استانادا توقىما ونەركاسىبى سالاسىنداعى قازاقستان–قىتاي ىنتىماقتاستىعىنىڭ كەلەشەگى تالقىلاندى

كەزدەسۋ بارىسىندا Kazakh Invest باسقارما توراعاسى ساپاربەك تۇياقباەۆ قازاقستان مەن قىتاي اراسىنداعى بىرلەسكەن ينۆەستيتسيالىق باعدارلاما اياسىندا بيوتەحنولوگيالار, اۆتوكولىك كلاستەرى, جاڭارتىلعان ەنەرگيا كوزدەرى سالالارىنداعى ءىرى جوعارى تەحنولوگيالى جوبالاردى ىسكە اسىرۋ باستالعانىن اتاپ ءوتتى. سونداي-اق, تاعى دا باسقا كەلىسىمدەرگە ەلباسى ن. ءا. نازارباەۆتىڭ بيىلعى ماۋسىم ايىنداعى قحر-عا ساپارى بارىسىندا قول جەتكىزىلدى.

«توقىما ونەركاسىبى – ىنتىماقتاستىقتى ارتتىراتىن ۇلكەن الەۋەتى بار, كەلەشەكتى باعىت. ماسەلەن, قازاقستاندا جىل سايىن 250 مىڭ تونناعا جۋىق ماقتا جينالادى. وسى كولەمنىڭ شامامەن ۇشتەن ءبىر بولىگى وڭدەلەدى, ال قالعان بولىگى شيكىزات تۇرىندە ەكسپورتقا باعىتتالادى. سونىمەن قاتار, بىزدە وزبەكستانمەن شەكارا ماڭىندا ورنالاسقان “وڭتۇستىك” ارنايى ەكونوميكالىق ايماعى بار. حالىقارالىق رەيتينگتەرگە سايكەس قازاقستانداعى ينۆەستيتسيالىق احۋالدىڭ ورتالىق ازيا ايماعىنداعى ەڭ جاقسىسى ەكەنىن ەسكەرسەك, قر-داعى بيزنەستى دوڭگەلەتىپ, ەكسپورتتى ودان ءارى دامىتۋعا ابدەن بولادى», — دەدى س. تۇياقباەۆ.

ءوز كەزەگىندە «وڭتۇستىك» اەا-نىڭ باسشىسى مەدەۋ دىلداباەۆ قىتايلىق سەرىكتەستەرگە ارنايى ەكونوميكالىق ايماق قاتىسۋشىلارىنا قاراستىرىلعان جەڭىلدىكتەر تۋرالى ەگجەي-تەگجەيلى ايتىپ بەردى.

قىتايدىڭ توقىما ونەركاسىبى وداعى سول ەلدىڭ جەتەكشى ۇيىمدارىنىڭ ءبىرى. قحر-دىڭ توقىما ونەركاسىبى مينيسترلىگىنىڭ قۇرامىنان شىققان وداقتىڭ 20 جىلدان استام تاريحى بار. قازىر ۇيىمنىڭ قاتارىندا 20 ملن-نان استام ادام جۇمىس ىستەيدى. وداقتىڭ كومپانيالارى قىتايدىڭ بۇكىل توقىما ونەركاسىبىنىڭ جالپى ەكسپورت كولەمىنىڭ 12%-ىن ەكسپورتتايدى, ال قىتاي ەكونوميكاسىنا قوسقان ۇلەسى 3%-عا باعالانادى.

كەزدەسۋ بارىسىندا توقىما ونەركاسىبى دەلەگاتسياسىنىڭ مۇشەلەرى ماقتا ءوندىرۋ, شيكىزاتتى قايتا وڭدەۋ, كيىم ءوندىرىسى جانە لوگيستيكا سالاسىنداعى ىنتىماقتاستىق تۋرالى كەلىسسوزدەر جۇرگىزە باستادى.

«بۇل ءبىزدىڭ قازاقستانعا العاشقى ساپارىمىز جانە ءبىزدىڭ دەلەگاتسيا مۇشەلەرىنىڭ كوپشىلىگى ءسىزدىڭ ەلمەن ىنتىماقتاستىقتى دامىتۋعا مۇددەلى. مۇندا Kazakh Invest كومپانياسىنىڭ شاقىرۋىمەن كەلدىك. مەنىڭشە, بىزدە وتە ءساتتى كەزدەسۋ بولدى, قازاقستاننىڭ ينۆەستيتسيالىق الەۋەتى تۋرالى بىلدىك. قازاقستان مەن قىتاي – ورتاق تاۋلار مەن وزەندەر ارقىلى بايلانىستىرىلعان, ورتاق شەكاراسى بار ەل, سوندىقتان دا وسى سالا بويىنشا ەكى ەل اراسىندا ۇلكەن مۇمكىندىكتەر بارىنا سەنەمىن», — دەدى قىتاي دەلەگاتسياسىنىڭ باسشىسى, قىتاي توقىما ونەركاسىبى وداعىنىڭ توراعاسى سۋن جۋيچجە.

ءوز كەزەگىندە قازاقستان رەسپۋبليكاسىنداعى قىتاي حالىقارالىق ساۋدا پالاتاسى وكىلدىگىنىڭ باس ديرەكتورىنىڭ ورىنباسارى گاو تسي «بۇگىنگى كەزدەسۋ قىتاي مەن قازاقستان اراسىنداعى توقىما ونەركاسىبى ىنتىماقتاستىعى ءۇشىن جاقسى باستاما بولدى. ۇكىمەت ينۆەستورلار ءۇشىن وتە قولايلى جاعداي جاساپ جاتىر. سوندىقتان بۇگىنگى كەلىسسوزدەر مەن تالقىلاۋلاردان كەيىن جاقسى ناتيجە بولادى دەپ ويلايمىن» دەپ اتاپ ءوتتى.