«قازترانسويل» اق استانانىڭ 20 جىلدىق مەرەيتويىنا ارناپ, قالا تۇرعىندارى مەن قوناقتارىنا ەرەكشە ەتنواۋىلدى سىيعا تارتتى. «رۋحاني جاڭعىرۋ» باعدارلاماسى اياسىندا ۇيىمداستىرىلعان ەتنواۋىل بۇگىنىمىز بەن وتكەنىمىزدەن سىر شەرتەدى. كومپانيانىڭ مەرەكەگە ارنالعان سىيى مۇنىمەن شەكتەلمەي, وسى كۇندەرى ەلىمىزدىڭ الەۋمەتتىك وسال توپتارى ءۇشىن قايىرىمدىلىق مارافونى وتكىزىلدى.
جالپى 5 كۇنگە سوزىلعان ەتنواۋىل جۇمىسىن 30 مىڭعا جۋىق ادام تاماشالادى. ولاردىڭ ىشىندە الىس-جاقىن شەتەلدەردەن, رەسەيدەن, قىتايدان, يسپانيادان كەلگەن قوناقتار دا بار. ەتنواۋىل استانا قالاسى اكىمىنىڭ ورىنباسارى ەرمەك امانشاەۆتىڭ, «قازمۇنايگاز» كومپانياسىنىڭ مۇنايدى تاسىمالداۋ جونىندەگى باسقارۋشى ديرەكتورى نۇرتاس شمانوۆتىڭ, «قازترانسويل» اق باس ديرەكتورى ديماش دوسانوۆتىڭ, شىعارماشىلىق ۇجىمدار مەن ورىنداۋشىلاردىڭ قاتىسۋىمەن 3 شىلدە كۇنى اشىلدى. جالپى ەرەكشە اۋىل جۇمىسىن ۇيىمداستىرۋعا «قازترانسويل» كومپانياسىنىڭ 150-گە جۋىق قىزمەتكەرى اتسالىستى.
ەتنواۋىل كەشەنى كومپانيانىڭ وندىرىستىك نىساندارى ورنالاسقان ەلىمىزدىڭ 11 ءوڭىرى ۇسىنعان سان ءتۇرلى ەكسپوناتتارمەن جابدىقتالدى. سونىڭ ىشىندە ماڭعىستاۋدان كەلگەن كومپانيا وكىلدەرى اتالعان ءوڭىردىڭ تاريحي جەرلەرىنە ساياحاتتاۋعا مۇمكىندىك بەرسە, اقتوبەلىك مۇنايشىلار جابدىقتاعان «مۇعالجار» ەلىمىزدىڭ ۇلتتىق كيىمدەرى مەن قازاقستان حالقى اسسامبلەياسىنىڭ قىزمەتىن كورسەتتى.
سونداي-اق قاراعاندى مۇناي قۇبىرى باسقارماسى ۇيىمداستىرعان «سارىارقا» كيىز ۇيىندە ەلباسى نۇرسۇلتان نازارباەۆتىڭ ەڭبەك جولى, ساياساتتاعى العاشقى قادامدارى مەن قولدانعان زاتتارى تۋرالى قۇندى دەرەكتەر قويىلعان. ال استانانىڭ بۇگىنگى جارقىن كەلبەتى مەن اسەم عيماراتتارى پاۆلودارلىق مۇنايشىلار جابدىقتاعان «باياناۋىل» كيىز ۇيىندە كورىنىس تاپتى.
سونىمەن قاتار شىمكەنتتىك مۇناي قۇبىرى باسقارماسىنىڭ قىزمەتكەرلەرى كەلۋشىلەردى ۇلى جىبەك جولى تۋرالى, سونداي-اق وڭىردەگى تاريحي جانە ەجەلگى ەسكەرتكىشتەر تۋرالى اقپاراتتارمەن تانىستىردى. ونىڭ ىشىندە قوجا احمەت ياساۋي جانە ارىستان باب كەسەنەلەرى, ەجەلگى قالالار وتىرار جانە تۇركىستان تۋرالى دەرەكتەر بار. ال « ۇلىتاۋ» دەپ اتالاتىن جەزقازعان ءوڭىرىنىڭ مۇنايشىلار جابدىقتاعان كيىز ءۇيى التىن-ەمەل, ىلە الاتاۋى, شارىن, بۋراباي, قارقارالى سياقتى ۇلتتىق پاركتەردىڭ تاريحى تۋرالى سىر شەرتەدى.
ال ماڭعىستاۋ مۇناي قۇبىرى باسقارماسى كادر قىزمەتىنىڭ باستىعى دانيار شامجانوۆ ماڭعىستاۋ وبلىسى ەتنواۋىلدى «اسپان استىنداعى مۇراجاي» دەگەن تاقىرىپ اياسىندا كيىز ءۇيدى جابدىقتاعانىن اتاپ ءوتتى. «قازاقتىڭ قاسيەتتى جەرلەرى مەن ءوڭىر تاريحىن تەرەڭنەن تۇسىندىرەتىن ەكسپوناتتارمەن جابدىقتادىق. شەرقالا تاۋى مەن تۇپقاراعان تۇبەگى, ەلىمىزدىڭ 1000 تەڭگەسىندە بەينەلەنگەن بوزجىرا تاۋىنىڭ ماكەتتەرىمەن جابدىقتادىق», دەدى ول.
