مەن ۇلى وتان سوعىسىنا قاتىسىپ, وت پەن وقتىڭ ورتاسىندا تالاي رەت ءولىم اۋىزىنان امان قالعان اداممىن. جيىرما جىلداي وبلىستىڭ ارداگەرلەر كەڭەسىن باسقاردىم. جاسىم سەكسەننىڭ سەڭگىرىنە كەلسە دە جۇمىستان قول ءۇزبەدىم. سوڭعى ءبىر-ەكى جىلدا اۋىر سىرقات تاپ بولدى. مويىندادىم, ءبىر اياقتى كەسۋگە تۋرا كەلدى. ءبارى ءساتتى بولدى. قاتارعا قوسىلىپ كەلەمىن. شىركىن-اي, وسىنداي ءساتتەردە سولار ءۇشىن ەشتەڭەنى اياماعان كەيبىر جاس ۇرپاقتارىمىزدىڭ قىلىقتارى قىنجىلتادى. بۇكىل الەم الدىندا ۇيات بولاتىنداي جاعدايعا تاپ بولدىق. حالقىمىز اتا-بابا ارمانى تاۋەلسىزدىككە قول جەتكىزىپ شات-شادىمان ءومىر ءسۇرىپ جاتقاندا مۇنداي كەلەڭسىزدىككە, بۇزاقىلىققا بارۋ بارىپ تۇرعان اقىماقتىق. اقىلسىزدىق. كەيبىر جاستاردىڭ سانا-سەزىمىنىڭ تايازدىعى. سوندىقتان وندايلار ءتيىستى جازاسىن الۋى كەرەك. وركەن جايىپ ءوسىپ, قارىشتى قارقىنمەن دامىعان ەلىمىزدى كورە المايتىنداردىڭ بار ەكەنىن ءبارىمىز دە ءبىلۋىمىز كەرەك. قارا نيەتتى ادامداردىڭ الداپ-ارباۋىنا تۇسپەۋدى ويلاۋ قاجەت. بۇل رەتتە ەلباسىنىڭ بەيبىت حالىقتىڭ قاۋىپسىزدىگىن ساقتاۋ ءۇشىن جاڭاوزەن اۋماعىندا توتەنشە جاعداي جاريالاۋى وتە دۇرىس بولدى. بۇل ءارى تىنىشتىقتى ساقتاۋعا, ءارى بۇزاقىلىقتاردى ىزدەپ-تاۋىپ, ءتيىستى جازاعا تارتۋعا مۇمكىندىك بەرەتىن شارا. الداعى ۋاقىتتا دا قاراپايىم حالىق زارداپ شەكپەۋى ءۇشىن بارشامىز دا قىراعى بولايىق.
ت.يگىلىكوۆ, ۇلى وتان سوعىسىنىڭ ارداگەرى.
جاڭاوزەن.