ەلىمىزدىڭ ۇلتتىق بانكى بولسا, جىل سوڭىنا دەيىن 1,4 ميلليارد دوللار كولەمىندە ۆاليۋتا ساتىپ الۋدى جوسپارلاپ وتىر. بانك ماماندارىنىڭ پىكىرىنشە, مۇنداي وپەراتسيا نارىقتاعى تاۋەكەلدەردى رەتتەۋگە جەتكىلىكتى.
قارجىلىق ۇيىم 2016 جىلدان بەرى ۆاليۋتا رەزەرۆتەرىن ءارتاراپتاندىرۋ ساياساتىن ۇستانىپ كەلەدى. سونىمەن قاتار ۆاليۋتا نارىعىنداعى رەسەي اقشاسىنىڭ قۇبىلۋىنا ەلىمىزدىڭ ۇلتتىق بانكى ىقپال ەتپەيدى. بۇل تۋرالى بۇگىن اقشا-نەسيە ساياساتى جونىندەگى دوڭگەلەك ۇستەل بارىسىندا دەپارتامەنت ماماندارى ءمالىم ەتتى. ساراپشىلاردىڭ ايتۋىنشا, بىلتىردان بەرى جۇرگىزىلگەن باقىلاۋلارعا سايكەس, تەڭگەنىڭ رۋبلگە شاققانداعى باعامى قالىپتى بولدى. كۇردەلى اۋىتقۋلار بولعان جوق. ال رەسەي ۆاليۋتاسىنا جالپى نارىقتىق احۋال ىقپال ەتكەن.
ءاليا مولدابەكوۆا, مونەتارلىق وپەراتسيالار جونىندەگى دەپارتامەنت ديرەكتورى:
- 2017-2018 جىلدار ارالىعىندا تەڭگەنىڭ رۋبلگە شاققانداعى باعامى 5 تەڭگەدەن اسپاعان بولاتىن. الايدا 2018 جىلدىڭ ءساۋىر ايىندا باعام ماكسيمالدى كورسەتكىشتى بايقاتتى. ياعني 6 تەڭگەنى قۇرادى. قاراپ وتىرساڭىزدار ءبىز رۋبل باعامىن شەكتەمەيمىز. ەستەرىڭىزدە بولسا بىلتىر كۇزدە ىشكى فاكتورلاردىڭ لەگىمەن ياعني تەڭگەنىڭ قۇنسىزدانۋىن بولجاعان ۋاقىتتا ۆاليۋتامىز رۋبلگە قاتىستى كەرىسىنشە نىعايا ءتۇستى. ويتكەنى رەسەيگە قارسى جاسالعان سانكتسيالار ىقپالى ۆاليۋتانىڭ ق ۇلىدارۋىنا اكەلدى. ارينە ۇلتتىق ۆاليۋتامىز دا رۋبل تولقۋلارىن ازداپ قايتالاعانى راس بۇل زاڭدىلىق.
- سونداي-اق ساراپشىلار دامۋشى نارىقتارداعى ۆاليۋتا كورسەتكىشتەرىنىڭ تومەندەگەنىن دە اتاپ ءوتتى. وعان فەدەرالدى رەزەرۆتىك جۇيەنىڭ پايىزدىق مولشەرلەمەنى وزگەرتكەنى ىقپال ەتكەن. ماماندار كەلتىرگەن مالىمەتتەرگە سايكەس, جىل باسىنان بەرى رەسەي اقشاسى 18 پايىزعا قۇلدىراسا, تەڭگە 8,8 پايىزدى قۇراپ دوللار مەن ەۋروعا قاتىستى وزگەرىس بايقاتقان جانە قىتاي يۋانىنە دە جول بەرگەن. مامانداردىڭ پىكىرىنشە, تەڭگەنىڭ قۇبىلۋىنا دامۋشى نارىقتاردان ءىرى ينۆەستورلاردىڭ اقشاسىن كەرى قايتارىپ الۋى سىڭدى ءۇردىس ىقپال ەتكەن.
24.kz