اتا زاڭىم
«ءتۇبى ءبىر تۇگەل ءسوزدىڭ ءتۇپ اتاسى – مايقى بي» دەپ باستالعان ءسوزدىڭ باسى. شىعارعان مايقى ءبيدىڭ جارعىلارىن قولداعان كەزىندە ەلدىڭ كارى-جاسى. زاڭ بولىپ «قاسىمحاننىڭ قاسقا جولى», قۇپ الىپ بۇكىل قازاق قوستادى ونى. شىققاندا «ەسكى جولى ەسىمحاننىڭ» وربىتپەي وتارشىلدىق تاستادى ونى. قول جەتتى ەل دەربەستىككە ارمان قىلعان, اتا زاڭ قابىلداندى حالىقشىل زاڭ. ءتىلىم تۇر وندا ايتىستا ءادىل جەڭىپ, مارتەبەگە مەملەكەتتىك يە بولعان. قورعالار ەلىم تۇتاس, جەرىم ءبۇتىن, قول سۇعىپ ەشكىم سىرتتان ايتپاس ۇكىم. زاڭدا ايقىن مىندەتتەرىم, قۇقىقتارىم, اقتايتىن ەل ءۇمىتىن, انا ءسۇتىن. قاق جارعان قارا قىلدى اتا زاڭىم, وزىڭنەن ءار ىسكە اق باتا الامىن. جولىڭنان سەنىڭ ءادىل اۋىتقىسا, كەشىرىم كىم دە بولسا جاساماعىن!استانام
سارىارقادا ءسان تۇزەدى استانا, ماقتانىش بوپ كارىگە دە, جاسقا دا. قۋانا بەر كەڭپەيىلدى قازاعىم, بۇنىڭ ءبارى بىزگە ءالى باستاما. ءبىر-بىرىمەن تاپقان كوركەم جاراستىق, جاڭا ۇيلەردىڭ اراسىندا اداستىق. ءوزىن-ءوزى باسقارعان جاس ەلىمە ءوز قولىمەن سالعان اسەم قالا ىستىق. باتىس, شىعىس ۇلگىسىنەن تاڭدالىپ سالعان ۇيگە قاراسا ەل تاڭدانىپ, – بىتكەنىنەن باستالعانى عاجاپ دەپ قۇرىلىستار جاتىر ءالى جالعانىپ.تىنىشتىق
تاۋەلسىزدىك العان ءبىراز ەلدەردىڭ, ءالى ارمانداپ, اڭساعانى – تىنىشتىق. ءبارىن قازىر ءبىزدىڭ ەلگە كەلگەننىڭ, قۇشاق جايىپ قارسى الادى تىنىشتىق. ءبىزدىڭ ءساتتى ءار ءىسىمىزدى بايقاعان دوستىڭ كۇدەر ۇزبەگەنى – تىنىشتىق. كوشىپ كەتكەن وزگە ۇلتتاردىڭ قايتادان, ورالعاندا ىزدەگەنى – تىنىشتىق. الىس, جاقىن وركەندەگەن ەلدەرمەن, ءسوزىمىزدىڭ جاراسقانى – تىنىشتىق. باقىت, بايلىق ورناۋ ءۇشىن ماڭگىلىك, دەربەستىككە ەڭ كەرەگى – تىنىشتىق. قاز باسقان جاس مەملەكەتتى قولدايتىن, قازىرگى ەڭ جاناشىرى – تىنىشتىق. ءبارىمىزدىڭ قىزعىشتاي بوپ قورعايتىن, كوزىمىزدىڭ قاراشىعى – تىنىشتىق. نۇرلى كوش كولىكتى كوش, كورىكتى كوش – نۇرلى كوش, كوشكەن بويى تاريحقا كىردى كوش. الەمنىڭ ءار تۇكپىرىنەن قوزعالىپ, بەتىن اتامەكەنىنە بۇردى كوش. شىنىندا