قر ەحاقم بازالىق زەينەتاقى قالاي ەسەپتەلەتىنىن ءتۇسىندىردى

ماسەلەن, زەينەتاقى جۇيەسىنە قاتىسۋ ءوتىلى بازالىق زەينەتاقىنى بەلگىلەۋ ءۇشىن قابىلدانعان 1998 ج. 1 قاڭتارعا دەيىنگى ەڭبەك ءوتىلى ەسكەرىلەتىن بولادى. وعان جوعارى وقۋ ورىندارىندا وقىعان ۋاقىتى, اسكەري بورىشىن وتەگەن ۋاقىتى, كاسىپكەرلىك قىزمەت ت.س.س. كىرەدى.

ەكىنشىدەن, مىندەتتى زەينەتاقى جارنالارى اۋدارىلعان ۋاقىت كەزەڭى ەسكەرىلەدى. سونىمەن قاتار وعان 3 جاسقا دەيىنگى بالانى (جالپى ۋاقىتى 12 جىل) جانە مۇگەدەك بالالاردى 16 جاسقا دەيىن كۇتىپ-باعۋ, كۇش قۇرىلىمدارى قىزمەتكەرلەرى بولىپ تابىلاتىن ەرلى-زايىپتىلاردىڭ ولاردىڭ ەڭبەككە ورنالاسۋ مۇمكىندىكتەرى بولماعان جەرلەردە تۇرۋ كەزەڭى, قر ديپلوماتتىق قىزمەتتەرىندەگى, حالىقارالىق ۇيىمدارداعى ەرلى-زايىپتىلاردىڭ شەتەلدەردە تۇرۋ كەزەڭدەرى ەسكەرىلەدى.

بۇدان وزگە, ءى توپتاعى مۇگەدەكتەردى باعىپ-قاعۋ, باسقانىڭ كومەگىنە مۇقتاج ءىى توپتاعى جالعىز مۇگەدەكتەر مەن جاسى بويىنشا زەينەتكەرلەردى باعىپ-كۇتۋ, سونىمەن قاتار 80 جاستان اسقان ەگدە ادامداردى كۇتۋ جانە ت.ب. ۋاقىتى ەسكەرىلەدى.

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتتەرى بويىنشا, بازالىق زەينەتاقىنىڭ ورتاشا مولشەرى 25 456 تەڭگە بولادى دەپ كۇتىلۋدە. بۇل ورايدا, زەينەتكەرلەردىڭ 44% نەمەسە  947 مىڭ ەڭ كوپ مولشەردەگى زەينەتاقىنى الاتىن بولادى, ال تاعى 956 مىڭ ادام (44,5%) 20 930 تەڭگەدەن 28 284 تەڭگەگە دەيىن الادى (كم 74%-نان 100% دەيىن).

ەڭبەك جانە حالىقتى الەۋمەتتىك قورعاۋ ۆيتسە-ءمينيسترى س. جاقىپوۆا قايتا ەسەپتەلگەن بازالىق زەينەتاقى ماسەلەسى بويىنشا جۇگىنەتىن ازاماتتار ءۇشىن بازالىق زەينەتاقىنى ەسەپتەگەن كەزدە ەسكەرىلگەن زەينەتاقى جۇيەسىنە قاتىسۋ ءوتىلى تۋرالى جان-جاقتى مالىمەتتەردى قامتيتىن جەكە انىقتاما فورماسى قاراستىرىلعانىن ايتتى.

«زەينەتكەرلەرگە ەشقايدا بارۋدىڭ قاجەتى جوق, بىزدە بازالىق زەينەتاقىنى قايتا ەسەپتەۋدى جۇزەگە اسىراتىن بارلىق دەرەكتەر بار. قايتا ەسەپتەۋ قوسىمشا قۇجاتتاردى ۇسىنۋسىز ورىندالادى, سەبەبى زەينەتكەرلىك ىستەرىندە ەڭبەك ءوتىلى تۋرالى مالىمەت بار, ال مىندەتتى زەينەتاقى جارنالارى اۋدارىلعان مەرزىم مىندەتتى زەينەتاقى جارنالارىن اۋدارۋ تۋرالى دەرەكتەر بازاسىندا قولجەتىمدى», — دەپ ءتۇسىندىردى قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى س. جاقىپوۆا.

ازاماتتار كونسۋلتاتسيا الۋ ءۇشىن 1414 بىرىڭعاي بايلانىس ورتالىعىنا نەمەسە «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ تۇرعىلىقتى جەرى بويىنشا بولىمشەلەرىنە تىكەلەي جۇگىنە الادى.

«سونداي-اق, ولار سول جەردەن بازالىق زەينەتاقىنى ەسەپتەۋ كەزىندە ەسكەرىلگەن زەينەتاقى جۇيەسىنە قاتىسۋ ءوتىلى تۋرالى تولىق اقپاراتتى قامتيتىن انىقتاما الا الادى. بۇدان وزگە, ەلەكتروندىق تسيفرلىق قولتاڭبا بولعان جاعدايدا اقپاراتتى «ەلەكتروندىق ۇكىمەت» ۆەب-پورتالى ارقىلى الۋعا بولادى», — دەدى س. جاقىپوۆا.