22 شىلدە مەن 5 تامىز ارالىعىندا استانادا تۇڭعىش رەت حالىقارالىق «CENTRAL ASIAN DANCE FESTIVAL» شەبەرلىك سىنىپتارى فەستيۆالى وتەدى. شارا ۇيىمداستىرۋشىلارى – امەريكا قۇراما شتاتتارىنىڭ استاناداعى ەلشىلىگى مەن قازاق ۇلتتىق حورەوگرافيا اكادەمياسى, دەپ حابارلايدى ەلوردا اكىمدىگىنىڭ رەسمي سايتى.
استانا قالاسىندا العاش رەت وتەتىن «CENTRAL ASIAN DANCE FESTIVAL» شەبەرلىك سىنىپتارى فەستيۆالى تۇرىكمەنستان, تاجىكستان, قىرعىزستان, وزبەكستان جانە قازاقستان سياقتى ورتالىق ازيا ەلدەرىنىڭ تالانتتى بيشىلەرى مەن حورەوگرافتارىنىڭ باسىن بىرىكتىرمەك.
بىرنەشە اي بۇرىن ۇيىمداستىرىلعان بەينە-كاستينگتەن وتكەن بيشىلەر حالىقارالىق دەڭگەيدەگى شارانىڭ قاتىسۋشىلارى اتاندى. وسىلايشا, امەريكا قۇراما شتاتتارىنىڭ استاناداعى ەلشىلىگى بولگەن گرانتتىڭ ارقاسىندا 100 بي شەبەرى ەش اقىسىز سايىسقا تۇسەدى. ولاردىڭ 50-ءى قازاقستان وڭىرلەرىنىڭ, 30-ى استانانىڭ جانە 20-سى ورتالىق ازيا ەلدەرىنىڭ نامىسىن قورعايتىن بولادى.
فەستيۆال اياسىندا, پيلكينگتون كەترين, برەاننا ۋيلليامس سىندى اقش-تىڭ ايگىلى حورەوگرافتارىنىڭ قاتىسۋىمەن وتەتىن ەكى اپتالىق شەبەرلىك سىنىپتارىنىڭ ۇيىمداستىرىلۋى جوسپارلانعان. كاسىپقويلار قاتىسۋشىلار ءۇشىن نەوكلاسسيلىق بالەتتەن, كونتەمپوراريدەن, مودرەننەن, يمپروۆيزاتسيادان, برودۆەيدەن, دجازدان, حيپ-حوپتان, سونىمەن قاتار, ءبيدى سۋرەتكە, بەينەكامەراعا تۇسىرۋدەن, ارت-مەنەدجمەنتتەن سكيلل-اپتار جۇرگىزبەك.
بۇدان بولەك, فەستيۆال قاتىسۋشىلارى نەگىزگى امەريكاندىق بي فورمالارىنوزدەرىنىڭ وقىتۋ باعدارلامالارىنا ەنگىزۋ, ماركەتينگ پەن كوممۋنيكاتسيا سالاسىنا قاتىستى ءبىلىمىن ارتتىرۋ, بۇگىنگى تاڭدا كەز كەلگەن بيزنەستىڭ تابىستى جۇزەگە اسۋىنىڭ ماڭىزدى ماركەتينگتىك بولىگىن قالىپتاستىرۋشى كينو, فوتوسۋرەتتەر مەن زاماناۋي ساندىق ونەرگە ارنالعان قۇرالدارمەن تانىسۋ مۇمكىندىگىن الادى.
ۇيىمداستىرۋشىلاردىڭ اتاپ وتۋىنشە, ەكى اپتاعا سوزىلاتىن شارا مادەنيارالىق ءارى كاسىبي تاجىريبە الماسۋ ىسىنە نەگىز بولىپ, ورتالىق ازيا اۋماعىنداعى نەوكلاسسيكالىق جانە زاماناۋي حورەوگرافيانىڭ دامۋىنا ۇلەسىن قوسپاق.
ايتا كەتەيىك, العاشقى «CENTRAL ASIAN DANCE FESTIVAL» شەبەرلىك سىنىپتارى فەستيۆالى سالتاناتتى تۇردە 22 شىلدەدە قازاق ۇلتتىق حورەوگرافيا اكادەمياسىندا اشىلادى. مەرەكەلىك راسىمگە قر مادەنيەت جانە سپورت ءمينيسترى ارىستانەك مۇحامەدي ۇلى قاتىسادى دەپ كۇتىلۋدە.