اتىراۋ وبلىسىنىڭ رەسەيمەن شەكارالاس قۇرمانعازى اۋدانى – سۋلى, نۋلى ءوڭىر. كاسپي تەڭىزىنىڭ سولتۇستىك-باتىس بولىگىنەن, ەدىل وزەنىنىڭ سالالارىنان, ماناش, نۇرمان كولدەرىنەن قۇيىلاتىن تىرشىلىك كوزى اۋداندا بالىق شارۋاشىلىعىنىڭ دامۋىنا وڭ ىقپالىن تيگىزىپ وتىر. جىل سايىن بالىقشىلار كۇنى اۋداندا ۇلان-اسىر توي وتەدى. بۇل ءۇردىس بيىل دا جالعاستى.
بالىقشىلار مەرەكەسىنە ارنالعان شارا كوكتىڭ ءيىسى بۇرقىراعان, جان-جاعىن جاسىل جەلەك قورشاپ, سالقىن سامال ەسكەن, تابيعاتى تامىلجىعان قيعاش وزەنىنىڭ جاعاسىندا باستالدى. «امانگەلدى» جشس مەن «سەۆكاسپيفيش» بالىق زاۋىتى, «اقسۋ-قيعاش»جشس, بالىق قورعاۋ ينسپەكتسياسى, «كاسپي-بالىق» وك, ورمان شارۋاشىلىعى مەكەمەسى, «سارسەنباەۆ» شارۋا قوجالىعى, «كاسپي تاڭى» وك جانە وكرۋگتەر مەن جەكە كاسىپكەرلەر قۇرعان اقشاڭقان كيىز ۇيلەر سالتاناتتىڭ ءسانىن كەلتىرىپ-اق تۇر. ودان بولەك كورشىلەس رەسەي فەدەراتسياسىنىڭ كراسنىي يار اۋدانىنان كەلگەن كاسىپكەرلەر دە ءوز ونىمدەرىن ۇسىندى. جاعالاي كيىز ۇيلەرمەن قورشالعان الاڭدا ەرەكشە ءبىر اۋرا ورناعانداي. بۇل الدا بولاتىن شارانىڭ اۋقىمدى ەكەنىنەن حاباردار ەتىپ, اياق باسقاننان-اق كوتەرىڭكى كوڭىل-كۇي سىيلادى.
بالىق شارۋاشىلىعى قىزمەتكەرلەرى كۇنىنە ارنالعان «قاجىرلى ەڭبەك, مەرەيلى ماماندىق» اتتى سالتاناتتى شارادا وبلىس اكىمىنىڭ ورىنباسارى الىبەك ناۋتيەۆ قاتىسۋشىلاردى مەرەكەمەن قۇتتىقتادى: «بۇگىندە بالىق شارۋاشىلىعى وبلىسىمىزدىڭ ەكونوميكالىق دامۋىنا وزىندىك ەرەكشە ۇلەسىن قوسىپ كەلە جاتقان ۇلكەن سالالاردىڭ ءبىرى. ارينە قيىندىقسىز جۇمىس بولمايتىنى بەلگىلى. بۇرىنعى بالىق شارۋاشىلىعى تاريح قويناۋىنا كەتسە, قازىر قايتا قۇرىلىپ, دامىپ كەلە جاتىر. تاۋەلسىزدىك جىلدارى بۇل سالانى قايتا دامىتۋ باعىتىنداعى ەلباسىمىزدىڭ ۇلكەن ەڭبەگىن اتاپ ءوتۋىمىز قاجەت. سەبەبى اتا كاسىبىن جالعاستىرىپ جاتقان كاسپي وڭىرىندەگى قيىنشىلىقتاردى جويۋدا, كورشىلەس ءتورت مەملەكەتپەن بىرلەسە وتىرىپ ونىڭ قويناۋىنداعى بايلىقتاردى بولىسۋدە, مۇنى ورتاق پايدالانۋ ماسەلەلەرىن شەشۋدە ۇلكەن ىستەر تىندىرىلدى. وسىدان ءبىر-ەكى جىل بۇرىن بالىقشىلار 400 توننا عانا بالىق اۋلاسا, بيىل ولاردىڭ ءليميتى 9 مىڭ تونناعا جەتتى. بۇرىنعى اتىراۋ بالىق زاۋىتىنىڭ ءبىر بولىگى بولعان شورتانباي بالىق زاۋىتى قايتا تۇلەپ, جاڭعىرىپ, سالاعا وزىندىك ۇلەسىن قوسىپ وتىرعانى سىزدەرگە ايان», دەي كەلە ەلەۋلى ەڭبەكتەرىمەن ەرەكشەلەنگەن بالىقشىلاردى وبلىس اكىمىنىڭ العىس حاتىمەن ماراپاتتادى.
اۋدان اكىمى بيبوز شاياحمەتوۆ اۋدانداعى بالىق شارۋاشىلىعى بويىنشا تىندىرىلعان جۇمىستار جونىندە بايانداما جاساپ: «اۋدان كولەمىندە بالىق شارۋاشىلىعىن دامىتۋ جانە وركەندەتۋ باعىتىندا تەڭىز اۋىلدىق وكرۋگىندە 2016 جىلدىڭ ناۋرىزىنان باستاپ رەسەي-قازاقستان ازاماتتارىنىڭ قاتىسۋىمەن «كاسپي ينتەر فيش» جشس قۇرىلدى. سەرىكتەستىكتىڭ جىلدىق بالىق قابىلداۋ قۋاتى – 2000 توننا. تۇراقتى تۇردە 20, ماۋسىمدىق قىزمەتتە 60 ادام جۇمىس ىستەيدى. شورتانباي بالىق زاۋىتى وندىرىستىك بازاسىندا «سەۆ كاسپي فيش» جشس قۇرىلىپ, جۇمىستى قارقىندى باستادى. بايدا اۋىلدىق وكرۋگىندە «كاسپيان فيش» جشس-ىنە قاراستى بالىق زاۋىتى ىسكە قوسىلدى. بۇلاردان باسقا اۋداندا سالانى دامىتۋ باعىتىندا بۇرىننان «كاسپي بالىق» وك, «كاسپي تاڭى» وك, «امانگەلدى اتىنداعى» جشس, «اقسۋ-قيعاش» جشس, «سارسەنباەۆ ە» شق اۋدان كولەمىندە بالىق اۋلاپ, وڭدەپ, ەكسپورتقا شىعارۋمەن اينالىسادى» دەپ اتاپ ءوتتى. سالتاناتتى شارادا بىرنەشە سالا ارداگەرى مەن وزات جۇمىسشىلار ماراپاتقا يە بولدى.
ارينە قانداي مەرەكەنىڭ دە ءان شاشۋسىز ءسانى كىرمەيتىنى انىق. كەڭ دالانىڭ توسىندە ءان اۋەلەپ, سپورتتىق جارىستار ءوتتى. وسىلايشا قيعاش وزەنىنىڭ جاعاسىنا جينالعان بالىقشىلار اتاۋلى كۇندەرىن ايرىقشا مەرەكەگە اينالدىردى.
قانات عۇماروۆ
اتىراۋ وبلىسى