بۇل كوش وزگەدەن كورىكتى, ەلى-جۇرتى ارناپ ەنشى ءبولىپتى. جەر دە دايىن, سىباعاڭ دا تۇر مىنە, بۇرىن-سوڭدى مۇندايدى كىم كورىپتى؟! ءار وبلىس, ءار اۋدان, ءار اۋىلدا, جاڭا ۇيلەر ساپ تۇزەپ تۇر باۋىرعا. ەگىن سالساڭ, اڭىز كۇتەر دالاڭدا, مال وسىرسەڭ, ءورىس ءازىر تاۋىڭدا. اتىنا ساي بۇل كوش ناعىز نۇرلى كوش, سەگىز قىرلى, شىنايى ءبىر سىرلى كوش. «قايدا بارام, نە كۇن كورەم» دەمەيدى, تۋعان ەلى تۇردى كۇتىپ ەرتە-كەش. جول تۇزەلدى, سەن دە ەندى تۇزەل كوش, ەندى ءالىپتىڭ ارتىن باعىپ تۇك ونبەس. «ۇرپاعىمنان ايىرىلامىن» دەمەسەڭ, ءبىرىڭ قالماي قوپارىلا تۇگەل كوش!بايتەرەك
كوز تارتىپ تۇر بايتەرەك, ەمەس بۇل ءزاۋلىم ءجاي تەرەك. ەرتەدەن جەتكەن ەرتەگى اتىنا زاتى ساي تەرەك. اقشا بۇلتتى جامىلىپ, ۇيا سالعان سامۇرىق. بالاپان جىلدا باسادى ساۋلىعىن تىلەپ قامىعىپ. سامۇرىق كەتسە جەم ىزدەپ, ءبىر ايداھار جىلدا كەپ, بالاپانىن قىلعۋدى جالماۋىز جاۋىز قىلدى ادەت. الىستان باتىر دەربەستىك بۇل سۇمدىقتى كەلدى ەستىپ. ايداھاردىڭ باسىن شاپتى دا بالاپانعا ءومىر بەردى ءوستىپ. بالاپاندار امان ۇشادى, بايتەرەك سونىڭ نىشانى. بەيبىتشىلىك قۇردى سالتانات, ەلگە اشىق ماڭگى قۇشاعى.اق باتا
ەلباسىمىز الىستى كورسىن, ەل-جۇرتىمىز تابىستى بولسىن. قىزدارىمىز سۇلۋ, ۇلدارىمىز نامىستى بولسىن! كورشىلەرىمىز تىنىش بولسىن, تاڭداعانىمىز جۇمىس بولسىن. مالىمىز تولدەپ, ەگىنىمىز كوكتەپ, داستارقانىمىزعا ىرىس تولسىن! نارىق قالتانى قاقپايتىن بولسىن, تەڭگەمىز تەڭدىك ساقتايتىن بولسىن. قازاقستاننىڭ بارلىق ازاماتتارى قازاقشا سويلەپ, العا اتتايتىن بولسىن! بانكتەر دە تەڭگەنى توپتايتىن بولسىن, سىبايلاس جەمقورلىق توقتايتىن بولسىن. ۇلت ارازدىعى ەشقاشان بولماعانىنداي داعدارىس تا بىزگە سوقپايتىن بولسىن! بالالارىمىزدىڭ باعى جانسىن, قالاعان ءبىلىمىن السىن. ءتىلىن, ءدىنىن, ءداستۇرىن ءبىلىپ, ون ساۋساعىنان ونەرى تامسىن! مادەنيەتىمىز ءماندى بولسىن, تۇرمىسىمىز ءساندى بولسىن. ءبارىن ايت تا ءبىرىن ايت, دەربەستىگىمىز ماڭگى بولسىن! ورازاقىن اسقار, حالىقارالىق «الاش» سىيلىعىنىڭ لاۋرەاتى. الماتى.