پارلامەنت ءماجىلىسىنىڭ توراعاسى باق وكىلدەرىن «پارلامەنت ءسوزى» سىيلىعىمەن ماراپاتتادى.
«قالام تەربەگەن اقپارات وكىلدەرى ەلىمىزدىڭ ايناسى بولىپ وتىرسىزدار. سەبەبى ەلىمىزدىڭ دامۋ جولىنداعى بارلىق جاڭالىقتار, بارلىق وزگەرىستەر باق ارقىلى بايتاق ەلىمىزگە, بارشا الەمگە تارايدى. بارشاڭىزعا بەلگىلى, ەلباسىمىز ەلىمىز تاۋەلسىزدىك العان كۇننەن باستاپ قازاقستانداعى بارلىق اقپارات قۇرالدارىنا ەرەكشە نازار اۋدارىپ, ارقاشان ۇلكەن كومەك كورسەتىپ تۇرادى. سونىڭ ناتيجەسىندە, ەلىمىزدىڭ اقپارات قۇرالدارىندا بۇگىندە مىڭداعان كاسىبي ماماندار جۇمىس ىستەيدى, ۇزدىك تەحنيكالارمەن, تەحنولوگيالارمەن قامتىلعان. باق-تى ەلىمىزدەگى ماڭىزدى سالانىڭ ءبىرى دەپ ايتۋعا بولادى. بارشالارىڭىز وسى سالادا تابىستى ەڭبەك ەتىپ, وزدەرىڭىزگە جۇكتەلگەن جاۋاپكەرشىلىكتى زور ابىرويمەن اتقارىپ كەلەسىزدەر. سىزدەرگە قانداي قۇرمەت كورسەتسەك تە, ارتىق بولمايدى», دەدى ءماجىلىس توراعاسى نۇرلان نىعماتۋلين باق وكىلدەرىن ءتول مەرەكەلەرىمەن قۇتتىقتاۋ كەزىندە.
بيىل بايقاۋعا قاتىسۋشىلار سانى بىلتىرمەن سالىستىرعاندا, ەكى ەسە كوپ بولعان.
«وسىمەن ەكىنشى رەت ۇلكەن ءماجىلىس زالىندا «پارلامەنت ءسوزى» سىيلىعىمىزدى تاپسىرعالى وتىرمىز. «پارلامەنت ءسوزى» - ول ارينە, ەلدىڭ ءسوزى, حالىقتىڭ ءسوزى. ونى سىزدەر ءاربىر وتباسىنا, مەملەكەتىمىزدىڭ ءار ازاماتىنا جەتكىزىپ جۇرسىزدەر. ونى كۇندە وقيمىز دا, كورىپ تە كەلەمىز. سوندىقتان دەپۋتاتتىق كورپۋس اتىنان ريزاشىلىعىمىزدى بىلدىرەمىز», دەدى ءماجىلىس توراعاسى.
سونىمەن, «پارلامەنتتىك جۋرناليستيكانى دامىتۋعا قوسقان ۇلەسى ءۇشىن» اتالىمىندا بەلگىلى جازۋشى عادىلبەك شالاحمەتوۆ ماراپاتتالدى. وسى اتالىمداعى سىيلىق تانىمال جۋرناليست تاتيانا كوستيناعا دا تاپسىرىلدى.
«ۇزدىك ينتەرنەت جانە راديو ماتەريال ءۇشىن» اتالىمىندا سىيلىق «قازاقپارات» حاا ساراپشىسى مۇراتبەك ماقۇلبەكوۆ پەن «Nur.kz» ۇجىمىنا بەرىلدى.
«ۇزدىك تەلەۆيزيالىق سيۋجەت» اتالىمىندا «حابار» تەلەارناسىنىڭ ءتىلشىسى گۇلجان مارقاباەۆا مەن «31 ارنانىڭ» ءتىلشىسى يليا رىبين لاۋرەات دەپ تانىلدى.
«ۇزدىك باسپا جاريالانىمى ءۇشىن» اتالىمىندا «Eqemen Qazaqstan» گازەتىنىڭ ساياسات جانە قۇقىق ءبولىمىنىڭ مەڭگەرۋشىسى جولدىباي بازار مەن «ۆرەميا» گازەتىنىڭ ءتىلشىسى لەيلا تاستانوۆا جەڭىمپاز بولدى.
سونىمەن قاتار «ارنايى رەپورتاج» اتالىمىندا لاۋرەات بولىپ «كتك» تەلەارناسىنىڭ ءتىلشىسى ءجاۋدىر ورازحانوۆا اتالدى.
ال «پارلامەنت ءسوزى» سىيلىعىنىڭ «ۇزدىك ۆيدەو جانە فوتو ماتەريال» اتالىمىندا «1 كانال «ەۆرازيا» وپەراتورى رۋستام ابەلدينوۆ پەن «Bestnews.kz» اا ءفوتوتىلشىسى جانار سەردالينا ماراپاتتالدى.
جەڭىمپازدارعا ارنايى تاپسىرىسپەن جاسالعان پارلامەنت بەينەسىندەگى مۇسىندەر مەن ديپلومدار تابىس ەتىلدى.
ەستەرىڭىزگە سالا كەتەيىك, «پارلامەنت ءسوزى» سىيلىعى العاش رەت 2017 جىلى تاپسىرىلعان.