استانادا قازاقستان حالقى اسسامبلەياسى «جاڭعىرۋ جولى» رەسپۋبليكالىق جاستار قوزعالىسىنىڭ ۇيىمداستىرۋىمەن «جاستار سينەرگياسى – بىرلىك ەنەرگياسى» فورۋمى ءوتتى.
قازاقستان حالقى اسسامبلەياسىنىڭ XXVI سەسسياسىندا ەلباسى نۇرسۇلتان نازارباەۆ: «اسسامبلەيانىڭ «جاڭعىرۋ جولى» اتتى جاڭا جاستار قوزعالىسى جاستاردى جاڭعىرۋ اياسىندا بىرىكتىرۋى كەرەك. كۇش-جىگەرىمىزدى جاستاردىڭ وزەكتى ستارتاپتارىن قولداۋعا باعىتتاۋ قاجەت», دەگەن بولاتىن. وسى تاپسىرمانى ورىنداۋدى كوزدەگەن فورۋمدا ەلىمىزدىڭ ءار وڭىرىنەن كەلگەن جاستاردىڭ 50-گە تارتا ستارتاپ جوباسى تانىستىرىلدى. وعان قحا جانە وعان قاراستى «جاڭعىرۋ جولى» قوزعالىسىنىڭ جاس مۇشەلەرىنەن قۇرالعان 200-گە جۋىق دەلەگات قاتىستى.
فورۋمنىڭ «تابىستى جوبالار شەرۋى» الاڭىندا قازىرگى ۋاقىتتا جوبالارىمەن جۇمىس ىستەپ جاتقان «بايسەركە-اگرو» اگروحولدينگى قۇرىلتايشىسىنىڭ كەڭەسشىسى ك.پاۆلوۆ زاماناۋي اۋىل شارۋاشىلىعىندا ورگانيكالىق ونىمدەر وندىرۋگە قولدانىلىپ وتىرعان يننوۆاتسيالىق تەحنولوگيالارىن تانىستىرسا, جوبانى ازىرلەۋشى د.كورەپانوۆ «اۋىل – مەملەكەت تىرەگى» تاقىرىبىنداعى تانىستىرىلىمىن وتكىزدى. «جاڭا شەشىم» ءبىلىم قورىنىڭ باس ديرەكتورى ۆ.كيم بالالارعا ءتىل ۇيرەتۋدىڭ جاڭا ادىستەمەلەرىمەن بولىسسە, «قازاقستاننىڭ 100 جاڭا ەسىمى» جوباسىنىڭ جەڭىمپازى م.بەكتۇرعانوۆ بيونيكالىق پروتەزدەردىڭ جاسالۋ تاريحى, تابىسقا جەتۋ جولىنداعى قيىندىقتارى مەن جەتىستىكتەرى جايلى اڭگىمەلەدى. «Business camp» الاڭىندا «قازاقستاننىڭ 100 جاڭا ەسىمى» جوباسىنىڭ جەڭىمپازى, كاسىپكەر-مەتسەنات يسلامبەك سالجانوۆ بيزنەستىڭ الەۋمەتتىك جاۋاپكەرشىلىگى تاقىرىبىندا شەبەرلىك سىنىبىن وتكىزسە, «جاڭا يدەيالار سينەرگياسى» الاڭىندا ستارتاپ جوبالاردىڭ كورمەسى ءوتتى. قاتىسۋشىلار جوبا اۆتورلارىنا سۇراقتار قويىپ, تاقىرىپتى كەڭىنەن تالقىلادى.
«سينەرگيا فورۋمى ەلباسىنىڭ باستاماسىنا سايكەس جاستاردىڭ تىڭ يدەياسى مەن ستارتاپتارىن قولداۋ ماقساتىندا ۇيىمداستىرىلۋدا. بۇگىن ۇزدىك دەپ تانىلعان ستارتاپ جوبالاردىڭ اۆتورلارى ءوز يدەيالارىن ىسكە اسىرۋعا مۇمكىندىك الادى. سول ارقىلى «رۋحاني جاڭعىرۋ» باعدارلاماسىنىڭ جۇزەگە اسۋىنا اتسالىسامىز», دەدى قحا توراعاسىنىڭ ورىنباسارى – حاتشىلىق مەڭگەرۋشىسى لەونيد پروكوپەنكو.
