بيىل وبلىستاعى ءبىلىم گرانتتارىنىڭ سانى ەكى ەسەگە دەيىن كوبەيىپ, ولاردىڭ 70 پايىزى اقپاراتتىق تەحنولوگيالار سالاسىنداعى ماماندىقتارعا بولىنەتىن بولادى. بۇل تۋرالى قىزىلوردا وبلىسىنىڭ اكىمى قىرىمبەك كوشەرباەۆ وبلىستىق ءماسليحات سەسسياسىنىڭ وتىرىسىندا ايتتى.
ايماقتا 2013 جىلدان بەرى جىل سايىن اۋىلدىق جەرلەردەگى كوپبالالى جانە تۇرمىسى تومەن وتباسىنان شىققان دارىندى تۇلەكتەر ءۇشىن وبلىس اكىمىنىڭ 100 گرانتى بولىنەتىن. بۇگىندە مۇنداي گرانتتى يەلەنۋشىلەردىڭ سانى 700 -گە جەتتى.
بيىلدان باستاپ وبلىس اكىمىنىڭ گرانتى 2 ەسەگە ءوسىپ, 205-كە جەتىپ وتىر.
2014 جىلدان باستاپ رەسەي فەدەراتسياسى ۇكىمەتىنىڭ ەسەبىنەن ايماقتىڭ مەكتەپ ءبىتىرۋشى تۇلەكتەرى ماسكەۋ مەن سانكت-پەتەربۋرگتىڭ ۇزدىك تەحنيكالىق جوعارى وقۋ ورىندارىنا وقۋعا جىبەرىلۋدە. العاشقى 75 تۇلەكتىڭ 62-ءسى ديپلومدارىن الىپ, ەلگە ورالسا, 13 تۇلەك ماگيستراتۋرادا وقۋلارىن جالعاستىرادى. ولاردى جۇمىسپەن قامتۋ ماسەلەسى قاراستىرىلۋدا.
- وبلىستىڭ بىرقاتار كاسىپورىندارى تۇلەكتەردى جۇمىسقا قابىلداۋعا دايىن. مىسالى, «قازاتومپروم» ۇلتتىق كومپانياسى 11 جاس ماماندى, «گەجۋبا شيەلى تسەمەنت» سەرىكتەستىگى 8 ادامدى جۇمىسقا قابىلداۋدى جوسپارلاپ وتىرسا, «سكز-U» كۇكىرت قىشقىل زاۋىتى, قىزىلوردانىڭ كىشىتوناجدى مۇناي وڭدەۋ زاۋىتى, «كريستالل مەنەدجمەنت» جانە باسقا دا ءىرى كاسىپورىندار تۇلەكتەردى جۇمىسقا الۋعا نيەتتى. بىرقاتار تۇلەكتەر مەملەكەتتىك قىزمەتتىڭ كادرلىق رەزەرۆىنە الىناتىن بولادى, - دەدى وبلىس اكىمى.
تاعى ءبىر جاعىمدى جاڭالىق, كەلەر جىلدان باستاپ م.ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ «كيبەرقاۋىپسىزدىك» جانە «پروتسەستەردى ماتەماتيكالىق مودەلدەۋ» ماماندىقتارى بويىنشا وبلىس جاستارىنا ماگيستراتۋرادا وقۋ ءۇشىن 20 گرانت بولىنەدى.
باقتيار تايجان,
«ەگەمەن قازاقستان»
قىزىلوردا وبلىسى