وسكەمەندە 11-18 شىلدە ارالىعىندا استانا قالاسىنىڭ 20 جىلدىعىنا وراي ۆولەيبولدان قىزدار كوماندالارى اراسىنداعى كلۋبتىق ازيا چەمپيوناتى ءوتتى. وسىمەن ەكىنشى جىل قاتارىنان شىعىس قازاقستاندا جالاۋىن جەلبىرەتكەن ءدۇبىرلى دوداعا سارى قۇرلىقتىڭ كىل مىقتى كوماندالارى جينالدى.
الا دوپ الامانىنىڭ اشىلۋ سالتاناتىنا ازيا ۆولەيبول كونفەدەراتسياسىنىڭ وكىلدەرىمەن بىرگە قازاقستان ۆولەيبول فەدەراتسياسىنىڭ پرەزيدەنتى نۇرتاي ابىقاەۆ تا ارنايى قاتىسىپ: «بارشاڭىزدى وسىناۋ سپورت مەرەكەسىنىڭ باستالۋىمەن شىن جۇرەكتەن قۇتتىقتايمىن. جاپونيا, قىتاي حالىق رەسپۋبليكاسى, تايلاند, قىتايلىق تايبەي, يران, ۆەتنام, شري-لانكا, يندونەزيا ەلدەرىنىڭ سپورتشىلارىنا, قوناقجاي قازاق ەلىنە, شۇعىلالى شىعىس جەرىنە قوش كەلدىڭىزدەر دەيمىز. سونداي-اق بىزگە وسىنداي اۋقىمدى شارانى تاعى ءبىر مارتە وتكىزۋ مىندەتىن سەنىپ تاپسىرعان ازيا ۆولەيبول كونفەدەراتسياسى باسشىلىعىنا راحمەت ايتامىز. قۇرلىقتىڭ مىقتىلارى قاتىساتىن جارىس تارتىستى دا قىزىقتى ويىندارعا تولى بولادى دەپ سەنەمىز», دەپ ءوز قۇتتىقتاۋىن جەتكىزدى.
جارىس الدىندا وتكەن ءباسپاسوز ءماسليحاتىندا وسكەمەندىك «التاي» كومانداسىنىڭ باس باپكەرى يۋري پانچەنكو ويىن وڭاي بولمايتىنىن, نەگىزگى باسەكە ءبىر جىل بۇرىنعىداي تايلاند, جاپونيا, قىتاي جانە قازاقستان كوماندالارى اراسىندا ءوربيتىنىن ايتقان-دى. «مۇنداي بايراقتى باسەكەنىڭ ەكى جىل قاتارىنان ءبىر ەلدە, ءبىر قالادا وتكىزىلۋى كوپ نارسەنى اڭعارتسا كەرەك. ءوز باسىم بىلتىرعى بىرىنشىلىكتى كورمەسەم دە بيىلعى دودا ۇيىمداستىرىلۋى جاعىنان ودان اسىپ تۇسەتىنىنە سەنەمىن.
وبلىس باسشىلىعى الدىمىزعا كەم دەگەندە فينالعا شىعۋ مىندەتىن قويىپ وتىر. ويتكەنى وسكەمەن قالاسى الەم بىرىنشىلىگىن دە وتكىزۋگە قامدانىپ جاتىر. دەمەك, ءبىز بيىلعى دودادا جوعارى ناتيجە كورسەتىپ, سول جاھاندىق سايىسقا جولداما الۋىمىز كەرەك. قالاي دەگەندە دە, جانكۇيەرلەرىمىزدىڭ سەنىمىن اقتاعىمىز كەلەدى», دەگەن ەدى باس باپكەر. «التايدىڭ» كاپيتانى سانا انارقۇلوۆا: «بىلتىرعى جارىسقا دايىندىعىمىز ناشارلاۋ بولعانى راس. الايدا بيىل ءبارى كەرىسىنشە, تۇركياعا بارىپ, ناتيجەلى وقۋ-جاتتىعۋ جيىندارىن وتكىزىپ قايتتىق. سونىمەن قاتار كومانداعا بىرقاتار بەلدى ويىنشى كەلىپ قوسىلدى», دەپ بيىل بىلتىرعىداي ەمەس, سايىسقا ساقاداي ساي ەكەندىكتەرىن جەتكىزگەن-ءدى.
