وسى جىلى ەلىمىزدىڭ التىن ۆاليۋتا رەزەرۆى ۇلتتىق قوردىڭ قارجىسىن قوسقاندا 40 ملرد دوللارعا جەتتى. بانك جۇيەسىندەگى دەپوزيتتەر 3,5 تريلليون تەڭگەنى قۇرادى. وتاندىق زەينەتاقى قورلارىنداعى سالىمنىڭ ءوسىمى 1,1 تريلليون تەڭگەدەن استى. ەلدەگى ءىجو جان باسىنا شاققاندا 7 مىڭ دوللاردى ەڭسەردى. ەلىمىز كولەمىندە 22,5 ميلليون توننا استىق ورىلدى. بۇل – تاۋەلسىزدىك جىلدارىنداعى رەكوردتىق كورسەتكىش. جىلدىڭ باسىندا جاڭادان ۇكىمەت جاساقتالىپ, پرەمەر-مينيستر كارىم ءماسىموۆ كومانداسى ىسكە كىرىستى.
2007 جىل
12 قاڭتار – مينيسترلەر كابينەتىنىڭ العاشقى وتىرىسى ءوتتى. ۇكىمەت اكىمشىلىك رەفورمانى جالعاستىرۋ, بيۋدجەتتىك جوسپارلاۋ مەن بيۋدجەتارالىق قاتىناستاردى جەتىلدىرۋ, وڭىرلەردى دامىتۋ, باسەكەلەستىكتى قورعاۋ, تۇرعىن ءۇي قۇرىلىسىن دامىتىپ, ينفراقۇرىلىمدى باسقارۋ جانە اگرارلىق جۇيەنى جەتىلدىرۋ, مەملەكەتتىك ءتىلدى دامىتۋ سىندى سەگىز باعىت بويىنشا جۇمىس جوسپارىن ناقتىلادى.
29 قاڭتار – قازاقستان رەسپۋبليكاسىنىڭ پرەزيدەنتى ن.نازارباەۆ گەرمانيا فەدەراتيۆتىك رەسپۋبليكاسىنا رەسمي ساپار جاسادى. ساپار بارىسىندا گفر كانتسلەرى ا.مەركەلمەن كەزدەستى.
13 اقپان – ەلباسى ن.نازارباەۆ استاناداعى بەيبىتشىلىك جانە كەلىسىم سارايىندا ءۇش جىلعا ارنالعان «مادەني مۇرا» مەملەكەتتىك باعدارلاماسىن ىسكە اسىرۋ جونىندەگى قوعامدىق كەڭەستىڭ قورىتىندى وتىرىسىنا قاتىستى.
1 ناۋرىز – سول جاعالاۋدا تۇرعىزىلعان جاڭا قالاعا كوشە اتاۋلارى بەرىلدى. اتاپ ايتقاندا, №1 كوشە «تاۋەلسىزدىك كوشەسى» دەپ اتالسا, №2 كوشە «دوستىق» اتاۋىنا يە بولدى. №12 كوشە «سارايشىق» اتالىپ, №19ا, 33, 35 ءنومىرلى كوشەلەرگە رەت-رەتىمەن «الماتى», «اقمەشىت», «ورىنبور» اتاۋى بەرىلىپ, №19 كوشەگە «سىعاناق», №34 كوشەگە «تۇركىستان», №78 كوشەگە «ساۋران» اتاۋى بۇيىردى.
5 ناۋرىز – اقوردادا نۇرسۇلتان نازارباەۆ قازاقستانعا رەسمي ساپارمەن كەلگەن گرۋزيا باسشىسى ميحايل سااكاشۆيليمەن كەزدەستى.
10 ناۋرىز – ەلباسى حوسني مۇباراكتىڭ شاقىرتۋىمەن مىسىرعا اتتاندى. ساپار بارىسىندا نۇرسۇلتان ءابىش ۇلى سۇلتان بەيبارىس مەشiتiنە بارىپ, اراب مەملەكەتتەرi ليگاسىنىڭ باس حاتشىسى امرو مۇسامەن كەزدەستi.
10 مامىر – رەسەي فەدەراتسياسىنىڭ پرەزيدەنتى ۆلاديمير پۋتين رەسمي ساپارمەن استاناعا كەلدى. ەكى ەل باسشىلارى شاعىن جانە كەڭەيتىلگەن قۇرامدا كەزدەسۋلەر وتكىزىپ, عارىشتى بىرلەسە يگەرۋ, وتىن-ەنەرگەتيكا كەشەنى, يادرولىق ەنەرگەتيكا, كولىك سالالارىندا ەكىجاقتى ىنتىماقتاستىق ماسەلەلەرىن تالقىلادى.
