كەزدەگى جۇرەك جەتىسپەۋشىلىگىن تىگۋ ءادىسىنىڭ بالاماسى بولىپ تابىلادى جانە جۇرەك جۇمىسىن جىلدام قالپىنا كەلتىرۋگە سەپتىگىن تيگىزەدى. ەمدەلۋشىلەر تەز ساۋىعادى.
دەنى ساۋ ەرەسەك ادامدا وڭ جانە سول جاق جۇرەكشەنىڭ اراسىندا تەسىك بولمايدى. بىراق ول ۋاقىتىلى ءوسىپ كەتپەي, سالدارىنان جۇرەك جەتىسپەۋشىلىگى تۋىندايتىن جاعدايلار بولادى – سولدان وڭعا قاراي تۇيىقتالىپ, بۇل وڭ جاق جۇرەكشەگە جانە جۇرەك قارىنشاسىنا تىم ارتىق سالماقتىڭ تۇسۋىنە اكەلەدى. مۇنداي جۇرەك كەسەلى ءار ءتۇرلى جاستاعى ادامداردا كەزدەسەدى جانە ول تۋا بىتەدى. جۇرەك جەتىسپەۋشىلىگى ءسابي كەزىندە بايقالىپ, كوبىنە جيىرما جاستان اسقان ادامداردا انىقتالادى. مۇنداي ەمدەلۋشىلەردە جۇرەك كەمىستىگى وكپە گيپەرتەنزياسىن, جۇرەك جەتىسپەۋشىلىگىن جانە اريتميا اۋرۋلارىن تۋدىرادى.
وككليۋدەر پايدا بولعانعا دەيىن جۇرەكشە اراسىنداعى قالقاننىڭ جەتىسپەۋشىلىگى بار ەمدەلۋشىلەرگە وپەراتسيا جاساندى قان اينالىمى جۇيەسىن پايدالانۋمەن, اشىق جۇرەككە جاسالاتىن. مۇنداي ەمدەلۋشىلەر ۇزاق ۋاقىتتان سوڭ عانا ءبىرجولا ايىعىپ, كوبىنە وتادان كەيىنگى اسقىنۋلاردان زارداپ شەگەتىن. وككليۋدەر يمپلانتاتسياسى – بۇل زاماناۋي ەمدەۋ ءادىسى, ول ينۆازيالىعىنىڭ تومەندىگىمەن, ادام دەنساۋلىعىنىڭ جىلدام قالپىنا كەلۋىمەن, اسقىناۋلاردىڭ از بولۋىمەن ەرەكشەلەنەدى. سونىمەن قاتار اتالعان ەمدەۋ ءادىسى جۇكتىلىكتىڭ ءتىپتى سوڭعى اپتالارىندا دا قولدانىلا الادى.
جۇرەك جەتىسپەۋشىلىگىن جويۋ ءۇشىن زاماناۋي ماتەريالدان – نيتينولدان, نيكەل مەن تيتان قورىتپاسىنان جاسالاتىن وككليۋدەر اتتى قۇرىلعى پايدالانىلادى. قۇرىلعى ارنايى ەنگىزۋ جۇيەسى ارقىلى جۇرەككە كىرگىزىلىپ, ءوزىنىڭ ءپىشىمىنىڭ ارقاسىندا جۇرەك جەتىسپەۋشىلىگىنىڭ تۇسىنا ورنىعادى. ەم-شارانى باقىلاۋ جانە وككليۋدەردى دۇرىس ورناتۋ ءۇشىن دارىگەرلەر انگيوگراف جانە وڭەش ارقىلى ۋدز پايدالانادى.
وككليۋدەرلەردى ورناتۋ بويىنشا ءوزىنىڭ كوپجىلدىق تاجىريبەسىمەن بۇگىن ارنايى شاقىرىلعان رەنتگەنوحيرۋرگ ا.وڭلاسىنوۆ ءبولىستى. وپەراتسيانى جاساۋ ءۇشىن دارىگەرلەر ادامنىڭ ءبىر سانىن ءسال كەسىپ, قان تامىرى ارقىلى كاتەتەر ەنگىزدى, ول وككليۋدەردى قاجەتتى اعزاعا جەتكىزدى.