فۋتزالدان الەم چەمپيوناتى الماتىدا وتەدى

بىردەن ايتا كەتەيىك, ءبىزدىڭ توپتاعى كوماندالار اراسىندا ەۋروپا قۇرلىعىنىڭ وكىلدەرى وتە مىقتى. ماسەلەن, 2014 جىلى يسپانيادا وتكەن ستۋدەنتتەردىڭ الەم بىرىنشىلىگىندە بەلارۋس قۇراماسى قولا مەدالدى يەلەنسە, 2016 جىلى برازيليادا وتكەن جارىستا چەحيا ويىنشىلارى دا ءدال سول مەجەدەن كورىندى. ياعني, ايتۋلى مەملەكەتتىڭ ورەندەرى ءدۇبىرلى دودالاردا جەڭىستىڭ ءدامىن تاتىپ ۇلگەرگەن. بۇل جولى دا جۇلدەلى ورىنداردىڭ ءبىرىن يەلەنۋ ءۇشىن ولاردىڭ ەش ايانىپ قالمايتىنى انىق. دەسەك تە بايراقتى باسەكە ءوز ەلىمىزدە, ءوز جەرىمىزدە, ءوز جانكۇيەرلەرىمىزدىڭ كوز الدىندا وتەتىندىكتەن ءبىزدىڭ جىگىتتەر دە نامىستى قولدان بەرمەي, جەڭىس تۇعىرىنا كوتەرىلۋ ءۇشىن بارىن سالۋعا ءتيىس.

وزگە باسەكەلەر مىنا كوماندالارى اراسىندا ءوربيدى: «ا» توبى –رەسەي, فرانتسيا, ارگەنتينا جانە سلوۆاكيا. «س» توبى – تايلاند, گەرمانيا, ۋكراينا جانە حورۆاتيا. «D» توبى – پورتۋگاليا, يزرايل, قىتاي جانە پولشا.

ستۋدەنتتەر اراسىنداعى الەم بىرىنشىلىگىنىڭ تۇساۋى 1984 جىلى برازيليانىڭ سان-پاۋلۋ قالاسىندا كەسىلدى. بۇل ءدۇبىرلى دودا الاڭ يەلەرىنىڭ جەڭىسىمەن اياقتالدى. فينالدا ولار پاراگۆاي قۇراماسىن 5:4 ەسەبىمەن ۇتتى. قولا مەدالدى يسپانيا يەلەندى. ءۇشىنشى ورىن ءۇشىن تارتىستا پيرەنەي تۇبەگىنىڭ تۇلەكتەرى يتاليادان 7:6 ەسەبىمەن باسىم ءتۇستى. 

جالپى 15 مارتە جالاۋى جەلبىرەگەن اتالمىش جارىستا ەڭ كوپ جەڭىس تويىن تويلاعان برازيليا قۇراماسى ەكەن. ولار 5 مارتە باس جۇلدەنى (1984, 1996, 2000, 2010, 2016) ولجالادى. سونداي-اق, برازيليالىقتاردىڭ قورجىنىندا 3 كۇمىس جانە 1 قولا مەدال بار. وسى كورسەتكىش جاعىنان رەسەي ويىنشىلارى ەكىنشى ورىندا. كورشىلەرىمىز 4 رەت (1994, 2002, 2006, 2014) توپ جارىپ, بەس رەت فينالدا ءسۇرىندى. تاعى ەكى جارىستى ولار ءۇشىنشى ورىنمەن قورىتىندىلادى. ۇزدىك ۇشتىكتىڭ قاتارىندا ۋكراينا بار. ولار 3 التىن (1998, 2004, 2012), 1 كۇمىس جانە 3 قولانى ولجالادى. سونداي-اق, يسپانيا (1990), يتاليا (1992) جانە پورتۋگاليانىڭ (2008) ستۋدەنتتەرى ءبىر-ءبىر رەتتەن جەڭىس تۇعىرىنىڭ ەڭ بيىك ساتىسىنا كوتەرىلدى.

وسىنىڭ الدىنداعى ستۋدەنتتەردىڭ الەم بىرىنشىلىگى 2016 جىلى برازيليانىڭ گويانا قالاسىندا ۇيىمداستىرىلدى. بۇل جارىستىڭ اقتىق سايىسىندا الاڭ يەلەرى رەسەيدى 2:1 ەسەبىمەن ۇتتى. ال قولا مەدال ءۇشىن باسەكەدە چەحيا قۇراماسى فرانتسيانى 11:3 ەسەبىمەن تاس-تالقان ەتتى.

ايەلدەر اراسىنداعى جارىسقا كەلەر بولساق, 2008-2016 جىلدار ارالىعىندا دۇنيەجۇزىلىك دودا بەس رەت ۇيىمداستىرىلىپ, سولاردىڭ بارلىعى دا برازيليا ارۋلارىنىڭ ايقىن جەڭىسىمەن اياقتالدى. سونىمەن قاتار, جۇلدەلى ورىنداردى يەلەنگەندەر اراسىندا پورتۋگاليا (2 كۇمىس+1 قولا), يسپانيا (2 كۇمىس), رەسەي (1 كۇمىس+2 قولا), قىتاي (1 قولا)  جانە يران (1 قولا) سىندى ەلدەردىڭ وكىلدەرى بار.

الماتىداعى جارىستا قازاقستاننىڭ سۇلۋلارى «ۆ» توبىندا ونەر كورسەتەدى. قارسىلاستارىمىز – پورتۋگاليا, فرانتسيا جانە جاڭا زەلانديا قۇرامالارى.  «ا» توبىندا رەسەي, كانادا, ۋكراينا, يزرايل جانە پولشا قۇرامالارى كۇش سىناسادى.

عالىم سۇلەيمەن,

«ەگەمەن قازاقستان»