الماتىلىق شەبەر بالالار ۇيىندە تاربيەلەنىپ جاتقان 30 جەتكىنشەككە دومبىرا سىيلادى.
سۋ جاڭا اسپاپقا قارىق بولعان بۇلدىرشىندەر بالالار ۇيىندە قۇرىلعان دومبىرا ءانسامبلىنىڭ بەلدى مۇشەلەرى. ولاردىڭ كەيبىرى بويىندا تۋا ءبىتتى كەمىستىگى بار بالالار. ناعىز شەبەردىڭ قولىنان شىققان ساپاسى جوعارى دومبىراعا قول جەتكىزگەن بۇلدىرشىندەردىڭ قۋانىشىندا شەك جوق. ءوزىمىزدىڭ جەكە دومبىرامىزدىڭ بولعانى بوس ۋاقىتىمىزدى ءتيىمدى وتكىزىپ, شىعارماشىلىقپەن ەركىن اينالىسۋعا جول اشىپ وتىر دەيدى, جاس ونەرپازدار.
– حالقىمىزدىڭ ءتول مادەنيەتى دومبىرادان باستاۋ الادى. ءوزىمىزدىڭ بايلىعىمىز, قازىنامىز, حالىقتىڭ ارمان تىلەگى, كوڭىل-كۇيى وسى دومبىرا ارقىلى بەينەلەنىپ وتىرادى. دومبىرانىڭ قوڭىر ۇنىمەن وسكەن بالا رۋحاني قۋاتى مىقتى ازامات بولىپ قالىپتاسادى. ەڭ الدىمەن وسى ماقساتتى نىسانعا الدىق جانە بۇل ءىسىمىزدى ەلباسىنىڭ «رۋحاني جاڭعىرۋ» باعدارلاماسىنا قوسقان از دا بولسا ءوز ۇلەسىمىز دەپ ەسەپتەيمىز, – دەيدى ۇلتتىق بۇيىمداردى ناسيحاتتاۋشى شەبەر سالتانات ءومىرالى.
بۇلدىرشىندەرگە دومبىرا ۇلەستىرۋ ءراسىمى قالالىق قولونەر شەبەرلەرى ۇيىمداستىرعان ۇلتتىق بۇيىمدار كورمەسىنە ۇلاستى. مۇندا شەبەرلەر سۇيەكتەن, اعاشتان, اسىقتان, تەرىدەن جاسالعان ءتۇرلى قولونەر بۇيىمدارىن ۇسىنىپ, ولاردىڭ تاريحى تۋرالى اڭگىمەلەدى. ءبىر قۋانتارلىعى سول, ۇلت مۇراسىن ناسيحاتتاۋشىلار دومبىراعا قىزىعۋشىلىعى بار زەرەك بالالار بولسا مۇنداي كادە سىيلاردى ءالى دە تەگىن تاراتۋعا دايىن ەكەندىكتەرىن ايتادى.
ارمان وكتيابر,
«ەگەمەن قازاقستان»
الماتى