استانادا «قازاقستان شەتەلدىك باق كوزىمەن» اتتى بەسىنشى حالىقارالىق بايقاۋى مارەسىنە جەتىپ, ۇزدىك شىققان جەڭىمپاز جۋرناليستەر ماراپاتتالدى.
ماراپاتتاۋ راسىمىنە سىرتقى ىستەر ءمينيسترى قايرات ءابدىراحمانوۆ, قازاقستان باس رەداكتورلار كلۋبىنىڭ پرەزيدەنتى ەرلان بەكحوجين جانە بايقاۋ سەرىكتەستەرى مەن جەڭىمپاز جۋرناليستەر ەلدەرىنىڭ استاناداعى ديپلوماتيالىق وكىلدەرى قاتىستى. جىل سايىن وتەتىن بايقاۋعا شەتەلدىك باق وكىلدەرى قاتىسۋى ارتىپ كەلەدى. بيىل 20-دان استام ەلدەن 80-نەن استام ءوتىنىم كەلىپ ءتۇسىپ, ولاردىڭ اراسىنان بەس قۇرلىق وكىلدەرى جەڭىمپاز اتاندى. ولار ءوز جۇمىستارىندا قازاقستاندىق بولمىستىڭ ءتۇرلى اسپەكتىلەرىن اشىپ كورسەتىپ, شىعارماشىلىق جانە وبەكتيۆتى تۇرعىدا بايانداۋعا تىرىسقان. جالپى بايقاۋ ۇيىمداستىرىلعان جىلدار ىشىندە شەتەلدىك بۇقارالىق اقپارات قۇرالدارى وكىلدەرىنىڭ قازاقستاننىڭ مادەنيەتىنە, ەكونوميكاسى مەن حالقىنىڭ ومىرىنە دەگەن قىزىعۋشىلىعى ارتقانىن بايقاۋعا بولادى. وڭتۇستىك جانە سولتۇستىك امەريكا, ەۋروپا, تمد جانە بالتىق ەلدەرى, تاياۋ شىعىس جانە افريكا, ازيا, اۆستراليا جانە وكەانيا ەلدەرى بولىپ جىكتەلگەن وڭىرلەردەن كەلىپ تۇسكەن جۇمىستار اراسىنان تاڭدالعان بەس جەڭىمپاز باس جۇلدە – قازاقستانعا كەلۋگە جولدامانى جەڭىپ الدى. ءراسىم بارىسىندا ءسوز العان سىرتقى ىستەر ءمينيسترى قايرات ءابدىراحمانوۆتىڭ ايتۋىنشا, تەك استانا تاقىرىبى بويىنشا شەتەلدىك باسىلىمداردا 300-گە جۋىق ماقالا جاريالانعان. «بيىل استانانىڭ 20 جىلدىق مەرەيتويى تۋرالى شەتەلدىك ءباسپاسوز بەتتەرىندە 300-گە جۋىق ماقالا جارىق كوردى. ولاردىڭ باسىم بولىگى استاناعا ارنايى ساپارلاپ كەلگەن جۋرناليستەردىڭ ەكسكليۋزيۆ ماقالالارى», دەدى مينيستر جەڭىمپازداردى ماراپاتتاۋ بارىسىندا. ودان بولەك, بايقاۋعا رەسەيلىك, گرۋزيالىق, ازەربايجان جۋرناليستەرىنىڭ ۇزدىك ماقالالارى كەلىپ ءتۇستى. وكىنىشكە وراي, بارلىعىن بىردەي ماراپاتتاي المايمىز, دەگەنمەن شەتەلدىك باسپاسوزدەردە جارىق كورگەن ءاربىر ماقالا ۇلكەن ەڭبەكتىڭ جەمىسى, ءارى ءبىز ءۇشىن وتە باعالى. سوندىقتان, بۇل بايقاۋ ءوز جالعاسىن تابادى دەپ ويلايمىن».
تمد جانە بالتىق ەلدەرى اۆتورلارىنىڭ اراسىنان 2017-2018 جىلدار ىشىندە قازاقستان مەن وزبەكستان اراسىنداعى ديپلوماتيالىق قارىم-قاتىناستىڭ 25 جىلدىعىنا ارنالعان ماقالالار سەرياسىندا ەكى ەل قارىم-قاتىناسىن بەلسەندى جاريالاعانى ءۇشىن وزبەكستان ۇلتتىق اقپارات اگەنتتىگىنىڭ ء(وزا) ءتىلشىسى ۇلىقبەك شونازاروۆ جەڭىمپاز اتاندى. ال ەۋروپا جۋرناليستەرى اراسىنان بريتاندىق دجيللي پيكاپتىڭ قازاقستانعا ساياحاتى تۋرالى «Country and Townhouse» جۋرنالىندا جارىق كورگەن «One Steppe Beyond» اتتى ماقالاسى ارقىلى ۇزدىكتەر قاتارىنان تابىلدى. امەريكالىق الەكساندر ليپوۆتسەۆ پەن ستەفان رابيموۆتىڭ «Forbes» جۋرنالىنا شىققان «قازاقستاننىڭ بەس عاجايىبى: ورتالىق ازيادا نەلىكتەن ءسان ءتۋريزمى جەدەل دامۋدا» اتتى ماقالاسى امەريكا قۇرلىعىنىڭ جۋرناليستەرى اراسىنداعى ەڭ ۇزدىك ماقالا بولىپ تانىلدى. ال تاياۋ شىعىس پەن افريكا ەلدەرىنىڭ جۋرناليستەرى اراسىنان قازاقستاننىڭ دامۋىنا, سىرتقى ساياساتىنا جانە استانانىڭ 20 جىلدىعىنا ارنالعان ساپالى ماتەريالدار سەرياسى ءۇشىن يوردانيالىق ايمان ابدەلحافەز از-زابەن جەڭىمپاز اتاندى. «Business Central Asia» جۋرنالىندا جاريالانعان ۇندىستاندىق يندەرۆير سينگحتىڭ «Astana: the capital has it's own charms and pleasures» اتتى جاريالانىمى ازيا, اۋستراليا جانە وكەانيا ەلدەرىنەن كەلىپ تۇسكەن ماقالالار اراسىنان قارا ءۇزىپ شىقتى. وندا قالانىڭ ءوسۋى تۋرالى ستاتيستيكالىق ماعلۇماتتار كەلتىرىلە استانانىڭ ساۋلەتى سۋرەتتەلىپ, قالاداعى عيماراتتار مەن قۇرىلىمداردىڭ قىسقاشا تاريحى جازىلعان. جەڭىمپاز اتانعان بەس جۋرناليست استانا, الماتى قالالارىنا جانە بۋراباي كۋرورتتىق-دەمالىس ايماعىنا ساپارلاپ جانە قازاقستاننىڭ مادەني-تاريحي نىساندارىمەن تانىسىپ, قازاقستاننىڭ لاۋازىمدى تۇلعالارىمەن, ساراپشىلارمەن, جۋرناليستەرمەن, مادەنيەت, سپورت, تۋريزم سالاسىنىڭ وكىلدەرىمەن سۇحباتتاسۋ مۇمكىندىگىنە يە بولدى.
ۆەنەرا تۇگەلباي,
«ەگەمەن قازاقستان»