ورتالىق كوممۋنيكاتسيالار قىزمەتىندە استانا كۇنىن مەرەكەلەۋ قارساڭىندا مەرەكەلىك كونتسەرت جانە «دومبىرا – اسىل مۇرا» كوپشىلىك سەرۋەندەرىنىڭ وتكىزىلۋىنە ارنالعان ءباسپاسوز ءماسليحاتى ءوتتى.
شاراعا قازاقستاننىڭ ەڭبەك سىڭىرگەن ءارتىسى, قازاق ۇلتتىق ونەر ۋنيۆەرسيتەتىنىڭ پرورەكتورى تۇرار الىپباەۆ, قازاقستاننىڭ ەڭبەك سىڭىرگەن قايراتكەرى, قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترىنىڭ ديرەكتورى نۇرقيسا داۋىشەۆ, كۇيشى, قازاقستاننىڭ ەڭبەك سىڭىرگەن ءارتىسى, قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى ايگۇل ۇلكەنباەۆا قاتىسىپ, كەشتىڭ باعدارلاماسى تۋراسىندا باياندادى.
«دومبىرا اتا بابامىزدان قالعان اسىل قازىنا. ۇلتتىق دومبىرا كۇنى مەرەكەسىنىڭ وسكەلەڭ ۇرپاققا بەرەر تاعىلىمى زور. ەلباسى نۇرسۇلتان نازارباەۆتىڭ جارلىعىمەن بەكىتىلگەن جاڭا مەيرام – ۇلتتىق دومبىرا كۇنى ۇلتتىق ونەردى ناسيحاتتاپ جۇرگەندەر ءۇشىن ۇلكەن قولداۋ. قازاقتىڭ ءتول اسپابىن جالپىۇلتتىق دەڭگەيدە ناسيحاتتاۋ ماقساتىندا جاسالعان دۇنيە ءۇشىن ەلباسىنا ايتار العىسىمىز شەكسىز. دومبىرانىڭ ادام جانىن تەبىرەنتە الاتىن قاسيەتى بار. قازاقتىڭ كۇيلەرى دە, قوڭىر دومبىراسى دا بابالارىمىزدان قالعان مۇرا. كۇي ونەرى – قازاق حالقىنىڭ رۋحاني بايلىعىنىڭ, جان دۇنيە بايلىعىنىڭ ەڭ ءبىر كيەلى, قاسيەتتى ءتۇرى», دەدى ا.ۇلكەنباەۆا.
مەملەكەت باسشىسى «ۇلتتىق دومبىرا كۇنىن بەكىتۋ تۋرالى» 2018 جىلعى 12 ماۋسىمداعى №699 جارلىعىنا قول قويدى. ەلباسىنىڭ وسى جارلىعىن قولداۋ ماقساتىندا الماتىدان ارنايى احمەت جۇبانوۆ جانە كۇلاش بايسەيىتوۆا اتىنداعى مامانداندىرىلعان مەكتەپتەرىنەن 500 دارىندى دومبىراشى كەلە جاتقانىن اتاپ وتكەن ابزال. سونىمەن قاتار قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترىنىڭ حالىقارالىق, رەسپۋبليكالىق بايقاۋلارىنىڭ 90 لاۋرەات دومبىراشىسى جانە ن.تىلەنديەۆ اتىنداعى اكادەميالىق فولكلورلى-ەتنوگرافيالىق «وتىرار سازى» وركەسترىنەن 70 ادام ارنايى كەلىپ قاتىسپاقشى. جانە دە قۇرمانعازى اتىنداعى قازاق ۇلتتىق كونسەرۆاتورياسىنان 200 ۇستازدار مەن ستۋدەتتەر, قازاق ۇلتتىق ونەر ۋنيۆەرسيتەتىنەن 500 جاس ونەرپاز دومبىراشى قاتىسادى. شارا 1 شىلدە كۇنى «قازاق ەلى» مونۋمەنتىنىڭ الاڭىندا وتەدى.
راۋان قايدار, «ەگەمەن قازاقستان»