مەن بۇدان 25 جىل بۇرىن مەكتەپ بىتىرگەن ۇرپاقتىڭ وكىلىمىن. سول كەزدەگى ساياساتتىڭ ءدۇمپۋىن ءبىر كىسىدەي بىلەمىن. اسكەرگە بارعاندا جەلتوقسان وقيعاسىنىڭ ىزعارىن سەزىندىك. ەلىمىز تاۋەلسىزدىك العان ساتتە الدىمەن قۋانعان قازاقتىڭ ءبىرى ەدىم. سودان بەرى ەلىمىزدىڭ وركەندەۋىنە, ىشكى-سىرتقى ەكونوميكالىق بايلانىستىڭ تەرەڭ تامىر جايۋىنا ىشتەي تىلەكشى بولىپ جۇرگەن جانمىن. الايدا, كەشە, ەل تاۋەلسىزدىگىنىڭ 20 جىلدىق مەرەيتويى تويلانار ءساتتە ماڭعىستاۋ وڭىرىندە ورىن العان توسىن وقيعا الاڭداتىپ-اق تاستادى.
مەنىڭ اتام حالقىمىزدىڭ اۋىز ادەبيەتىن جاقسى بىلەتىن. حالىق اراسىندا كەڭ تاراعان اقىنداردىڭ, جىرشىلاردىڭ ولەڭ-جىرلارىن جاتقا ايتاتىن. ءوزى دە ادەبيەتكە وتە جاقىن بولدى. سۋىرىپسالمالىق ونەرى بار ەدى. سول ونەرىن بىزگە دارىتۋعا كوپ جۇمىستاندى. نەمەرەلەرىمەن, ياعني, بىزبەن اڭگىمە-دۇكەن قۇرعاندا ۇدايى ەلدىكتى, قازاقستاندى مەكەن ەتكەن ۇلتتار اراسىنداعى بىرلىكتى ناسيحاتتاپ وتىرۋشى ەدى. ءبىز ودان الداعى ءومىرىمىزگە مول ءتالىم-تاربيە الدىق. ونى ءوزىمىزدىڭ كۇندەلىكتى تىرشىلىگىمىزدە ۇدايى ەستە ۇستاپ وتىرامىز. مۇنى ايتىپ وتىرعان سەبەبىم, جاڭاوزەن قالاسىنداعى وقىس وقيعا تۋرالى بىلگەندە, ءۇلكەندەردىڭ ءتالىم-تاربيەسى كەمشىن تۇسكەن جوق پا دەگەن وي مازالايدى. قايدان بىلەيىن, قازىرگى قوعامدا ۇلكەندەردىڭ ايتقانىنان گورى اقشالى توپتاردىڭ ءامىرى باسىم بولىپ كەتۋى دە مۇمكىن عوي. جاڭاوزەن قالاسىنداعى وقيعاعا سەبەپشى بولعان اعايىننىڭ اراسىندا مۇمكىن قالتالى توپتاردىڭ ىقپالىندا كەتكەن جاستاردىڭ ءوز ەرىكتەرىنە ىرىق بەرە الماعانى اسەر ەتكەن شىعار.
تەگىندە, قازاق حالقى تاۋەلسىزدىكتى ۇدايى مۇرات ەتكەن. سول جولدا قاسىق قانىن قيىپ وتىرعان. دەمەك, قازاق حالقى ءۇشىن تاۋەلسىزدىكتەن قىمبات نارسە بولماۋى ءتيىس. ال جاڭاوزەن قالاسىنداعى باۋىرلاردىڭ ءدال وسى ساتتەگى ارەكەتى كوڭىلگە قونبايدى. مۇمكىن, مۇنىڭ ارتىندا قازاق حالقىنىڭ, قازاق ەلىنىڭ تاۋەلسىزدىگىن تارك ەتكىسى كەلگەن توپتاردىڭ ىقپالى بولۋى ابدەن مۇمكىن. بىراق, ءبىزدىڭ ىنتىماعى جاراسقان حالقىمىز مۇنداي ورەسكەل ارەكەتتى ەشقاشان قولدامايدى. بۇل – ءبىزدىڭ تاۋەلسىزدىگىمىزگە تونگەن قاتەر. ەلدىكتى, قازاق حالقىنىڭ الەمدىك ساياساتتاعى بەدەلىن ويلايتىن ءبىزدىڭ بۋىن ءدال بۇلايشا قيمىل جاساماۋى قاجەت ەدى. اعايىن اراسىندا بولاتىن كيكىلجىڭگە ءتۇسىنىستىكپەن قارايتىن جۇرت مۇنداي ءماسەلەگە بارىنشا بايىپتى كوزقاراسپەن قاراپ, ەڭ وڭتايلى شەشىمىن كۇتۋى قاجەت ەدى. امال نە, مۇنايلى تۇبەكتەگى باۋىرلاردىڭ بۇل ءىسى ءبارىمىزدى قىنجىلتتى.
قالاي ايتقاندا دا, ەل تاۋەلسىزدىگىنىڭ 20 جىلدىق مەرەيتويى ساتىندە ماڭعىستاۋ وڭىرىندەگى كەلەڭسىز ءجايت بابالار اڭساعان تاۋەلسىزدىك ارمانىن ىسكە اسىرىپ جۇرگەن بۇگىنگى ۇرپاقتىڭ ساعىن سىندىرا المايدى. ەڭ باستىسى, ەلدىڭ بىرلىگىنە سىنا قاققىسى كەلگەن الدەكىمدەردىڭ ارانداتۋىنا ۇرىنىپ قالمايىق, اعايىن.
بيمىرزا امانگەلدى ۇلى.
اتىراۋ وبلىسى.