1 قاڭتار – جاڭا عاسىردىڭ العاشقى كۇنى ەلباسى نۇرسۇلتان نازارباەۆتىڭ جارلىعىمەن «مادەنيەتتى قولداۋ جىلى» دەپ جاريا- لانىپ, اتالمىش شارانىڭ بەتاشار ءراسىمى رەتىندە باس قالادا «مىڭجىلدىق – دۋمان – استانا» اتتى مەرەكەلىك باعدارلاما قولعا الىندى. جاڭا مىڭجىلدىقتى قارسى الۋ سالتاناتى قالاداعى «الاتاۋ» سپورت سارايىندا ءوتتى.
4 قاڭتار – ەلوردا مارتەبەسىن كوتەرىپ, حالىقارالىق مادەني-سپورتتىق شارالار ۇيىمداستىرۋ باعدارلاماسى اياسىندا قازاقستان جانە كۋبا ەلىنىڭ بوكستان ۇلتتىق قۇراما مۇشەلەرى استانادا جولداستىق جەكپە-جەك وتكىزدى. داڭقتى سپورتشى, وليمپيا ويىندارىنىڭ 3 دۇركىن, الەم چەمپيوناتىنىڭ بەس دۇركىن جەڭىمپازى فەليكس ساۆون باستاپ كەلگەن كۋبالىقتاردى ەلىمىز بىلعارى قولعاپ شەبەرلەرى 6:4 ەسەبىمەن ۇتتى.
14 قاڭتار – ارقا توسىندە تۇڭعىش رەت قازاق اندەرى فەستيۆالى ۇيىمداستىرىلىپ, وعان وبلىستاردان تانىمال انشىلەر شاقىرىلدى. ۇزدىك دەپ تانىلعان ونەرپازدار ەلوردانىڭ مادەني تىنىسىنا ۇلەس قوسۋعا شاقىرىلدى.
18 قاڭتار – ەل ورتالىعى ارقا توسىنە اۋىسقان ساتتەن باستاپ, بۇرىنعى استانا الماتى قالاسىمەن بارىس-كەلىس كۇشەيدى. وسى ورايدا قالاارالىق اۆتوموبيل جولىن جاقسارتۋ جونىندە ەلباسى اتقارۋشى بيلىككە ارنايى تاپسىرما جۇكتەپ, وسى ماسەلە ۇكىمەت مۇشەلەرىنىڭ كەزەكتى وتىرىسىندا كەڭىنەن تالقىلانىپ, ناتيجەسىندە 1200 شاقىرىمدىق جولدى از عانا مەرزىمدە تولىق جاراقتاپ, قۇرىلىس جۇمىستارىن جەدەل جۇرگىزۋ جايلى شەشىم قابىلداندى.
27 قاڭتار – قازاقستان پرەزيدەنتى ن.نازارباەۆ استانانىڭ باس جوسپارىمەن جان-جاقتى تانىستى. ەلباسىنا قالا اكىمى ءا.جاقسىبەكوۆ پەن باس ارحيتەكتور ب.دوسماعانبەتوۆ جاڭا جوبانى جىكتەپ-جىلىكتەپ ءتۇسىندىرىپ شىقتى. بۇل جوبادا – قازىرگى پرەزيدەنت رەزيدەنتسياسى, «نۇر استانا» مەشىتى, سونىمەن قاتار ەكى ورتانى جالعاپ جاتقان «ترانسويل» كومپانياسىنىڭ عيماراتى قاتارلى اسا اۋقىمدى نىساندار قاراستىرىلعان-تىن. جوبا ماقۇلدانعان سوڭ ۇكىمەت قۇرىلىس جۇمىسىن باستادى. بۇل كۇنگە نۇرسۇلتان ءابىش ۇلى «استانا قاقپاسى اشىلعان ءسات» دەپ باعا بەردى.
12 اقپان – ەلباسى نۇرسۇلتان نازارباەۆ ەلوردا مادەني وشاقتارىن ارالاپ, مەملەكەتتىك وپەرا جانە بالەت تەاترى قۇرىلىسىن تەز ارادا ءبىتىرۋدى تاپسىردى. سەگىز ايدان كەيىن كۇلاش بايسەيىتوۆا اتىنداعى وپەرا جانە بالەت تەاترى مۇقان تولەباەۆتىڭ ء«بىرجان–سارا» وپەراسىمەن شىمىلدىعىن اشتى.
