الماتىدا پوليتسيا كۇنى اتالىپ ءوتىلدى

ءتارتىپ ساقشىلارىنىڭ كاسىبي مەرەكەسىنە وراي وتكەن ايتۋلى شاراعا ءىىم-ءنىڭ م.ەسبولاتوۆ اتىنداعى الماتى اكادەمياسىنىڭ باستىعى, پوليتسيا گەنەرال-مايورى تالعات ق ۇلىباەۆ, ۇلتتىق ۇلان جانە ىشكى ىستەر ورگاندارى ارداگەرلەر كەڭەسىنىڭ توراعاسى, ميليتسيا گەنەرال-مايورى ومىرزاق بولسامبەكوۆ, ميليتسيا گەنەرال-مايورى رۇستەم قايداروۆ, پوليتسيا گەنەرال-لەيتەنانتى ۆاسيلي سيماچەۆ, الماتى قالالىق ءىىد ارداگەرلەر كەڭەسىنىڭ توراعاسى, وتستاۆكاداعى ميليتسيا گەنەرال-مايورى ساعىنجان اسىل-كەنەي جانە تاعى دا باسقا شەندىلەر قاتىستى.

وسى سالتاناتتى شارا بارىسىندا كسرو ءىىم-ءنىڭ قۇرمەتتى قىزمەتكەرى, ميليتسيا گەنەرال-مايورى ماقان ەسبولاتوۆقا ارنالعان ءبيۋستتىڭ اشىلۋ ءراسىمى ءوتتى. ايتۋلى ازاماتتىڭ ەسىمى كوپشىلىككە جاقسى تانىس. ول 45 جىلدان اسا ۋاقىت بويى وسى سالادا جەمىستى ەڭبەك ەتتى. 1973-1980 جىلدار ارالىعىندا قازاق كسر-ءنىڭ ىشكى ىستەر ءمينيسترى بولدى. ءوز ءىسىنىڭ بىلگىر مامانى, ۇلتىنىڭ ادال پەرزەنتىنىڭ ەڭبەگى لايىقتى باعالانىپ, ءار جىلدارى ماقان ەسبولات ۇلى ءتۇرلى مەملەكەتتىك ناگرادالارمەن ماراپاتتالدى.  

مەرەكەلىك شارا بارىسىندا اكادەميا كۋرسانتتارىنان قۇرالعان جيىنتىق جاساق جاۋىنگەرلىك قابىلەتتەرىن بايقاتىپ, ءوز ونەرلەرىن ورتاعا سالدى. سونىمەن قاتار, كونتسەرتتىك باعدارلاما كوپشىلىك نازارىنا ۇسىنىلدى. 

اكادەميا جايىندا قىسقاشا مالىمەت بەرسەك, وسى ءبىلىم وشاعىندا  قىزمەت اتقاراتىن 450-دەن استام جەكە قۇرام بار, ونىڭ ىشىندە 80-نەن استامىنىڭ عىلىمي دارەجەسى بار. سونىمەن قاتار جوعارى بىلىكتى پروفەسسورلىق-وقىتۋشىلار قۇرامى قىزمەت ەتەدى, ال كۋرسانتتار سانى 1000-نان اسادى. اكادەميادا جوعارى وقۋ ورنىنان كەيىنگى جانە قوسىمشا ءبىلىم بەرۋ ينستيتۋتتارى, 15 كافەدرا 3 وقۋ ورتالىقتارى جۇمىس ىستەيدى. قازىرگى تاڭدا اكادەميا «قۇقىق قورعاۋ قىزمەتى» بويىنشا باكالاۆر, ماگيستراتۋرا جانە PhD دوكتورونتۋرا, 2013 جىلدان باستاپ, «اقپاراتتىق جۇيەلەر» جانە «راديوتەحنيكا, ەلەكترونيكا جانە تەلەكوممۋنيكاتسيالار» ماماندىقتارى بويىنشا ماماندار دايىندايدى. تاۋەلسىزدىك جىلدارىنىڭ باسىنان بەرى اتالمىش اكادەميانى بىتىرگەن 22 قىزمەتكەر پوليتسيا گەنەرالى اتاعىن الدى.

عالىم سۇلەيمەن,

«ەگەمەن قازاقستان»

الماتى