قىلمىستى اشۋمەن, قىلمىسكەرلەردى ىزدەستىرۋمەن اينالىساتىن ءتارتىپ ساقشىلارى كۇندەلىكتى جۇمىستارىندا نەبىر قيىندىقپەن بەتپە-بەت كەزىگەدى. قاندىقول قىلمىسكەرلەردى دەر كەزىندە ۇستاپ, قىلمىستىڭ جەدەل اشىلۋىنا مۇرىندىق بولىپ جۇرگەن ولاردىڭ ەڭبەگى وراسان. وسى ورايدا ءبىز قاراعاندى قالالىق ءىىب وڭتۇستىك-شىعىس پب كريمينالدىق پوليتسيا بولىمشەسى باستىعىنىڭ ورىنباسارى, پوليتسيا مايورى مۇراتحان مايلاياقوۆ جايىندا اڭگىمە ءوربىتۋدى ءجون كوردىك.
«قاي جۇمىستى الىپ قاراساڭ دا, ارقايسىسىنىڭ ءوز قيىندىعى بار. اسىرەسە قىلمىستىق ىزدەستىرۋ سالاسىندا قىزمەت ەتۋ كەز كەلگەننىڭ قولىنان كەلە بەرمەيدى», – دەيدى كەيىپكەرىمىز مۇراتحان ورازالى ۇلى. سەبەبى بۇل قىزمەت اسقان تاباندىلىق پەن قايسارلىقتى قاجەت ەتەدى. باستاپقىدا جەدەل قىزمەتتە جۇمىس ىستەگىسى كەلىپ نيەت تانىتاتىن جاستار كوپ بولادى, بىرتە-بىرتە ءومىردىڭ اعىمىمەن قىزمەتتىڭ اۋىرلىعىنا توتەپ بەرە الماي, قاتارى سەلدىرەي بەرەدى.
مۇراتحان ىشكى ىستەر ورگاندارىنداعى قىزمەتىن 2007 جىلدان قاراعاندى قالاسى, وكتيابر پوليتسيا ءبولىمىنىڭ ۋچاسكەلىك پوليتسيا ينسپەكتورىنىڭ كومەكشىسى لاۋازىمىنان باستادى. 2008-2013 جىلدار ارالىعىندا وڭتۇستىك-شىعىس پوليتسيا ءبولىمىنىڭ جەدەل ۋاكىلى, ال 2013 جىلدان بەرى قاراي وڭتۇستىك-شىعىس پوليتسيا ءبولىمى كريمينالدىق پوليتسيا بولىمشەسى باستىعىنىڭ ورىنباسارى بولىپ قىزمەت ەتۋدە. مۇراتحان ورازالى ۇلىنىڭ اكەسىن بىلەتىن, كوزكورگەن اعا ارىپتەستەرى وعان «ورازالىنىڭ ۇلى» دەپ قۇرمەتپەن قارايدى.
«جاقسى اكە بالاعا قىرىق جىل ازىق» دەمەكشى, مۇراتحاننىڭ اكەسى ورازالى كوكمان ۇلى ءوزىنىڭ سانالى عۇمىرىن ىشكى ىستەر ورگاندارىنا ارنادى. ونىڭ وسى ادال قىزمەتى مەن ءىسىن بىرگە قىزمەت ىستەگەن ازاماتتار ءالى كۇنگە ۇمىتپايدى.
ماسەلەن, ول كىسى وڭتۇستىك-شىعىس پوليتسيا ءبولىمى باستىعىنىڭ كادر جۇمىسى جونىندەگى ورىنباسارى, پوليتسيا پودپولكوۆنيگى ەرلان تەمىرحان ۇلىنىڭ ۇستازى بولعان ەكەن. «كوپ نارسەنى ماعان ۇيرەتىپ, كورسەتكەن سول كىسى. ول كەزدە وڭ مەن سولىمىزدى جاڭا عانا تانىپ كەلە جاتقان جاس قىزمەتكەرمىز. ارينە, كەمشىلىكسىز ادام بولمايدى. بەرىلگەن تاپسىرمالاردى ورىنداۋدا قاتەلىكتەرگە بوي الدىراتىنبىز. سوندا اسا ءبىر سالماقتىلىق پەن توزىمدىلىك تانىتىپ, ءوزىنىڭ بىلگەنىن ايتىپ, جول سىلتەپ وتىراتىن», – دەپ ەسكە الادى ەرلان.
وڭتۇستىك-شىعىس پوليتسيا ءبولىمى باستىعىنىڭ ورىنباسارى بولعان ورازالى كوكمان ۇلى كەيىن اكىمشىلىك پوليتسيا ءبولىمىنىڭ باستىعى, ال زەينەتكەرلىككە شىعار الدىندا وبلىستىڭ ىشكى ىستەر دەپارتامەنتىندە ءبولىم باستىعى بولدى. قاراپ وتىرعانىمىزداي, وڭتۇستىك-شىعىس پوليتسيا ءبولىمى مايلاياقوۆتار اۋلەتى ءۇشىن سونداي ىستىق, سونداي جاقىن.
پوليتسيا مايورى مۇراتحان ورازالى ۇلىنىڭ كۇندەلىكتى قىزمەتى قۇپيا ءىس جۇرگىزۋ, قىلمىسكەرلەردى ىزدەۋ, مايىتتەردى انىقتاۋ, قىزمەتتى ۇيىمداستىرۋ جانە باقىلاۋ سىندى مىندەتتەردەن تۇرادى. قاراماعىنداعى قىزمەتكەرلەردىڭ جۇمىسىن قاداعالاپ, ونى دۇرىس ۇيىمداستىرۋ باستى مىندەتى بولسا, ودان بولەك تاجىريبەسىن جاس قىزمەتكەرلەرمەن ءبولىسىپ, تالىمگەرلىك قىرىنان دا تانىلىپ ءجۇر.
مۇراتحان ورازالى ۇلى تەك ۇلگىلى قىزمەتكەر عانا ەمەس, سونىمەن قوسا اياۋلى جار, ارداقتى اكە, ءبىر شاڭىراقتىڭ وتاعاسى. جۇبايى ايدا ەكەۋى ديليارا مەن دانيال ەسىمدى ەكى بالانى تاربيەلەپ, باقىتتى عۇمىر كەشۋدە.
ينديرا ەردانقىزى
قاراعاندى