ماجارستاننىڭ بۋگاتس قالاسىندا 10-شى حالىقارالىق «تۇران» حالىقتار قۇرىلتايى باستالدى.
قۇرىلتايعا 30-دان استام حالىقتاردىڭ دەلەگاتسياسى قاتىسىپ جاتىر. شارانىڭ اشىلۋ سالتاناتىندا ەجەلگى «تۇران» اسكەري شەرۋى ءوتتى. ماجارستان پارلامەنتىنىڭ سپيكەرى لاسلو كەۆەر قۇرىلتاي قاتىسۋشىلارىن اۋقىمدى شارانىڭ اشىلۋىمەن قۇتتىقتادى. قۇرىلتايدا جەبە تارتۋ جارىسى, ۇلتتىق مۋزىكا كونتسەرتى, شامان اندەرىنىڭ كەشى, عىلىمي كونفەرەنتسيالار ءوتىپ جاتىر.
جوعارى دەڭگەيدە ۇيىمداستىرىلعان شارا ءۇشىن اقتوبە وبلىسىنىڭ اكىمى بەردىبەك ساپارباەۆ مىنبەرگە شىعىپ, ۇيىمداستىرۋشىلار القاسىنا العىس ءبىلدىردى. ول قۇرىلتايعا قازاقستان مەن ماجارستان اراسىنداعى جىل وتكەن سايىن نىعايىپ كەلە جاتقان تاريحي, مادەني جانە ەكونوميكالىق بايلانىستاردى ەسكەرە وتىرىپ, قازاقستان پرەزيدەنتىنىڭ تاپسىرماسىمەن كەلگەنىن ايتتى.
بەردىبەك ساپارباەۆ قازاقستاندا تۇركىستان وبلىسىنىڭ قۇرىلعانى - تاريحي تۋريزم بازاسىن قۇرۋعا كەڭ مۇمكىندىكتەر ەسىگىن اشاتىنىن ايتتى. سونداي-اق, اكىم قازاقستاندا عۇنداردىڭ تاريحىن, ونەرى مەن مادەنيەتىن زەرتتەۋ ورتالىعىنىڭ اشىلۋى تۋرالى ايتىپ, كەلەسى قۇرىلتايدى قازاقستاندا وتكىزۋدى ۇسىندى. سونداي-اق اقتوبە وبلىسى «ماديار تۇران» قورىنا قازاقى كيىز ءۇيدى سىيعا تارتتى.
قۇرىلتاي اياسىندا ۇيىمداستىرىلعان دوڭگەلەك ۇستەلگە حالىقارالىق تۇركى اكادەمياسىنىڭ پرەزيدەنتى دارحان قىدىرالى, «قاسيەتتى قازاقستان» عىلىمي-زەرتتەۋ ورتالىعىنىڭ باسشىسى بەرىك ابدىعالي ۇلى, گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى ايبولات كوشكىمباەۆ قاتىستى. دوڭگەلەك ۇستەلدە تۇركى اكادەمياسىنىڭ پرەزەنتاتسياسى ءوتىپ, «رۋحاني جاڭعىرۋ» باعدارلاماسى اياسىندا قۇرىلىپ جاتقان «قاسيەتتى قازاقستان» ورتالىعى تانىستىرىلدى.
حالىقارالىق تۇركى اكادەمياسىنىڭ پرەزيدەنتى دارحان قىدىرالى ماجار ساراپشىلارى مەن عالىمدارىنا شيۆەەت ۇلاان العاشقى تۇركى عۇرىپتىق كەشەنى ورنىندا جۇرگىزىلگەن قازبا جۇمىستارىنىڭ ناتيجەسىن ۇسىندى. بەرىك ابدىعالي ۇلى «قاسيەتتى قازاقستان» كىتابىن تانىستىرىپ, استانا ماڭىنداعى كونە بوزوك قالاسى, ونىڭ عۇندارمەن بايلانىسى تۋرالى ايتتى.
«تۇران» حالىقتار قۇرىلتايىنىڭ نەگىزىن قالاۋشى ءارى يدەيالىق دەم بەرۋشى اندراش بيرو حالىقارالىق تۇركى اكادەمياسىنىڭ التىن مەدالىمەن ناگرادتالدى. حالىقارالىق تۇركى اكادەمياسى مەن «ماديار تۇران» قورىنىڭ قاتىسۋىمەن وتكەن دوڭگەلەك ۇستەلدە ىنتىماقتاستىق مەموراندۋمىنا قول قويىلدى.
وتىزدان استام ەل دەلەگاتسياسىنىڭ باسىن قوسقان قۇرىلتاي ەكى كۇنگە جالعاسادى. وندا ۇلان-عايىر جەردى الىپ جاتقان تاريحي تۇران ولكەسىن مەكەندەگەن حالىقتاردىڭ اسا باي مادەني-تاريحي مۇرالارى كورسەتىلەدى.