ەلىمىزدەگى جاستاردى جۇمىسپەن قامتۋ – الەۋمەتتىك-ەكونوميكالىق دامۋدىڭ كىلتى ەكەنى بەلگىلى. ونى ەل پرەزيدەنتى ءار سوزىندە «كەلەشەگىمىزگە قامقورلىقپەن قاراۋ مەنىڭ ساياساتىمنىڭ باستى ءمان-ماڭىزى» دەپ ۇنەمى ايتىپ وتىرادى. وسىعان وراي جۋىردا ورال قالاسىندا جاستارعا قىزمەت كورسەتەتىن ارنايى ورتالىق اشىلدى. بۇل باتىس قازاقستان وبلىستىق جاستارمەن جۇمىس جونىندەگى رەسۋرستىق ورتالىعىنىڭ جانىنان قۇرىلعان ءبىرىنشى ورتالىق.
– جاڭا ورتالىقتا جاستار جۇمىسقا ورنالاسۋ, ءوز كاسىبىن اشۋ سياقتى ماسەلەلەردە پايدالى كەڭەس, ناقتى كومەك الادى. ارنايى ورتالىق ماماندارى جاستار كوپ جينالاتىن جەرلەرگە وزدەرى شىعىپ تا قىزمەت كورسەتپەك. قازىر مۇندا 4 مامان بار, بولاشاقتا سۇرانىسقا قاراي ونىڭ سانى كوبەيۋى مۇمكىن, – دەيدى جاستارمەن جۇمىس جونىندەگى رەسۋرستىق ورتالىق باسشىسى مەرجان ابىلقاس.
ورال قالاسىندا قىزمەتىن باستاعان وسىنداي ورتالىق ءاربىر اۋداندا دا اشىلماق. باتىس قازاقستان وبلىسى اكىمىنىڭ ورىنباسارى عابيدوللا وسپانقۇلوۆ وڭىردەگى بارلىق اۋدان اكىمدەرىنە وسىنداي تاپسىرما بەرگەن.
ايتا كەتەيىك, بۇگىندە وبلىس تۇرعىندارىنىڭ 21,0 پروتسەنتى جاستار. ياعني 14 پەن 29 جاس ارالىعىنداعى جاستاردىڭ سانى 136 مىڭنان اسادى. ولاردىڭ جارتىسىنا جۋىعى اۋىلدا تىركەلگەن.
«2018 جىلدىڭ 1 توقسانىندا جاستار اراسىنداعى جۇمىسسىزدىق دەڭگەيى 4,0 پروتسەنت بولدى. جالپى ەش جەردە وقىمايتىن, جۇمىس ىستەمەيتىن جاستاردىڭ ۇلەسى – 2018 جىلدىڭ 1 توقسانىندا 2,8 پروتسەنت. قازىر بۇل رەسپۋبليكا بويىنشا ەڭ تومەنگى كورسەتكىش» دەلىنگەن وڭىردەگى جاستارمەن جۇمىس جونىندەگى رەسۋرستىق ورتالىق تاراتقان مالىمدەمەدە.
2018 جىلدىڭ العاشقى جارتىسىندا 3573 جاس ءتۇرلى قىزمەت ىزدەپ, جۇمىسپەن قامتۋ ورىندارىنا جولىققان ەكەن. ولاردىڭ 2889-ى جۇمىسقا ورنالاسقان. تاراتىپ ايتار بولساق, 1425 ادام دەرەكقوردا بار تۇراقتى جۇمىسقا كىرگەن, 902 ادام الەۋمەتتىك جۇمىس ورىندارى مەن جاستار تاجىريبەسىنە جىبەرىلسە, 562 جاس قوعامدىق جۇمىسقا تارتىلعان.
جىل باسىنان بەرى باتىس قازاقستان وبلىسىندا 3 مىڭعا جۋىق جاس مامان مەملەكەتتىك باعدارلامالار جانە جوبالاردىڭ يگىلىگىن كورگەن ەكەن. سونىڭ ىشىندە 747 مامان «جاستار تاجىريبەسى» باعدارلاماسى اياسىندا قىزمەتكە الىنسا, 383 مامان «ديپلوممەن اۋىلعا!» باعدارلاماسىمەن جۇمىسقا كىرىسكەن. ولارعا تيىسىنشە 246,7 ملن تەڭگە كولەمىندە كوتەرمە جاردەماقى بەرىلدى. ال 236 جاس مامان وزدەرى بارعان اۋىلدارعا تامىر جايىپ باسپانالى بولعان. ال ولارعا بەرىلگەن جەڭىل نەسيە كولەمى 802 ملن تەڭگە.
جاستاردى جۇمىسقا ورنالاستىرۋ مۇمكىندىگىن كەڭەيتۋ, جۇمىسسىز جاستاردى جۇمىسقا ورنالاستىرۋ, جۇمىس بەرۋشىلەرگە اشىلعان بوس جۇمىس ورىندارىنا لايىقتى جۇمىسشى ىرىكتەۋگە جاردەم بەرۋ, ىقپالداسۋ ماسەلەلەرىمەن وبلىستىق جاستار ساياساتى ماسەلەلەرى باسقارماسى مەن جاستارمەن جۇمىس جونىندەگى رەسۋرستىق ورتالىعى تىكەلەي اينالىسىپ وتىر. ودان بولەك وبلىس بويىنشا «Uralsk job fair-2018» بوس جۇمىس ورىندارى جارمەڭكەسى ءوتىپ جاتقاندىعىن دا ايتا كەتكىمىز كەلەدى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى