جارىستىڭ العاشقى كۇنىندە سەمسەرلەسۋ سپورتىنىڭ وكىلى دميتري الەكسانين قازاقستاننىڭ العاشقى التىن مەدالىن اپەرسە, جانكۇيەرلەر ەكىنشى التىندى ءتورت كۇن كۇتۋگە تۋرا كەلدى. كەشەگى جارىس كۇنى قازاقستان ءۇشىن قولا جۇلدەمەن باستالعانىمەن, ۆەلوسپورتتان توپتىق جارىس كەزەڭىندە وتانداسىمىز الەكسەي لۋتسەنكو ازيا ويىندارىنىڭ چەمپيونى اتاندى. الەكسەي لۋتسەنكو ەكى جاپوندىق جانە ەكى تايلاندتىق ۆەلوسپورتشىنىڭ كورسەتكەن قىسىمىنا قاراماستان, مارە سىزىعىن ءبىرىنشى بولىپ كەستى. لۋتسەنكونىڭ ۋاقىت كورسەتكىشى - 3:25:25.
سارسەنبى كۇنى جۇلدە الۋى مۇمكىن بولعان كۇرەس تۇرلەرىنەن سايىستار اياقتالىپ, التىن العان بالۋانداردىڭ ەسىمدەرى انىقتالدى. وزدەرىن ايگىلى ءاپايتوس بالۋان قاجىمۇقاننىڭ ءىزباسارىمىز دەپ سانايتىن ءبىزدىڭ بالۋانداردىڭ ەسىمىن بۇل تىزىمەن كورە الماعانىمىز وكىنىشتى-اق. ازيا ويىندارىنىڭ تاريحىندا قازاق بالۋاندارى تۇڭعىش رەت التىن جۇلدەسىز ەلگە ورالاتىن بولدى.
ازيا ويىندارىنىڭ ەكى دۇركىن چەمپيونى نۇرماحان تىناليەۆكە جانكۇيەرلەردىڭ سەنىمى زور ەدى, بىراق ءۇش دۇركىن جەڭىمپاز اتاناتىن مۇمكىندىك تۋعان ساتتە ۋىستاعى التىندى سۋسىتىپ الدى. فينالدىق سايىستا ايقىن باسىمدىلىقتى وزبەك بالۋانىنا بەرىپ, ويسىراي ۇتىلعانى ءتىپتى ۇيات. المات كەبىسباەۆتان دا التىن مەدال كۇتىپ ەدىك. دەگەنمەن, قارسىلاسى ەكى دۇركىن الەم چەمپيونى ەكەنىن ەسكەرسەك, جەڭىسكە جەتۋى قيىن ەكەنىن كوزىقاراقتى كورەرمەن بەلدەسۋ الدىندا-اق سەزگەندەي. كورەي بالۋانى وسى جەڭىسىنەن كەيىن ەكى دۇركىن ازيادا جەڭىمپازى اتاندى. دانيار قايسانوۆقا قايسارلىق جەتىسپەگەنىن نەسىنە جاسىرايىق. بەكزات ءابدىراحمانوۆتىڭ وسىدان ءتورت جىل بۇرىن ازيادادا جەڭىسكە جەتكەنى ءالى ەسىمىزدە. 74 كيلودا تاجىريبەلى بالۋاندى ۇتۋعا تاكتيكالىق تۇرعىدا دايىندىق جەتىسپەدى. 1994 جىلى ماۋلەن مامىروۆ العان التىننىڭ قاتارىن تولىقتىراتىن ەركىن كۇرەس شەبەرلەرىنىڭ قاراسى ازىرگە بايقالماي تۇر.
قولا العان جىگىتتەرگە دە مىڭ العىس. دەگەنمەن, ءبىر بەلدەسۋدە جەڭىلىپ, جۇبانىش بەلدەسۋىندە جەڭىپ, مەدال الۋ ولاردىڭ مىقتىلىعىن كورسەتپەيدى. ەندىگى بار ءۇمىت – جەڭىل اتلەتتەر مەن بوكسشىلاردا. بىلعارى قولعاپ شەبەرلەرى ىرىكتەۋ جارىستى بۇگىن باستاسا, اتلەتتەر ەرتەڭنەن باستاپ جارىس جولىنا شىعادى.
ازيا ويىندارىنىڭ بەسىنشى كۇنى دە قولادان كەندە قالمادىق. العاشقى قولا جۇلدەنى اكادەميالىق ەسۋدەن قىزدار اراسىنداعى جەكەلەي سىندا الەكساندرا وپاچانوۆا جەڭىپ السا, ستەند اتۋدان ماريا دميتريەنكو دا قولا جۇلدە يەلەندى. سونىمەن قاتار تاەكۆوندودان 68 كيلو سالماقتا سىنعا تۇسكەن ەراسىل قايىربەك جارتىلاي فينالدا ەكى دۇركىن وليمپيا ويىندارىنىڭ جۇلدەگەرى, ەكى دۇركىن ازيا ويىندارىنىڭ چەمپيونى وڭتۇستىككورەيالىق سپورتشىدان 10:32 ەسەبىمەن جەڭىلىپ, قولا جۇلدەنى قاناعات تۇتتى. ەل قورجىنىنا تاعى ءبىر قولا جۇلدەنى 50 مەترگە باتتەرفلياي ادىسىمەن جۇزۋدە ادىلبەك مۋسين سالدى.
ءالي بيتورە, «ەگەمەن قازاقستان»