بۇگىن استاناداعى «تارلان-ارەنا» سپورت كەشەنىندە شاعىن فۋتبولدان جۋرناليستەر اراسىنداعى «BAQ league» ءتۋرنيرىنىڭ ءتورتىنشى ماۋسىمى باستالدى.
وتكەن ماۋسىمنىڭ قورىتىندىسى بويىنشا جۋرناليستەر بىرىنشىلىگى ەكى ليگاعا بولىنگەن. ارقايسىسىندا جەتى كوماندادان. سونداي-اق, جازعى ماۋسىمدا جۋرناليستەر كۋبوگى دا قاتار وتەدى. وعان قوس ليگانىڭ دا كوماندالارىنىڭ تالاسۋعا قۇقىقتارى بار.
«بيىلعى تۋرنيردى ەكى ليگاعا ءبولۋىمىزدىڭ سەبەبى, اعا بۋىنداعى باق وكىلدەرى جاسىل الاڭدا جاستارمەن تايتالاسا المايتىندىقتان «ۆ» ليگاسىندا ەمەن-جارقىن دوپ تەپسىن دەپ ۇيعاردىق. ال «ا» ليگاسىندا جاس جانە ەڭ مىقتى جۋرناليستەردەن قۇرالعان كوماندالار چەمپيوندىق اتاق ءۇشىن باق سىنايدى», دەدى BAQ league جوباسىنىڭ جەتەكشىسى ءازيز ءجۇمادىل.
سونداي-اق ءار ماۋسىم سايىن جوبا وزىندىك ەرەكشەلىكتەرىمەن دارالانىپ تۇرادى. بيىلعى ماۋسىمنىڭ ەرەكشەلىگى – «باقوش» دەپ اتالاتىن ماسكوتتىڭ پايدا بولۋى. «باقوش ءوزى فۋتبولعا قىزىعاتىن, فۋتبولدى جانى سۇيەتىن جانە ۇنەمى كوڭىلدى جۇرەتىن ادەمى بالاقاي», دەيدى ءا.ءجۇمادىل.
«BAQ league» ءتۋرنيرىنىڭ ءتورتىنشى ماۋسىمىنىڭ «ا» ليگاسىندا «ەگەمەن قازاقستان», «حابار», تساي, «قازمەديا», «سپورت 59», دياپ «Qazaqstan» جانە «اسىل ارنا» ۇجىمى دوپ تەبەدى. ال «ۆ» ليگاسىندا «Qazaqstan», «حابار 24», «ەۋرازيا-ورت», «Elorda aqparat», قمدب ءباسپاسوز قىزمەتى, «Sportinform.kz» جانە «قالگەمەر» كومانداسى باق سىنايدى.
ايتا كەتەيىك, «ەگەمەن قازاقستان» گازەتىنىڭ ۇجىمى «BAQ league» تۋرنيرىنە بيىل ءتورتىنشى رەت قاتىسىپ جاتىر.