22 اقپان – ەلباسى باس قالادا سالىنىپ جاتقان پرەزيدەنتتىك مادەنيەت ورتالىعىنىڭ قۇرىلىسىمەن (قازىرگى اسكەري-تاريحي مۋزەي) تانىسىپ, «بايىرعى كوشپەندىلەر مادەنيەتى» اتتى زالعا وزىنە ماڭعىستاۋلىقتار سىيلاعان كيىز ءۇيدى ورنالاستىرۋدى تاپسىردى. ورتالىق سەگىز ايدان كەيىن 28 قازان كۇنى پرەزيدەنتتىڭ قاتىسۋىمەن اشىلدى.
30 ناۋرىز – ءتورت جىلدىڭ (1996 جىل) الدىندا «شانحاي بەستىگى» دەگەن اتپەن قۇرىلىپ, كەيىن «شانحاي ىنتىماقتاستىق ۇيىمى» اتاۋىنا يە بولعان بەدەلدى حالىقارالىق ۇيىم مۇشەلەرى استانادا باس قوستى.
29 ءساۋىر – ەلوردا باسشىسى ءا.جاقسىبەكوۆ ۇلى جەڭىس مەرەكەسى قارساڭىندا 18 مايدانگەرگە «تاۆريا» جەڭىل اۆتوكولىگىنىڭ كىلتى مەن 26 سوعىس ارداگەرىنە پاتەر كىلتىن تابىس ەتتى.
13 ماۋسىم – ەلباسىنىڭ قاتىسۋىمەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جاڭا عيماراتى اشىلدى.
20 شىلدە – پرەمەر-مينيستر ق.توقاەۆتىڭ توراعالىق ەتۋىمەن ۇكىمەت مۇشەلەرى قاتىسقان كەڭ كولەمدە ءماجىلىس ءوتىپ, وندا «استانا قالاسىن دامىتۋ تۇجىرىمداماسى» تالقىلاندى.
12 تامىز – استانانىڭ رۋحاني سۇرانىسىن قاناعاتتاندىرۋ ءۇشىن قازاق تىلىندە ادەبي شىعارمالار ساۋدالايتىن «اباي» كىتاپ دۇكەنى اشىلدى. 15 تامىز – ەسىل وزەنىنىڭ قالا ورنالاسقان ءون بويىن شارلاي ءجۇزىپ, قوناقتارعا شاھار كوركىن تانىستىراتىن «اقبۇلاق» ساياحات كەمەسى جۇرە باستادى. 22 تامىز – قالانىڭ ىرگەسىندەگى ەلدى مەكەندەر «كۇيگەنجار», «ميچۋرين», «پريگورودنوە», «ينتەرناتسيونالنىي», «ۋچحوز», «كوكتال» اۋىلدارى باس شاھار قۇرامىنا ەنىپ, ەلوردا اۋماعى ۇلعايدى.
4 قاراشا – استانادان 30 شاقىرىم جەردەگى روجدەستۆەنكا اۋىلىنىڭ ماڭىندا قاراكەرەي قابانباي باتىر كەسەنەسىنىڭ سالتاناتتى اشىلۋى بولدى. 10 جەلتوقسان – اقمولا قالاسى ءۇش جىل بۇرىن (1997 جىلى) ەلىمىزدىڭ جاڭا استاناسى دەپ تانىلعان تاريحي كۇنگە وراي كونگرەسس-حولدا سالتاناتتى جيىن ءوتتى. مەرەكەلىك شارا ۇستىندە قالا باسشىسى ءا.جاقسىبەكوۆ ق.قۋانىشباەۆ اتىنداعى قازاق مۋزىكالىق دراما تەاترىنىڭ كوركەمدىك جەتەكشىسى ءازىربايجان مامبەتوۆكە «استانا قالاسىنىڭ قۇرمەتتى ازاماتى» اتاعىن تاپسىردى.
16 جەلتوقسان – تاۋەلسىزدىك تويىنا تارتۋ رەتىندە ەلوردانى «الاتاۋ» سپورت سارايىنىڭ تۇڭعىش رەت قازاقشا كۇرەستەن العاشقى ۇلتتىق چەمپيونات ۇيىمداستىرىلدى. تۇيە بالۋانعا قازاقشا كۇرەس فەدەراتسياسىنىڭ پرەزيدەنتى مۇحتار قۇل-مۇحاممەد جەڭىل كولىك تىگىپ, ول بالۋان ەلدوس ىقسانعاليۆكە بۇيىردى.
دايىنداعان بەكەن قايرات ۇلى, «ەگەمەن قازاقستان»