مۇحيتتىڭ ارعى جاعىنان جەتكەن ءسۇيىنشى حابار كۇللى قازاقتىڭ ابىرويىن ارتتىردى. قارا دومبىرانى سەرىك ەتكەن «باستاۋ» دۋەتى گولليۆۋد تورىندە وتكەن ايگىلى دۇنيەجۇزىلىك «الەم چەمپيونى» (World championships) بايقاۋىندا توپ جارىپ, التىن مەدالدى قانجىعاسىنا بايلادى.
World championships ونەر بايقاۋى – جىل سايىن گولليۆۋد تورىندە وتەتىن الەمدىك دەڭگەيدەگى اۋقىمدى جوبالاردىڭ ءبىرى. ءوز تاريحىندا 22-ءشى مارتە ۇيىمداستىرىلىپ وتىرعان ونەر دوداسىنىڭ نەگىزگى ۇيىمداستىرۋشىلارى – گولليۆۋدتىق جەرگىلىكتى پروديۋسسەرلىك كومپانيا. قازاقستان اتىنان تۇڭعىش رەت قاتىسىپ وتىرعان «باستاۋ» توبى ايتۋلى جوبادا «اسپاپتىق ورىنداۋ» اتالىمى بويىنشا سايىسقا ءتۇستى. جالپى سانى 72 ەل – كالمار, پالاۋ سياقتى شاعىن ارالداردان باستاپ, اۋستراليا, قىتاي, كانادا, اقش, ەۋروپا, ازيا مەملەكەتتەرى, افريكانىڭ كوپتەگەن ەلدەرى قاتىسقان بايقاۋدىڭ 3 كەزەڭگە سوزىلعان تالابىنان سۇرىنبەي وتكەن قازاقستاندىق ونەر توبىنىڭ قوس ىشەكتەن توگىلگەن كۇمبىر كۇيىنە الەم تامسانىپ, تاڭداي قاقتى.
«بۇل كونكۋرستىڭ جالپى جاس ونەرپازداردىڭ ونەردەگى جولىن اشىپ, جۇلدىزىن جاعۋدا مۇمكىندىگى وتە مول. جوبانىڭ ەرەكشەلىگى سول – ۇيىمداستىرىلۋى مەن ءوتۋ ءتارتىبى كادىمگى سپورت وليمپياداسى سياقتى. تەك بۇل جەردە اركىم سپورت ءتۇرى ەمەس, ونەر ولشەمىندە سايىسقا تۇسەدى. ءتىپتى اشىلۋ ءراسىمىنىڭ ءوزى سپورتتىق وليمپيادادان كەم ەمەس, ءار مەملەكەت ءوز تۋىن جەلبىرەتىپ شىعىپ, ۇلتتىق ونەرىن تانىستىرادى. وكىنىشكە قاراي ءبىزدىڭ ەلدە بۇل بايقاۋ تۋرالى كوپشىلىك بىلە بەرمەيدى. العاش بولىپ «باستاۋ» دۋەتى قاتىسىپ, وزدەرىڭىز كۋا بولعانداي, وتە جوعارى دەڭگەيدە ونەر كورسەتىپ, قازاق مۋزىكاسىن امەريكا اسپانىندا اۋەلەتىپ, تورتكۇل دۇنيەنى تاڭداي قاققىزدى. گولليۆۋد ونەردىڭ شىڭى بولسا, ءبىز سول شىڭدى باعىندىرۋىمىز كەرەك. كەلەسى جىلى بىزگە ۇلكەن مۇمكىندىك تۋىپ وتىر. سەبەبى مۇندا ءار ەلدىڭ ۇلتتىق ديرەكتورى, ۇلتتىق باپكەرى بولادى ەكەن. بيىلدان باستاپ بايقاۋدىڭ باپكەرلىگىنە مەن تاعايىندالىپ, كەلەشەكتە جاقسى جوبالاردى قولعا الۋ جوسپاردا بار. بىزگە ۇيىمداستىرۋشىلار تاراپىنان ۇسىنىس ءتۇستى, الداعى جىلى ماعان تەك دومبىراشىلارمەن عانا ەمەس, وزگە ونەرپازدارمەن قاتىسۋعا رەسمي تۇردە رۇقسات بەرىلدى», دەيدى «باستاۋ» توبىنىڭ پروديۋسەرى الپامىس ءشارىموۆ.
