«بىلىممەن – بولاشاققا» تۇلەكتەر كەزدەسۋى ءوتتى

تاريحى سوناۋ 1928 جىلدان باستاۋ الاتىن ءبىلىمنىڭ قارا شاڭىراعى عاسىرعا جۋىق  كەزەڭدە ەكى ءجۇز مىڭنان استام پەداگوگ-ۇستازدار, ءۇش مىڭعا جۋىق عىلىمي كادرلار دايارلاپ, وتاندىق عىلىم, ءبىلىم مەن مادەنيەتىن دامىتۋعا  زور  ۇلەس قوستى. بيىلعى جىلى دا ءداستۇر بويىنشا ءبىلىم ورداسىندا بولاشاق پەداگوگتاردىڭ تاعى ءبىر لەگى ۇلكەن ءومىر جولىنا جولداما الدى.

ۋنيۆەرسيتەتتە جاڭاشىلدىق پەن ۇلتتىق تاربيە ۇستانىمدارىن باسشىلىققا الا وتىرىپ, باكالاۆريات, ماگيستراتۋرا, دوكتورانتۋرا باعدارلامالارى نەگىزىندە ماماندار دايارلانۋدا.

 «سپارتاك» سپورت كەشەنىندە وتكەن سالتاناتتى شارا باكالاۆر باعدارلاماسى بويىنشا كۇندىزگى ءبولىمدى تامامداعان مىڭنان استام تۇلەكتەر شەرۋىمەن باستالدى.

تۇلەكتەر مەرەكەسى ۋنيۆەرسيتەت رەكتورى, پروفەسسور تاكير بالىقباەۆتىڭ قۇتتىقتاۋ سوزىمەن باستالدى.

 «كەزىندە وقۋ ورنىنىڭ تۇڭعىش رەكتورى بولعان مەملەكەت جانە قوعام قايراتكەرى سانجار اسفەندياروۆتان, سول كەزدە قازاقستان حالىق اعارتۋ كوميسسارى بولعان وراز جاندوسوۆتان باستاپ حالەل دوسمۇحامەدوۆ, احمەت بايتۇرسىنوۆ, ساكەن سەيفۋللين, ءىلياس قابىلوۆ, بايمەن المانوۆ, تەمىربەك جۇرگەنوۆ, قۇدايبەرگەن جۇبانوۆ, سارسەن امانجولوۆ, ءالىمحان ەرمەكوۆ سىندى ۇلت زيالىلارى ءدارىس وقىعان اۋديتوريالاردا ءبىلىم العان سىزدەر وتە باقىتتى ۇرپاقسىزدار. جىلدان-جىلعا وقۋ ورنىمىزدىڭ الەۋەتى ارتىپ كەلەدى. بۇگىندە ول عىلىمي, عىلىمي-پەداگوگيكالىق كادرلار جانە پەداگوگيكالىق ءبىلىم بەرۋ, ەكونوميكا جانە بيزنەس, قۇقىقتانۋ سالالارى بويىنشا ماماندار دايارلايتىن كوپ سالالى ءبىلىم ورداسى بولىپ تابىلاتىنى وزدەرىڭىزگە ءمالىم. قازىرگى تاڭدا اباي اتىنداعى قازۇپۋ شىعىس ەۋروپا مەن ورتالىق ازيانىڭ ارناۋلى رانجيرلەۋىندەگى 30 ەلگە قاراستى 200 ۇزدىك ۋنيۆەرسيتەتتىڭ بەل ورتاسىندا تۇرسا, 2018 جىلعى ۇلتتىق رەيتينگى بويىنشا پەداگوگيكالىق جوعارى وقۋ ورىندارى اراسىندا كوشباسشى وقۋ ورنى, الەمنىڭ ۇزدىك توپ-500 ۋنيۆەرسيتەتتەرىنىڭ قاتارىنا جانە QS World University Rankings  رەيتينگىسىنە ەندى. ولاي بولسا وسىنداي مارتەبەلى وقۋ ورنىن بىتىرگەن سىزدەردىڭ ونى ماقتان ەتۋگە تولىق قۇقىلارىڭىز بار» دەپ اتاپ وتكەن ۋنيۆەرسيتەت رەكتورى تۇلەكتەرگە ءسات-ساپار تىلەدى.

كەلەسى كەزەكتە ءسوز العان الماتى قالاسى ءماسليحاتىنىڭ دەپۋتاتى, ۋنيۆەرسيتەتىمىزدىڭ باقىلاۋ كەڭەسىنىڭ مۇشەسى كەنجەحان  ماتىجانوۆ ءبىلىم ورداسىنىڭ مىقتى كادرلىق الەۋەتى مەن وتاندىق جوعارى ءبىلىم جۇيەسىندەگى  وزىندىك ورنىن اتاپ ءوتتى. ال ۋنيۆەرسيتەت تۇلەگى مەدەۋ اۋدانى اكىمىنىڭ ورىنباسارى عاني مايلىباەۆيگى ءاردايىم ءبىلىم ورداسىن ماقتان تۇتاتىندىعىن تىلگە تيەك ەتتى. 

قازۇپۋ-ءنىڭ تاربيە جۇمىسى جانە الەۋمەتتىك دامۋ جونىندەگى پرورەكتورى, پروفەسسور جاناتبەك ىشپەكباەۆتىڭ ايتۋىنشا, ەلىمىزدىڭ پەداگوگيكا سالاسىنا بىلىكتى ماماندار دايارلاۋدىڭ كوش باسىندا تۇرعان ءبىلىم ورداسىنداعى ديپلوم تابىستاۋ ءراسىمى بيىلعى جىلعى تۇلەكتەرگە ەرەكشە مەرەكەلىك كوڭىل-كۇي سىيلادى. شاراعا قاتىسقان اتا-انالار مەن قوناقتار ۋنيۆەرسيتەت باسشىلىعىنا ريزاشىلىعىن ءبىلدىردى. «جىگىتتەر» كارتەتى, ر.ۋايىس, ە.راحىم سىندى قازاق ەستراداسىنىڭ  جۇلدىزدارى اسەم انمەن, «سالتانات»  مەملەكەتتىك بي ءانسامبلى كوڭىلدى بيمەن كەشتىڭ ءسانىن  كىرگىزدى.

ەلۆيرا سەرىكقىزى,

«ەگەمەن قازاقستان»

الماتى