ءباسپاسوز ءماسليحاتىندا چەمپيوناتتىڭ بىلتىرعى جەڭىمپازى, تاي ەلىنىڭ اتىنان سىنعا تۇسەتىن «سۋپريم» كومانداسىنىڭ باس باپكەرى ناتاپحون سريسامۋتناك بىردەڭە سەزگەندەي «بىلتىرعى جەتىستىگىمىزدى قايتالاۋعا تىرىسامىز. ءوز كوماندامنىڭ جەڭىسكە جەتەتىنىنە شامامەن 80 پايىزعا سەنەمىن» دەپ وزدەرىنە سەنىمدىلىگىن اڭعارتقان ەدى.
سونىمەن, 8 كۇنگە سوزىلعان سايىس اياقتالىپ, جەڭىمپازدار انىقتالدى. وكىنىشكە قاراي, «التاي» قىزدارى بىلتىرعى قارسىلاستارىن اينالىپ وتە المادى. ءتورتىنشى ورىندى يەلەندى. بىلتىرعى ستسەناري بيىل دا تۇپ-تۋرا قايتالاندى دەۋگە بولادى. تايلاندتىق «سۋپريم» – 1, جاپونيالىق «نەك رەد روكەتس» 2-ورىندى قانجىعالارىنا بايلاسا, ۇزدىك ۇشتىكتى قىتاي ەلىنىڭ «تسزيانسۋ» كومانداسى تۇيىندەدى.
ءدۇبىرلى دودانىڭ جابىلۋ سالتاناتىنا ايماق باسشىسى دانيال احمەتوۆ ارنايى قاتىسىپ, ويىنشىلارعا جىلى لەبىزىن ءبىلدىردى. «بۇگىن ايەلدەر كوماندالارى اراسىنداعى كلۋبتىق ازيا چەمپيوناتى اياقتالىپ وتىر. ءبىر اپتا بۇرىن سپورتشىلارىمىز ءوز ەلىنىڭ نامىسى ءۇشىن ايقاسۋعا دايىن ەدى. ەندى ولار دوسقا اينالدى. اپتاعا سوزىلعان ۆولەيبول مەرەكەسىنە قاتىسقان بارشاڭىزدى شىن جۇرەكتەن قۇتتىقتايمىن. سپورتشىلارعا دەمەۋ بولعان جانكۇيەرلەرگە دە ەرەكشە العىسىمدى ايتامىن», دەدى وبلىس اكىمى.
دوپ دوداسىنىڭ جابىلۋ سالتاناتىندا جەكەلەي ەسەپتە جوعارى دەڭگەيلى ويىن كورسەتكەن سپورتشىلار ارنايى ماراپاتقا يە بولدى. چەمپيوناتقا ارنايى دايىندالعان مەدالدار ەڭ ۇزدىك ۇجىمدارعا تابىستالدى. ونىڭ ىشىندە «سۋپريم» ۆولەيبولشىلارى «بايتەرەك» ۇلگىسىندەگى كۋبوككە يەلىك ەتتى. سونىمەن قاتار «سۋپريم» كومانداسىنىڭ ويىنشىسى كونوت ايچاراپورن – «ۇزدىك ويىنشى», ولگا دروبىشەۆسكايا («التاي»), كونوت ايچاراپورن («سۋپريم»), حيروشي نانامي («نەك رەد روكەتس») – «ۇزدىك شابۋىلشى», ناتاليا شارشاكوۆا («التاي»), چەنيۋ ۆانگ («تسزيانسۋ») – «ۇزدىك ورتالىق توسقاۋىلشى», ۆانكيانباي رونگ («تسزيانسۋ») «ۇزدىك بايلانىستىرۋشى» جانە ساياكا يۆاساكي («نەك رەد روكەتس») «ۇزدىك ليبەرو» نوميناتسيالارىمەن ماراپاتتالدى.
ازامات قاسىم,
«ەگەمەن قازاقستان»
وسكەمەن