استاناداعى ۇلتتىق اكادەميالىق كىتاپحانادا «Egemen Qazaqstan» گازەتى جاريالاعان كاريكاتۋرا بايقاۋىنىڭ جەڭىمپازدارىن ماراپاتتاۋ ءراسىمى ءوتتى.
«استانا ايشىقتارى» تاقىرىبىمەن كاريكاتۋرا كونكۋرسىن وتكىزگەن ەدىك. شىنىن ايتۋ كەرەك, ءبىز بۇعان كوپ ويلاندىق. سەبەبى, كاريكاتۋراعا بايلانىستى ەلىمىزدە ءىرى كونكۋرستار 20 جىلدان اسا ۋاقىت بويى وتپەگەن ەكەن. ەڭ سوڭعى رەت 1994 جىلى ءوتىپتى. «نۇر وتان» پارتياسى وتكىزەتىن جەمقورلىققا بايلانىستى جانە باسقا دا شاعىن كونكۋرستار بار. بىزدە كاريكاتۋرانىڭ جاقسى مەكتەبى بار. سول مەكتەپتىڭ وكىلدەرى حالىقارالىق ۇلكەن كونكۋرستاردان جۇلدە الىپ ءجۇر. سوندىقتان ءبىز وسى يگى ءداستۇردى قايتا جاڭعىرتساق دەپ ويلادىق», - دەدى «ەگەمەن قازاقستان» گازەتىنىڭ باسقارما توراعاسى دارحان قىدىرالى.
گازەت باسشىسىنىڭ ايتۋىنشا, كاريكاتۋرانى سىن دەپ قابىلدايتىندار دا بار. سولاردىڭ تاراپىنان استانانىڭ 20 جىلدىق مەرەكەسى قارساڭىندا سىناعانىمىز قالاي بولار ەكەن دەۋشىلەر دە تابىلعان.
«بىراق, ءبىز وعان باتىل باردىق. سەبەبى كاريكاتۋرا تەك قانا ءبىر جاقتى سىن ەمەس. ول ۇلكەن ونەر, استارلى ءسوز, تاپقىر شەشىم, ۇتىمدى وي, ساراپتا مەن سىننىڭ توعىسى. كەيدە كاريكاتۋرانىڭ ۇلكەن ماقالانىڭ, كىتاپتىڭ جۇگىن ارقالاپ تۇراتىن تۇستارى بولادى. ۇلكەن وركەنيەتتى ەلدەردە قازىر ءباسپاسوز كاريكاتۋراسىز شىقپايدى. بۇل - ءباسپاسوزدىڭ ۇلكەن ءبىر بولشەگى, ءىرى سالاسى. سوندىقتا بۇل سالانى دا جانداندىرعىمىز كەلەدى», - دەدى دارحان قىدىرالى.
كونكۋرسقا ەلىمىزدىڭ تۇپكىر-تۇپكىرىنەن 20-دان استام ۇمىتكەردەن 30-دان اسا جۇمىس كەلىپ تۇسكەن. ال كوميسسيا شەشىمىمەن ءبىرىنشى ورىن الماتىلىق عالىم سماعۇل ۇلىنا بەرىلدى. وسكەمەندىك مەرەي قاينار ۇلى - ەكىنشى, ال اقتوبەلىك قايرات بالتاباي ۇلى ءۇشىنشى ورىن الدى. سونىمەن قاتار تارازدىق الميرا وماروۆاعا ىنتالاندىرۋ سىيلىعى بەرىلدى.