«جاڭعىرۋ جولى» رەسپۋبليكالىق جاستار قوزعالىسىنىڭ توراعاسى ماكسيم سپوتكايدىڭ ايتۋىنشا, بۇل فورۋم وتكەن ايدا الماتى قالاسىندا باستالعان ەكەن. «وندا ءتورت جوباعا ءۇش ميلليون تەڭگە بولىنگەن بولاتىن. بۇگىن ءبىز IT, قولونەر, «جاسىل» ەنەرگيا, ءبىلىم الۋ جانە ت.ب. باعىتتاعى 50-گە تارتا جوبانى تانىستىرىپ, 6 اتالىم بويىنشا ماراپاتتاپ وتىرمىز», دەدى م.سپوتكاي.
اتاپ ايتقاندا, «بيزنەس جانە رۋحاني قوعام» نوميناتسياسى بويىنشا «ارمان – بولاشاقتىڭ مەكتەبى» جوباسى باۋىرجان سالىقوۆ ماراپاتتالسا, «Maria system Ide» جوباسىن جاساعان تيمۋر رىسبەكوۆ «بولاشاققا باعدار» نوميناتسياسىن جەڭىپ الدى. «Green Startap» نوميناتسياسى «سقو-داعى دارىلىك وسىمدىكتەر جيىنتىعى جانە قازاقستاننىڭ فارماتسەۆتيكالىق كومپانيالارى ءۇشىن شيكىزات تۇرىندە دايىنداۋ» اتتى جوبانى ازىرلەگەن اينۇر ابىلتاەۆاعا بۇيىرسا, ديانا ارالباەۆا «گوفروكارتون» جوباسىمەن «ەڭ كرەاتيۆتى يدەيا» نوميناتسياسىنا يە بولدى. سونداي-اق «ەتنو قۇرىلىمداۋشى» جوباسىنىڭ اۆتورى ايدار بەكسۇلتانوۆ «تۋعان جەر» نوميناتسياسىن ەنشىلەسە, «ۇكىلى ءۇمىت» نوميناتسياسى «بىزبەن بىرگە وقيمىز» جوباسىن جاساعان ايبەك يداياتوۆ پەن سامال مۇحتاروۆاعا بۇيىردى. ستارتاپ جەڭىمپازدارى مەن قاتىسۋشىلارى ديپلومدارمەن, باعالى سىيلىقتارمەن ماراپاتتالدى.
«ستارتاپ جوبالار بويىنشا جاستاردىڭ اراسىندا وتە جاڭا, وتە قىزىقتى يدەيالاردى كورىپ وتىرعانىما وتە قۋانىشتىمىن. ۇسىنىلعان بارلىق جوبالار قاجەتتى قولداۋلارعا يە بولىپ جاتىر. مۇنى كورگەن وزگە جاستاردىڭ دا تالپىنارى ءسوزسىز. ءبىزدىڭ ساراپشىلار كەڭەسى قوعام قايراتكەرلەرى مەن كاسىپكەرلەردەن قۇرالعاندىقتان بۇگىنگى جەڭىس ءوز قاھارماندارىن تاپتى دەپ سەنەمىن», دەدى قحا استانا قالاسى تۇركى ەتنو-مادەني ورتالىعىنىڭ توراعاسى اسكەر پيريەۆ.
فورۋم سوڭىندا ەسترادا جۇلدىزدارىنىڭ قاتىسۋىمەن مەرەكەلىك كونتسەرت قويىلدى. سونداي-اق قوناقتار «نۇر الەم» بولاشاق مۋزەيىن, قارۋلى كۇشتەر ۇلتتىق اسكەري-پاتريوتتىق ورتالىعىن, «استانا وپەرا» تەاترىن تاماشالاپ, «اللانىڭ گ ۇلى» اتتى جاڭا مەشىتتە بولدى.
مايگۇل سۇلتان,
«ەگەمەن قازاقستان»