استاناداعى «مارريوتت» قوناقۇيىندە قازاقستاندىق-اۋستريالىق ايماقتار فورۋمى اشىلدى.
فورۋمدى قازاقستاننىڭ ەنەرگەتيكا مينيسترلىگى, سىرتقى ىستەر مينيسترلىگى, استانا قالالىق اكىمدىگى جانە Avantage AUSTRIA Almaty (اۋستريا ەلشىلىگىنىڭ ساۋدا ءبولىمى) ۇيىمداستىردى. وعان ەنەرگەتيكا ءمينيسترىنىڭ ءبىرىنشى ورىنباسارى ماحامبەت دوسمۇحامبەتوۆ, سىرتقى ىستەر ۆيتسە-ءمينيسترى ەرجان اشىقباەۆ, اۋستريانىڭ قازاقستانداعى ەلشىسى گەرحارد سايللەر, قازاقستاننىڭ اۋسترياداعى توتەنشە جانە وكىلەتتى ەلشىسى قايرات سارىباي جانە باسقالار قاتىستى.
فورۋمدا كوتەرىلگەن نەگىزگى تاقىرىپ – قازاقستاننىڭ تۇراقتى دامۋىنا سەپتىگىن تيگىزەتىن اۋستريالىق «جاسىل» تەحنولوگيالاردى بەلسەندى قولدانىسقا ەنگىزۋ. استاناعا كەلگەن 16 كومپانيا الەمدىك رىنوكتا اۋستريانى جاڭعىرمالى ەنەرگيا كوزدەرى سەكتورىن «جاسىل» قۇرىلىس, قالدىقتاردى باسقارۋ, سۋدى تازالاۋ جانە «اقىلدى قالا» سالالارى بويىنشا تانىتۋدا. سونىڭ ىشىندە ەكەۋى قازاقستاندا دا ءوز قولتاڭباسىن قالدىرىپ ۇلگەردى. اتاپ ايتقاندا, استانادا جاڭادان اشىلعان رىسكەلدى قاجى مەشىتىنىڭ جوباسىن وسى ەلدىڭ Weissenseer GmbH جانە Neubau GmbH كومپانيالارى جاساعان. ول مۇلدە ءداستۇرلى ەنەرگيا كوزىن قولدانبايتىن الەمدەگى ءبىرىنشى مەشىت بولىپ تابىلادى. «ايماقتار فورۋمىنىڭ استانادا ءوتۋىنىڭ ءوز ءمانى بار. ءبىز ەكسپو-2017 حالىقارالىق كورمەسىنە تابىستى قاتىستىق, وسى شارا سول كورمەنىڭ زاڭدى جالعاسى ىسپەتتەس, قازاق بيزنەسمەندەرىن «جاسىل» تەحنولوگيالاردى بەلسەندىرەك ەنگىزىپ, قولدانۋعا شاقىرامىز. اۋستريا «جاسىل» تەحنولوگيالاردى قولدانىسقا ەنگىزۋدە الەمنىڭ الدىڭعى قاتارىندا. ءوندىرىس پەن ەكونوميكانى «جاسىل» تەحنولوگيالار ارقىلى تۇراقتى دامىتۋعا دەن قويۋدا. ەلدەگى جاڭعىرمالى ەنەرگيا كوزدەرىنەن الىناتىن جالپى ەنەرگيانىڭ كولەمى 80 پايىز, ال ەلەكتر قۋاتى, جىلۋ جانە كولىككە جۇمسالاتىنى 33 پايىزعا دەيىن جەتەدى. وسى ورايدا «جاسىل» تەحنولوگيالاردى قولدانۋعا بايلانىستى ەكى ەل ايماقتارىنىڭ وكىلدەرىن جيناپ, ءوزارا تانىستىرۋ ءجون دەپ شەشتىك. ءبىز وسى فورۋمدى ۇيىمداستىرعان قازاقستاننىڭ ەنەرگەتيكا مينيسترلىگىنە, سىرتقى ىستەر مينيسترلىگىنە, استانا قالاسىنىڭ اكىمدىگىنە العىس ايتقىمىز كەلەدى», دەدى فورۋمدى اشقان قازاقستانداعى اۋستريا ەلشىلىگىنىڭ ساۋدا ءبولىمى باسشىسى ميحاەل ميۋللەر.
بۇدان سوڭ ءسوز العان ەنەرگەتيكا ءبىرىنشى ۆيتسە-ءمينيسترى ماحامبەت دوسمۇحامبەتوۆ ەكى ەلدىڭ قارىم-قاتىناسى قارقىندى دامىپ كەلە جاتقاندىعىن جەتكىزدى.
ال اۋستريانىڭ كولىك, تەحنولوگيالار جانە ينۆەستيتسيالىق جوبالار فەدەرالدى مينيسترلىگىنىڭ باسشىسى, باس حاتشى اندرەاس رايحاردت ءوز ەلىنىڭ ۇكىمەتى اتىنان ءسوز سويلەدى. ول اۋستريانىڭ جاڭعىرمالى ەنەرگيا كوزىن جاساپ شىعارۋدا تاجىريبەسى مولدىعىن, ەنەرگيالىق تيىمدىلىكتى دامىتىپ, ولاردىڭ پايدالى قازبالار مەن يادرولىق ەنەرگەتيكادان تولىق باس تارتۋعا دايىندالىپ جاتقانىن جەتكىزدى.
ال ەرجان اشىقباەۆ فورۋم جۇمىسىنا ساتتىلىك تىلەي كەلە, قاتىسۋشىلارعا قازاقستاننىڭ بۇگىنگى ساياسي-ەكونوميكالىق باعىتى تۋرالى كەڭىرەك ءتۇسىندىرىپ ءوتتى. ەلدىڭ سىرتقى قارىم-قاتىناستارىنىڭ جەدەل دامىپ, اتاپ ايتقاندا, ەلگە ۆيزاسىز كىرۋ مۇمكىندىكتەرى قاراستىرىلعانىن ايتىپ ءوتتى. ە.اشىقباەۆتىڭ ايتۋىنشا, اۋستريانىڭ تسيفرلاندىرۋ سالاسى بويىنشا جاساعان جاڭا جوبالارى, يننوۆاتسيالىق شەشىمدەرى ۇيرەنۋگە تۇرارلىق تاجىريبە. سونداي-اق تابيعات رەسۋرستارىن ءتيىمدى پايدالاناتىن, قوعامىنا «جاسىل» تەحنولوگيانى بەلسەندى ەنگىزگەن اۋستريالىقتاردىڭ قازاقستاننىڭ ەنەرگەتيكالىق الەۋەتىن دامىتۋعا قوسىپ جاتقان ۇلەسىنە ريزاشىلىعىن ءبىلدىردى.
ۆەنەرا تۇگەلباي, «ەگەمەن قازاقستان»