باتىس قازاقستان وبلىسىنىڭ جەدەل جاردەم قىزمەتىنىڭ اۆتوپاركى سوڭعى ۇلگىدەگى رەانيموبيلدەرمەن تولىقتى. وندا شالعاي اۋىلداردان ناۋقاستاردى تاسىمالداۋ كەزىندە كومەك كورسەتۋگە ارنالعان زاماناۋي مەديتسينالىق قۇرىلعىلاردىڭ ءبارى بار.
كولىك ىشىنە كوپ فۋنكتسيونالدى كرەسلولار ورناتىلعان. سونىمەن قاتار ىستىق جانە سۋىق سۋدىڭ بولۋى دا دارىگەرلەر ءۇشىن قولايلى جاعداي تۋدىرماق. بۇگىنگى تاڭدا جەدەل جاردەم قىزمەتىنە كۇنىنە 600-دەي شاقىرتۋ تۇسەدى. تاۋلىك بويى 25 بريگادا كەزەكشىلىك ەتەدى.
اۆتوموبيل پاركى دە ۇنەمى جاڭارتىلۋ ۇستىندە. ماسەلەن, وتكەن جىلى 9 جاڭا گازەل كولىگى الىندى. قازىر ستانسادا 77 كولىك بار. ولار پلانشەتتەرمەن جابدىقتالىپ, سيتۋاتسيالىق ورتالىقپەن بايلانىس ورناتقان. جەدەل جاردەم بەكەتى ءاربىر قالالىق ەمحانالاردىڭ جانىنان قۇرىلعان.
تيمۋر عاپشاكىروۆ, رەانيماتولوگ: – قازىرگى تاڭدا كەلگەن كولىك تولىق تۇردە مامانداندىرىلعان اپپاراتتارمەن جابدىقتالعان. ونىڭ ىشىندە وكپەنى جاساندى تىنىستاندارۋ اپپاراتى جانە تۇراقتى تۇردە وتتەگىمەن قامتاماسىز ەتۋ قىزمەتى بار.