بۇل جەڭىس – قارا دومبىرانى جانىنا سەرىك ەتكەن «باستاۋ» توبىنىڭ العاشقى جەڭىسى ەمەس. بۇعان دەيىن لاتۆيانىڭ استاناسى ريگا قالاسىندا وتكەن ايتۋلى ونەر بايقاۋىندا باس جۇلدەنى ەنشىلەسە, اراعا از عانا ۋاقىت سالىپ يەرۋساليمدە ۇيىمداستىرىلعان «الەم مۋزىكاسى» كونكۋرسىندا دا جەڭىس تۇعىرىنان كورىنگەن دومبىراشىلار دۋەتى الداعى ماقسات پەن جوسپار اۋقىمىن ۇلعايتىپ, مۇحيتتىڭ ارعى جاعىن مويىنداتۋعا بەل شەشە كىرىسكەن بولاتىن. سول ءۇمىت الداماي, مىنە, گولليۆۋدتىڭ ايتۋلى ونەر بايقاۋىنىڭ التىن تۇعىرىنان كورىندى. امەريكا تورىندە قۇرمانعازىنىڭ «اداي», نۇرعيسا تىلەنديەۆتىڭ «بالاميشكا», ولجاس سۇلەيمەنوۆتىڭ «ەۋرازيا», تەمىرلان ولجابايدىڭ «باستاۋ» جانە وزگە دە حالىق كۇيلەرىنەن پوپۋري ورىنداپ, ۇلتتىق مۋزىكانىڭ قۇنارلى ءۇنىن جاھانعا پاش ەتتى. توپ پروديۋسەرى الپامىس ءشارىموۆتىڭ ايتۋىنشا, قازاقى ءۇن تابيعاتىنا تاڭ قالماعان مامان كەمدە-كەم.
اتالعان بايقاۋدا ءار مەملەكەت ونەردىڭ سان ءتۇرلى جانرى بويىنشا سايىسقا ءتۇسىپ, باقتارىن سىنادى. ماسەلەن, بيىلعى دودادا قازاقستان «اسپاپتا ورىنداۋ» اتالىمى بويىنشا قاتىسسا, الەمنىڭ تۇكپىر-تۇكپىرىنەن جينالعان وزگە قاتىسۋشىلار ۆوكال, بي, مودەل, اكتەرلىك شەبەرلىك, تسيرك ونەرى سياقتى ءتۇرلى جانر بويىنشا باسەكەگە ءتۇستى.
«جالپى, ءبىز ءۇشىن ەڭ باستى قولداۋ وسى بايقاۋدىڭ الدىندا پرەزيدەنتتىڭ شىلدەنىڭ ءبىرىنشى دەمالىسىن «ۇلتتىق دومبىرا كۇنى» دەپ جاريالاۋى بولدى. قولىمىزعا ۇستاعان اسپابىمىزدىڭ ءوز مەرەكەسىنىڭ, ءوز كۇنى بولۋى جىگىتتەر ءۇشىن دە, مەن ءۇشىن دە ۇلكەن موتيۆاتسيا بولدى. ودان كەيىن بىزگە قاي كەزدە دە قولداۋ ءبىلدىرىپ, جاناشىرلىق كورسەتىپ جۇرەتىن قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجاەۆاعا العىس ايتامىز. جىگىتتەرىمىز وسى ءبىلىم ورداسىندا ءبىلىم الادى. ال ول كىسى ناعىز ونەر جاناشىرى, ونەرگە قۇلشىنىس بىلدىرگەندەرگە ءاردايىم قولداۋ كورسەتۋگە ءازىر» دەپ توپ جەتەكشىسى تۋعان ەلىنە دە تاۋداي العىسىن جەتكىزدى.
راسىمەن دە, قازاقتىڭ وزىنە عانا ءتان ۇلتتىق كولوريتكە باي مۋزىكاسى, ۇلتتىق اسپابىنىڭ, ونەرىنىڭ قۇدىرەتى قاي كەزدە دە ەلىمىزدىڭ بەدەلىن اسقاقتاتىپ, الاش ابرويىن الەم كەڭىستىگىندە مويىنداتىپ كەلەدى. كەزىندە پاريج كوگىن اۋەزدى انىمەن تاڭداي قاققىزعان امىرەدەن باستاپ, قۇرماعازى كۇيىمەن جاھاندىق جاڭالىققا اينالعان بۇگىنگى «باستاۋ» دۋەتىنىڭ گولليۆۋدتاعى ايتۋلى جەڭىسى شىن مانىندە تۇتاستاي ۇلتتىڭ ابىرويى, بەدەلى ەكەنى ءسوزسىز. كۇنى كەشە دومبىرا كۇنىنىڭ جالپى ۇلتتىق مەرەكە رەتىندە تويلانۋىنىڭ ءوزى دە قازاقتىڭ ءتول ونەرىنىڭ قاي كەزدە دە كوركەمدىك دەڭگەيىنىڭ جوعارى, ساپالىق مازمۇنىنىڭ سان تاراپتى ەكەندىگىن ايگىلەسە كەرەك.
نازەركە جۇماباي, «ەگەمەن قازاقستان»