باتىس قازاقستان وبلىسى تەرەكتى اۋدانىنىڭ پودستەپنوە كەنتىندە جازۋشى حامزا ەسەنجانوۆقا ەسكەرتكىش ورناتىلدى. بۇل قالامگەردىڭ 110 جىلدىق مەرەيتويى اياسىندا كورسەتىلگەن قۇرمەت.
ورال قالاسىنىڭ ءدال ىرگەسىندەگى ءىرى ەلدىمەكەننىڭ « ۇلى دالا» ساياباعىندا ورناتىلعان ەسكەرتكىشتىڭ اشىلۋ سالتاناتىنا جازۋشىنىڭ تۋىستارى, جەرگىلىكتى قالامگەرلەر, جازۋشى شىعارماشىلىعىن زەرتتەۋشىلەر, مەكتەپ وقۋشىلارى قاتىستى. «رۋحاني جاڭعىرۋ» باعدارلاماسى اياسىندا ورناتىلعان ءبيۋستتىڭ اۆتورى – ورالدىق ءمۇسىنشى دميتري بايمۇقاشەۆ.
- بۇل شارا ەگەمەندىكتىڭ ارقاسىندا ىسكە اسىپ جاتىر. حامزا ەسەنجانوۆ – قازاقتىڭ ۇلى جازۋشىلارىنىڭ ءبىرى. ول سوۆەتتىك داۋىردە قۋعىنعا ۇشىراپ, كوپ جىل ايداۋدا ءجۇردى. حامزا اعامەن الماتىدا كورشى تۇردىق. سوفيا اپاي بۇكىل ومىرىنە سۇيەنىش بولعانىن كوردىك. «سور بولدى-اۋ 37 مىنا ەلگە, دالادا ارۋ زارلاپ, جىلادى ەر دە. ءوزىمدى قۇلاي سۇيگەن دارىگەر قىز, قارتايدى ەرىپ ءجۇرىپ لاگەردە»... سوفيا اپاي حامزا اعا سوتتالىپ, ايداۋدا بولعاندا بىرگە ءجۇردى. ول دا ماعجان جۇماباەۆپەن قانداس, تەكتى جەردىڭ قىزى ەدى. حالىقتىڭ مۇڭىن جازعان جازۋشى حالىققا جاۋ بولا ما؟ قازاق حالقى باسىنان نە كەشتى, نەگە ولاي بولدى دەگەن ساۋال جاستاردى ويلانتۋى ءتيىس, - دەدى جازۋشى ءبيۋستىنىڭ شىمىلدىعىن سىپىرىپ تۇرىپ اقىن اقۇشتاپ باقتىگەرەەۆا.
باتىس قازاقستان وبلىسىندا جەرگىلىكتى ادەبيەتشى سايلاۋ سۇلەيمەنوۆ قالامگەردىڭ ءومىر جولى مەن شىعارماشىلىعىن جۇيەلى زەرتتەپ, بىرنەشە كىتاپ شىعارعان عالىم. باستاماشىل توپتىڭ مۇرىندىق بولۋىمەن باتىس قازاقستان وبلىستىق بالالار مەن جاسوسپىرىمدەر كىتاپحاناسى بىلتىر حامزا ەسەنجانوۆ ەسىمىن يەلەندى. بيىل «حامزا جولىمەن» ەكسپەديتسياسى ۇيىمداستىرىلىپ, وعان قاتىسۋشىلار ءوڭىردىڭ اقجايىق, سىرىم, تەرەكتى اۋداندارىمەن ءجۇرىپ ءوتتى. «قالامگەردىڭ ايگىلى «اق جايىق» تريلوگياسى – حح عاسىردىڭ باسىندا وسى وڭىردە وتكەن قوعامدىق-ساياسي وقيعالاردىڭ جىلناماسى سىندى شىعارما» دەيدى سايلاۋ حاميت ۇلى.
وسى شارادان كەيىن اۋىلدىق مادەنيەت ۇيىندە جازۋشى شىعارماشىلىعىنا ارنالعان دوڭگەلەك ۇستەل ءماجىلىسى ءوتىپ, قازاقستان رەسپۋبليكاسىنىڭ ەڭبەك سىڭىرگەن مادەنيەت قىزمەتكەرى, اقىن شولپان قىدىرنيازوۆا, ولكەتانۋشى, پروفەسسور جايساڭ اقباي, ايتىسكەر اقىن ءارى جازۋشى, ۇلاعاتتى ۇستاز داريعا مۇشتانوۆالار قالامگەر تۋرالى ويلارىن ورتاعا سالدى.
ايتا كەتەيىك, ورال قالاسىنا ەڭ جاقىن ورنالاسقان, جەرگىلىكتى حالىق سانى باسىم تەرەكتى اۋدانىندا سوۆەت كەزەڭىنەن قالعان ونوماستيكالىق وراشولاقتىق سول كۇيىندە ساقتالىپ تۇر. ەلدىمەكەندەرى دوليننىي, بوگدانوۆكا, نوۆوپاۆلوۆكا, پوكاتيلوۆكا, پريرەچنوە, پودستەپنوە بولىپ كەلەتىن تەرەكتى اۋدانى ورتالىعىنىڭ ءوزى فەدوروۆكا اتالادى. قازاق جىرشىلىق ونەرىندەگى ۇلى ۇستازداردىڭ ءبىرى سانالاتىن ماراباي جىراۋدىڭ تۋعان جەرىندە قازاقى قالىپتى قالپىنا كەلتىرەتىن وسىنداي شارالار كەرەك-اق ەدى. پودستەپنوە اۋىلىندا حامزا ەسكەرتكىشىنىڭ بوي كوتەرۋى وسىنداي قىرىمەن دە ەل ەسىندە قالدى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
سۋرەتتى تۇسىرگەن ايباتىر نۇراش