تاياۋدا «اتامەكەن» ۇلتتىق كاسىپكەرلەر پالاتاسىنىڭ سەزىندە ەلىمىزدەگى شاعىن بيزنەس وكىلدەرىن پالاتاعا مۇشەلىك جارنا تولەۋدەن تاعى 3 جىلعا بوساتۋ تۋرالى شەشىم قابىلداندى.
ۇلتتىق كاسىپكەرلەر پالاتاسى قۇرىلعان كۇننەن باستاپ ءىرى جانە ورتا بيزنەستىڭ 22 مىڭ وكىلى جارنا تولەۋشى بولىپ سانالادى. قالعان 980 مىڭ مۇشە مىندەتتى جارنا تولەۋدەن 5 جىلعا بوساتىلعان بولاتىن. جارنادان نەگىزىنەن شاعىن كاسىپكەرلەر, شارۋا جانە فەرمەرلىك قوجالىقتار بوساتىلىپ وتىر.
2015 جىلى مىندەتتى مۇشەلىك جارنالار بويىنشا ەرەجەلەر قايتا قارالىپ, ونىڭ كولەمى ءبىرشاما ازايتىلعانىن اتاپ ءوتۋ كەرەك. سول جىلى قابىلدانعان وزگەرىستەرگە سايكەس, مۇمكىندىگى شەكتەۋلى جاندارعا جۇمىس بەرىپ وتىرعان كاسىپورىندار دا جارنادان تولىق بوساتىلعان-دى. ناتيجەسىندە جالپى مىندەتتەمەلەر 2 ەسە تومەندەتىلدى.
«اتامەكەن» قر ۇكپ باسقارما توراعاسىنىڭ ورىنباسارى ەلدوس رامازانوۆتىڭ ايتۋىنشا, قازىرگى تاڭدا شاعىن بيزنەسكە قوسىمشا قارجىلىق اۋىرتپالىق سالۋدىڭ قاجەتتىلىگى جوق. بۇل جەڭىلدىك ولاردىڭ جۇمىسىن ءبىرشاما جەڭىلدەتۋگە ءتيىس. ۇلتتىق پالاتانىڭ قىزمەت بارىسىندا وسى تەكتەس ەرەكشەلىكتەردىڭ بولعانى, باقىلاۋدىڭ اشىق ءارى تۇسىنىكتى جۇرگىزىلۋى بيۋدجەت قارجىسىن ۇنەمدى ءارى تولىمدى پايدالانۋعا مۇمكىندىك بەرەدى.
ارنۇر اسقار,
«ەگەمەن قازاقستان»