جاعىمدى جاڭالىق جۇرەگىمىزگە جىلى ۇيالاپ, جانىمىزدى جادىراتتى. ەلباسىمىزدىڭ شەشىمىمەن شىلدەنىڭ ءبىرىنشى جەكسەنبىسى ۇلتتىق دومبىرا كۇنى بولىپ جاريالاندى. جىل سايىن اتاپ وتىلمەك بۇل مەرەكەلىك كۇننىڭ ۇلتتىق رۋحانياتىمىزعا قوسار ۇلەسى سالماقتى بولماق.
دومبىرا – قازاقتىڭ كيەسى, قاسيەتى, قازىناسى. قازاق پەن دومبىرا ەگىز ۇعىم عوي! كۇنى كەشەگە دەيىن ءار ءۇيدىڭ تورىندە ءىلۋلى تۇراتىن ۇلتتىق اسپابىمىزدىڭ كۇمبىرلەگەن ءۇنى بۇگىندە الىستاپ بارا جاتقانداي ەدى. تەلەارنالاردان دومبىرانىڭ داۋىسىن ەستۋ مۇڭعا اينالعانى بىلاي تۇرسىن (ونىڭ ورنىن سالماقسىز باعدارلامالاردىڭ جاۋلاپ العانى شىندىق), شىلدەحانا, بەسىك تويى, تۇساۋكەسەر, ءتىلاشار, بەتاشارلارىمىز داڭعىرلاعان ەستارادا اۋەنىنە بايلانبادى ما؟ دومبىرامەن اۋەلەتە شىرقالىپ, تيەسىلى سىيلىق يەسىن تاباتىن «تويباستار» ءداستۇرىنىڭ ءتۇر-سيپاتى مۇلدە وزگەرگەنىنە ءبارىمىز كۋامىز. قۇرمەتتى قوناق كەلگەندە «اۋىلدىڭ التى اۋىزى» ايتىلىپ, «قوناقكادەمەن» جالعاسا انمەن ورىلەتىن وتىرىستار كوزدەن بۇل-بۇل ۇشقالى قاشان؟! اراسىندا ۇلكەندەردىڭ ادەمى اڭگىمەلەرى تىڭدالاتىن. قازىر شە؟ ءىشىپ-جەپ بولعان سوڭ, باس سالىپ بي بيلەۋ- گە كوشەدى. جاس تا, جاسامىس تا سەكەڭدەپ, يۋ-قيۋ مۋزىكا, قىزىق دەگەن وسى دەپ تۇسىنەتىن بولدىق. ىلگەرىدەگى قۇدالاردى اۋدەم جەردەن ارناۋ ايتىپ قارسى الىپ, كۇمبىر-كۇمبىر كۇي تارتىپ, شىعارىپ سالار كەز قايدا, شىركىن؟! دومبىرادا ايتىلاتىن ءار ءاننىڭ ءسوزى قانداي, سازى قانداي؟! تىڭداپ وتىرعانىڭدا ءبىر كۇرسىنتىپ, ءبىر مۇڭايتىپ, مىڭ ءتۇرلى اسەرگە بولەيتىنى بار. ونىڭ قۇدىرەتتى ءۇنىن ەستىگەنىڭە شۇكىرلىك ەتەسىڭ. دومبىرانىڭ يەسى قازاق بولىپ تۋىلعانىڭا تاۋبە دەيسىڭ, باسقا ەمەس.
دومبىرا كۇنىنىڭ بەلگىلەنۋى جايدان-جاي ەمەس. بۇل رۋحاني جاڭعىرۋ باعىتىنداعى ەڭ سۇبەلى تىرلىكتىڭ ءبىرى بولماق. وسى كۇننىڭ اياسىندا ۇلتتىق اسپابىمىزدى ۇلىقتاۋ ماقساتىندا تىڭ باستامالار بوي كوتەرىپ, كوپتەن بەرى قولداۋ تاپپاي جۇرگەن يگى دۇنيەلەر قايتا جاڭعىرۋى عاجاپ ەمەس. كوپ نارسەدەن ءۇمىتتىمىز. كوك ساندىقتان دومبىرا ۇنىمەن استاستىرىلعان سالماقتى دۇنيەلەردىڭ كوپتەپ جارىق كورۋىن جانىمىز قالايدى. ەڭ دۇرىسى, ناۋقانشىلىقتان ادا, اسىرەقىزىل تەز وڭارلىق تىرلىك ەمەس, ءوزىنىڭ قوڭىر ءۇنى مەن قوڭىر بولمىسىنا ساي, ۇلتىمىزدىڭ جادىن قايتا ءبىر جاڭعىرتاتىنداي كۇن بولسا ەكەن دەيمىز.
بيىلعى شىلدە ايىنىڭ ءبىرىنشى جەكسەنبىسى 1 شىلدەگە تۋرا كەلىپ تۇر. «جازدىكۇن شىلدە بولعاندا...» دەپ اباي اتامىز ايتقانداي, «كوكوراي شالعىن, بايشەشەك, ۇزارىپ, ءوسىپ, تولعاندا» بۇكىل قازاق دالاسى كۇمبىر-كۇمبىر كۇي توككەي, كوكتەگى كۇن نۇر توككەي, دومبىراسىن قولعا العاي, اۋەلەتە ءان سالعاي... «داريعا, دومبىرامدى بەرشى ماعان, جانىما كەلشى جارىم, كەلشى بالام...» دەپ مۇقاعاليشا تولعايىق, «ناعىز قازاق قازاق ەمەس, ناعىز قازاق – دومبىرا!» دەپ قادىرشا قايىرايىق! ۇلى ۇلتتىڭ بالاسى, ۇلىقتا دومبىراڭدى!
زەبەركۇل شارداربەكوۆا