ەلىمىزدە جاڭا اۋماقتىق سايلاۋ كوميسسيالارىن قۇرۋ تۋرالى قاۋلى بەرىك يماشەۆتىڭ توراعالىعىمەن وتكەن قازاقستان ورتالىق سايلاۋ كوميسسياسىنىڭ وتىرىسىندا قابىلداندى, دەپ حابارلادى وسك باق-پەن بايلانىس ءبولىمى.
ورتالىق سايلاۋ كوميسسياسى «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنىڭ 10-بابىنىڭ 3-تارماعىنا جانە «استانا قالاسىنىڭ شەكاراسىن وزگەرتۋ تۋرالى», «الماتى وبلىسىنىڭ اكىمشىلىك-اۋماقتىق قۇرىلىمىنداعى وزگەرىستەر تۋرالى», «وڭتۇستىك قازاقستان وبلىسىنىڭ اكىمشىلىك-اۋماقتىق قۇرىلىمىنداعى وزگەرىستەر تۋرالى» قازاقستان پرەزيدەنتىنىڭ جارلىقتارىنا سايكەس الماتى وبلىسىندا كەگەن اۋداندىق اۋماقتىق سايلاۋ كوميسسياسىن, تۇركىستان وبلىسىندا جەتىساي, كەلەس اۋداندىق اۋماقتىق سايلاۋ كوميسسيالارىن جانە استانا قالاسىندا بايقوڭىر اۋماقتىق سايلاۋ كوميسسياسىن قۇرۋ تۋرالى قاۋلى قابىلدادى.
سونىمەن قاتار اكىمشىلىك-اۋماقتىق بىرلىكتەردەگى حالىق سانىنا سايكەس سايلاناتىن ءماسليحاتتار دەپۋتاتتارىنىڭ سانىن بەلگىلەۋ ەرەجەلەرى, قازاقستان رەسپۋبليكاسى اۋماقتىق, وكرۋگتىك جانە ۋچاسكەلىك سايلاۋ كوميسسيالارى مورلەرىنىڭ ۇلگىلەرى, قازاقستان رەسپۋبليكاسى ورتالىق سايلاۋ كوميسسياسىنىڭ كەيبىر قاۋلىلارىنىڭ كۇشى جويىلدى دەپ تانۋ جونىندەگى قاۋلىلار قابىلداندى.