شارانى اشقان «قازمۇنايگاز» كومپانياسىنىڭ مۇنايدى تاسىمالداۋ جونىندەگى باسقارۋشى ديرەكتورى نۇرتاس شمانوۆ جينالعانداردى استانانىڭ 20 جىلدىق مەرەيتويىمەن قۇتتىقتادى. «وسى شارانى وتكىزۋگە اتسالىسقان بارلىق كومپانيا قىزمەتكەرلەرىنە العىس بىلدىرەمىن. شارا بارىسىندا قازاقستاننىڭ 11 ايماعىنان كەلگەن قىزمەتكەرلەر ەتنواۋىل كەشەنىندە وبلىستاردىڭ مادەني مۇرالارى تۋرالى تەرەڭنەن اڭگىمەلەپ, كەلۋشىلەردى وڭىرلەردىڭ تاريحىمەن تانىستىردى. سونداي-اق 500-گە جۋىق الەۋمەتتىك تۇرعىدان وسال توپتار ءۇشىن ارنايى قايىرىمدىلىق جانە مادەني ءىس-شارالار وتكىزدى. مۇنىڭ بارلىعى دا كومپانيا قىزمەتكەرلەرىنىڭ وتانسۇيگىشتىك قاسيەتى مەن ازاماتتىق پارىزىنا بەي-جاي قارامايتىنىن كورسەتەدى», دەدى ن. شمانوۆ.
ءوز كەزەگىندە ءسوز العان «قازترانسويل» اق باس ديرەكتورىنىڭ ورىنباسارى ءسابيت ارىنوۆ استانانىڭ 20 جىلدىعىمەن جانە «كەڭقياق» مۇناي بەكەتىنىڭ اشىلۋىمەن قۇتتىقتادى. «استانانىڭ 20 جىلدىعى قارساڭىندا, ەلىمىز ءۇشىن ايتۋلى وقيعالاردىڭ ءبىرى «كەڭقياق» باس مۇناي ايداۋ ستانتسياسى قايتا ىسكە قوسىلدى. بۇل ەلىمىزدىڭ قىتايعا مۇناي تاسىمالىن 20 ملن تونناعا دەيىن ارتتىرۋعا مۇمكىندىك بەرەتىن «كەڭقياق-اتىراۋ» مۇناي قۇبىرى جوباسىن جۇزەگە اسىرۋداعى ايشىقتى قادام», دەدى ول.
«قازترانسويل» اق باس ديرەكتورىنىڭ ورىنباسارى شارا تاڭاتاروۆا دا بارشا قاۋىمدى استانانىڭ 20 جىلدىعىمەن قۇتتىقتاپ, ارىپتەستەرىنە ءوز ريزاشىلىعىن ءبىلدىردى. «ەتنواۋىل جوباسى بارشامىزعا ۇلتىمىزدىڭ وتكەنى مەن بۇگىنىنە, تاريحىمىزعا قايتا كوز جۇگىرتۋگە مۇمكىندىك بەردى. وسى ورايدا بارلىق ارىپتەستەرىمدى ەتنواۋىلدىڭ تابىستى جۇمىسىمەن قۇتتىقتاپ, جاڭا جەتىستىكتەر تىلەيمىن», دەدى.
سونداي-اق «قازترانسويل» اق مەرەكە كۇندەرى قايىرىمدىلىقتان دا شەت قالعان جوق. قايىرىمدىلىق شاراسى اياسىندا كەشەنگە از قامتىلعان وتباسىلاردىڭ بالالارى مەن مۇگەدەكتەر, ارداگەرلەر سياقتى جالپى سانى 500-دەن استام ادام قامتىلدى. ارداگەرلەرگە ارنالعان قايىرىمدىلىق اكتسياسىنا 100-دەن اسا ارداگەر قاتىسىپ, وڭىرلەر تاريحىمەن تانىستى.
كەش بارىسىندا «قازترانسويل» اق باسشىلىعى استانا مەرەكەسىنە وراي جاساعان سىي, ەتنواۋىل مەن مەرەكەلىك كونتسەرتتەردى ۇيىمداستىرۋعا اتسالىسقان مۇناي قۇبىرى باسقارمالارى مەن ورتالىق اپپارات دەپارتامەنتتەرى ۇجىمدارىن ماراپاتتادى. گالا-كونتسەرتتە وتاندىق تانىمال انشىلەر ءان شىرقاپ, كەش سوڭى «قازترانسويل» اق شىعارماشىلىق توپتارىنىڭ ونەر كورسەتۋىمەن اياقتالدى.
ءمادينا جالەلقىزى, «ەگەمەن قازاقستان»