21 مامىر – قازاقستان رەسپۋبليكاسى كونستيتۋتسياسىنا وزگەرىستەر مەن تولىقتىرۋلار ەنگىزىلدى. پرەزيدەنتتىك باسقارۋ مەرزىمى 7 جىلدان 5 جىلعا قىسقارتىلدى. پارلامەنت دەپۋتاتتارىنىڭ سانى 154-كە جەتتى. جەرگىلىكتى جەرلەردەگى ءماسليحاتتاردىڭ ءرولى كۇشەيتىلىپ, ءوزىن-ءوزى باسقارۋ تۇبەگەيلى وزگەرتىلدى, سوت بيلىگى تارماعىنىڭ تاۋەلسىزدىگى نىعايدى, ازاماتتىق قوعامدى دامىتۋعا ايرىقشا نازار اۋدارىلدى.
4 شىلدە – استاناداعى بەيبىتشىلىك جانە كەلىسىم سارايىندا «نۇر وتان» حالىقتىق دەموكراتيالىق پارتياسىنىڭ كەزەكتەن تىس ءحى سەزى ءوتتى.
5 شىلدە – مەملەكەت باسشىسى ن.نازارباەۆ استانا قالاسى يندۋستريالىق پاركى اۋماعىندا سالىناتىن زاۋىت قۇرىلىسىنىڭ ىرگەتاسىنا كاپسۋلا قويىپ, سەرپىندى جوبانىڭ تۇساۋىن كەستى. سونىمەن قاتار وسى كۇنى ەلوردادا داڭقتى قولباسشى بوگەنباي باتىردىڭ ەسكەرتكىشى اشىلدى.
6 شىلدە – ەلوردا تويىنا تارتۋ رەتىندە الەمدىك ستاندارتقا ساي «قازانات» اتشابارى اشىلدى. ەۋروپالىق ۇلگىدەگى يپپودروم 2600 كورەرمەنگە ارنالسا, جارىس وتكىزىلەتىن الاڭىنىڭ ۇزىندىعى – 1800 مەتر.
15 تامىز – بىشكەكتە شانحاي ىنتىماقتاستىق ۇيىمىنا مۇشە ەلدەر مەملەكەت باسشىلارى كەڭەسىنىڭ كەزەكتى جەتىنشى وتىرىسى ءوتتى.
18 تامىز – پارلامەنت ءماجىلىسى دەپۋتاتتارىنىڭ سايلاۋى جاڭا كونستيتۋتسيا قابىلدانۋىنا وراي تۇڭعىش رەت پارتيالىق ءتىزىم بويىنشا ءوتتى. سايلاۋ قورىتىندىسى بويىنشا سايلاۋشىلاردىڭ 88 پايىزدان استام داۋىسىن العان «نۇر وتان» پارتياسى جەڭىسكە جەتتى.
24 قىركۇيەك – پرەزيدەنت ن.ءا.نازارباەۆ بىرىككەن ۇلتتار ۇيىمى باس اسسامبلەياسىنىڭ 62-ءشى سەسسياسىندا ءسوز سويلەدى.
25 قازان – ەلباسى ن.نازارباەۆتىڭ قاتىسۋىمەن استانادا MEGA ساۋدا-ويىن-ساۋىق ورتالىعى اشىلدى. ورتالىقتىڭ جالپى اۋماعى – 32 مىڭ شارشى مەتر. ونىڭ قۇرىلىسىنا 2 ميلليارد 201 ميلليون تەڭگە جۇمسالدى.
16 قاراشا – يسپانيا استاناسى مادريدتە وتكەن ەۋروپاداعى قاۋىپسىزدىك جانە ىنتىماقتاستىق ۇيىمىنا مۇشە ەلدەردىڭ وتىرىسىندا قازاقستان رەسپۋبليكاسىنىڭ 2010 جىلى اتالعان ۇيىمعا توراعالىق ەتۋى ءبىراۋىزدان قولداۋ تاپتى.
20 جەلتوقسان – پرەزيدەنت نۇرسۇلتان نازارباەۆ جۇمىس بابىنداعى ساپارمەن ماسكەۋ قالاسىنا باردى. قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ پەن رەسەي فەدەراتسياسىنىڭ پرەزيدەنتى ۆلاديمير پۋتين كەزدەسىپ, ەكى ەلدىڭ ستراتەگيالىق ارىپتەستىگىن جانە ينتەگراتسيالىق ىنتىماقتاستىعىن دامىتۋعا قاتىستى بىرقاتار وزەكتى ماسەلەلەردى تالقىلادى.
دايىنداعان بەكەن قايرات ۇلى
«ەگەمەن قازاقستان»