الماتىدا سالىنىپ جاتقان كەلەسى ەكى مەترو بەكەتى 2021 جىلى پايدالانۋعا بەرىلەدى. بۇل تۋرالى قۇرىلىسقا جاۋاپتى كومپانيا وكىلدەرى مالىمدەدى. ولاردىڭ ايتۋىنشا, «سارىارقا» جانە «دوستىق» ستانسالارىنىڭ قۇرىلىسىنا وسىدان ءۇش جىل بۇرىن 67 ملرد تەڭگە بولىنگەن. بىراق بۇل قاراجات جەتپەگەندىكتەن, رەسپۋبليكالىق بيۋدجەتتەن بيىل قوسىمشا 9,5 ملرد تەڭگە قاراستىرىلىپ وتىر.
قازىر سالىنىپ جاتقان ەكى مەترو بەكەتى پايدالانۋعا بەرىلگەن سوڭ, ماماندار «قالقامان» ستانساسىن سالۋعا كىرىسەدى. وعان قاجەتتى جەر تەلىمدەرى انىقتالىپ, ءبولىم يەلەرىمەن كەلىسسوز جۇرگىزىلىپ جاتىر. جوسپار بويىنشا 152 جەر تەلىمى مەملەكەت مۇقتاجى ءۇشىن ساتىپ الىنادى. ال قۇرىلىسشىلار ءبىراز قيىندىقتاردىڭ بارىن ايتادى. جەردى ۇڭعىلاۋعا زاماناۋي تەحنيكالاردىڭ ءوزى شىداس بەرمەي جاتقان كورىنەدى.
جاميليا اريسوۆا, «الماتىمەتروقۇرىلىس» اق وندىرىستىك تەحنيكالىق دەپارتامەنتىنىڭ ديرەكتورى:
– الماتى مەتروسىن سالۋداعى ەڭ ءبىر كۇرمەۋى قيىن كۇردەلى جاعدايلاردىڭ ءبىرى بولىپ سانالاتىنى – الماتى قالاسىنىڭ سەيسميكالىق قاۋىپتى ايماقتا ورنالاسۋى. مەترو قۇرىلىسى اۋماعىندا جەراستى توپىراعىنىڭ ەرەكشەلىگى ايتارلىقتاي قيىندىقتار تۋعىزادى. ءتىپتى بۇگىنگى زامانداعى الدىدا كەلە جاتقان قۋاتتى تەحنيكالاردىڭ ءوزى كوپتەگەن قيىندىققا ۇشىراۋدا.