قازاقستان مەن رەسەيدىڭ توعىز ۇزدىك ەكيپاجى «Burabay-2018» حالىقارالىق ءىV رەگاتاسىندا شەبەرلىكتەرىن سىنعا سالدى.
بۋراباي باۋرايىنداعى شورتان كولىندە جەلكەن كەرگەن جارىسقا قاتىسۋشىلار 2015 جىلدان باستاپ قولعا الىنعان وسى ءبىر ادەمى شارانىڭ بۇگىنگى جالعاستىرۋشىلارى. ءار جىل سايىن ءۇزىلىپ تۇسكەن مونشاقتاي اسەم شورتان كولىنىڭ جاعاسىندا الەمدىك دودالاردا دۇركىرەي توپ جارىپ جۇرگەن جەلكەندى قايىق سپورتى ۇزدىكتەرىنىڭ باسى قوسىلادى. ماسەلەن, 2012 جىلى حايكوۋدا وتكەن الەم چەمپيوناتىنا قاتىسۋشى, رەسەي فەدەراتسياسى چەمپيوناتتارىنىڭ بىرنەشە مارتە جەڭىمپازى, سپورت شەبەرى, جەلكەندى جارىستىڭ جامپوزى الەكساندر پارحومەنكو جانە رەسەيدە وتكەن تالاي جارىستا توپ جارعان كوكشەتاۋلىق سەرگەي ۆورونوۆ وسى جولى دا جەلكەندى قايىق جارىسىن قىزدىرا ءتۇستى.
بۇل جولعى جارىسقا بالقاش, پەتروپاۆل, ماسكەۋ, ەكاتەرينبۋرگ, ومبى سياقتى قالالاردىڭ سپورتشىلارى قاتىستى. بۇرىنعى جارىستاردان ءبىر ەرەكشەلىگى, بۇل جولعى شارانى وبلىستىق اكىمدىك قولداپ, ءدۇيىم ەلدىڭ نازارىن بۋرابايعا اۋداردى. جالعىز جارىس قانا ەمەس, رۋحاني ءنارى مول شارالار دا كوپ بولدى. وسى ورايدا:
– الداعى ۋاقىتتا وسىنداي قولداۋ بولاتىن بولسا, جەلكەندى قايىق جارىسىنىڭ ايى وڭىنان تۋادى, – دەپ رازىلىعىن ءبىلدىردى سەرگەي ۆورونوۆ.
اشىلۋ سالتاناتى دا اجارلى, ايشۋاق سالتاناتىمەن كورەرمەننىڭ كوڭىلىن توعايتارلىق بولىپ وتكىزىلدى. ءتىپتى, كول ۇستىندە شارق ۇرعان شاعالا دا شۋلى جارىسقا تامسانىپ ءوز ءۇنىن قوسىپ تۇرعانداي. ەكى كۇن بويى وزدەرىنىڭ تەمىردەي توزىمدىلىكتەرىن, اقباس تولقىندارى اسپانعا اتا تولىقسي تولقىعان كول بەتىندەگى شەبەرلىكتەرىن سىنعا سالعان جارىس بارىسىندا ءاربىر كوماندانىڭ جەڭىسكە دەگەن قۇشتارلىعى ايقىن اڭعارىلىپ تۇردى.
جارىس سوڭىندا قازىلار القاسىنىڭ شەشىمى بويىنشا كول بەتىندە قايىعىن كوپتەن وزدىرعان ەكاتەرينبۋرگ قالاسىنىڭ كومانداسى جەڭىمپاز اتاندى. ءبىر ايتا كەتەرلىگى, وتكەن جىلعى سايىستا دا وسى كوماندانىڭ مەرەيى ۇستەم بولعان. ەكىنشى ورىنعا اقمولا وبلىسىنىڭ كومانداسى يە بولسا, ءۇشىنشى ورىن تاعى دا رەسەيلىكتەرگە بۇيىردى.
بايقال ءبايادىل, «ەگەمەن قازاقستان»