ارباداعى بيدەن قازاقستان كۋبوگى ءۇشىن تۋرنيرىنە بيشىلەر الماتىدان, ورالدان, پاۆلوداردان, ەكىباستۇز بەن قاپشاعايدان كەلدى. وبلىستاعى قوستاناي مەن رۋدنىي قالالارىنىڭ بيشىلەرى دە سىرت قالعان جوق.
بۇل ۇلكەن شارانى مادەنيەت جانە سپورت مينيسترلىگىنىڭ سپورت جانە دەنەشىنىقتىرۋ ءىسى جونىندەگى كوميتەتى, رەسپۋبليكالىق سپورت ءبيى فەدەراتسيالارىنىڭ قاۋىمداستىعى, «الما-اتا» ايەلدەر كلۋبى, قوستانايداعى ء«ۇمىت-نادەجدا» قوعامدىق بىرلەستىگى ۇيىمداستىردى. قوستانايلىق ارۋنا جاقسىعۇلوۆا مەن دۇيسەنعالي وسپانوۆ وسى ارباداعى ءبيدىڭ رەسپۋبليكادا ىرگەتاسىن قالاعان بولاتىن. وسى جەردە سپورتتىق بي فەدەراتسيالارىنىڭ قاۋىمداستىعى ءبىرىنشى رەت قازاقستان كۋبوگىن وتكىزۋى دە تەگىن ەمەس.
ارباداعى بي جارىسىندا سپورتشىلار 1 جانە 2-ءشى مۇگەدەكتىك توبى بويىنشا بولىنەدى دە, بىرنەشە كاتەگوريامەن بيلەيدى. ءار كاتەگوريادا بىرنەشە باعدارلاما بولادى, سودان جەڭگەندەر جەڭىمپاز اتانادى. ءپارابيدىڭ «كومبي» كاتەگورياسىندا اربادا وتىرعان ءبيشى مەن مۇگەدەكتىگى جوق كادىمگى ءبيشى لاتىنامەريالىق جانە ەۋروپالىق باعدارلامالاردى ورىندايدى. ال ارباداعى ەكى مۇگەدەكتىڭ ءبيى «دۋو» نەمەسە «دۋەت» دەپ اتالادى. ولار دا لاتىنامەريكالىق جانە ەۋروپالىق باعدارلامالاردى ورىنداۋى ءتيىس. جەكەلەگەن كاتەگوريالار ءۇشىن «يۋنيورى» باعدارلاماسى بار. سونىمەن قاتار بارلىق كاتەگوريالار «فريستايل» باعدارلاماسىمەن بيلەيدى.
«جاقىندا رەسپۋبليكالىق سپورتتىق بيلەر فەدەراتسيالارىنىڭ قاۋىمداستىعى اككرەديتاتسيا الدى. قازىر مۇنداي شارا وتكىزۋگە رۇقساتى بار ەلىمىزدەگى جالعىز ۇيىم وسى. قازان ايىندا الماتى قالاسىندا ارباداعى بيدەن قازاقستان چەمپيوناتى وتەدى. وندا ەكى جۇپ سينگل-ءبيشى ازيا جانە الەم چەمپيوناتتارىنا ىرىكتەلەدى» دەدى رەسپۋبليكالىق سپورتتىق بيلەر فەدەراتسيالارى قاۋىمداستىعىنىڭ توراعاسى ياروسلاۆ كۆاشين.
جارىس قورىتىندىسىندا كاتەگوريالار بويىنشا جەڭىمپازدار انىقتالدى. ولاردىڭ اراسىندا ماليكا مۇحتاروۆا, ارۋنا جاقسىعۇلوۆا سياقتى قوستانايلىق بەلگىلى سپورتشىلار, تاعى باسقالار بار.
ءنازيرا جارىمبەت,
«ەگەمەن قازاقستان»
قوستاناي