وسىدان 20 جىل بۇرىن الماتى وبلىسى, قاراساي اۋدانىنداعى 40 مەكتەپتىڭ بىرەۋى عانا قازاق مەكتەبى ەدى. وسى مەكتەپتى ەلباسىمىز نۇرسۇلتان نازارباەۆ ءبىتىرىپ شىققان بولاتىن. بۇل ءبىلىم ۇياسىنىڭ تاريحىنا حالقىمىز ەلباسىمىزدىڭ ءومىر وتكەلدەرى ارقىلى جاقسى قانىق.
سول كەزدە قاسكەلەڭ قالاسىنىڭ ىرگەسىنە ءتيىپ تۇرعان المالىباق پەن جالپاقساي اۋىلىنىڭ جۇرتشىلىعىنا قازاق مەكتەبى اۋاداي قاجەت بولدى. بۇعان جۇدىرىقتاي جۇمىلىپ, اۋىل ادامدارىنىڭ ءبىر اۋىزدان باستارىن قوسقان كوزدەرى اشىق, كوكىرەكتەرى وياۋ ادامدار دا تابىلدى. ولار تيىستى جەرلەرگە ورىندى ۇسىنىستارىمەن شىعىپ, قالىڭ بۇقارانىڭ كوكەيكەستى ماسەلەسىن كوتەرە بەرۋدەن كوڭىلدەرى جاسىعان جوق. كەلەر كۇندەردەن ۇمىتتەرى مەن كۇدەرلەرىن ۇزبەدى.
«كوپ تىلەۋى – كول» دەگەن ەمەس پە. تاۋەلسىزدىگىمىزدىڭ ارايلى تاڭى اتقاندا المالىباقتىقتاردىڭ دا ارمانى جۇزەگە اسادى. جاڭا قازاق مەكتەبىنىڭ اشىلۋى تاۋەلسىزدىكپەن تۇسپا-تۇس ورايلاستى. وعان الەم تانىعان عۇلاما ءابۋناسىر ءال-ءفارابيدىڭ اتىمەن اتاۋعا عالىم, بيولوگيا عىلىمدارىنىڭ دوكتورى ءايىپ ىسقاقوۆ ۇسىنىس جاسادى. سولاي بولدى دا.
سول 1991 جىلى مەكتەپ تابالدىرىعىن 339 وقۋشى اتتادى. ساناۋلى عانا ۇستازدار توبى بولدى. بۇل كورسەتكىش جىل وتكەن سايىن تولىعىپ, ماتەريالدىق-تەحنيكالىق جاعدايى دا جاقسارا باستادى. شىن مانىندەگى ساپالى ءبىلىم ورداسىنا اينالدى. ۇلتتىق ينتەلەكتۋالدىق ەرەكشەلىكتەرى دە اۋدان, وبلىس ەمەس, رەسپۋبليكا نازارىن اۋدارىپ ۇلگەردى. وعان مىنا جەتىستىكتەرى ناقتى دالەل بولارلىق.
مەكتەپ كوپ ۋاقىت وتپەي-اق ارناۋلى ورتا مەكتەپ مارتەبەسىن الدى. ال ءتورت جىلدان كەيىن كوپ سالالى مەكتەپ-گيمنازيا, ودان سوڭ دارىندى بالالارعا ارنالعان ءۇش تىلدە وقىتاتىن گيمنازيا مارتەبەسىن يەلەندى. قازىر مۇندا 861 وقۋشى, 37 سىنىپ كومپلەكتىسى بار. مۇنداعى مۇعالىمدەردىڭ بىلىكتىلىگى دە جوعارى. گيمنازياداعى 121 ۇستازدىڭ 2-ءى ى.التىنسارين اتىنداعى توسبەلگىنىڭ, 8-ءى قازاقستان رەسپۋبليكاسىنىڭ ءبىلىم ۇزدىگى, 45-ءى جوعارى جانە 1 ساناتتىڭ يەگەرلەرى. گيمنازيادا عىلىم دوكتورلارى مەن كانديداتتار دا بارشىلىق. ءبىلىم بەرۋدىڭ جاڭا تەحنولوگياسىن ەركىن مەڭگەرگەن ۇيىمشىل ۇجىم باسەكەلەستىككە قابىلەتتىلىكتەرىن كورسەتۋدە ۇلكەن بەدەل مەن ابىرويعا بولەنىپ ءجۇر. قازىر اتالعان گيمنازيا رەسپۋبليكامىزداعى 33 گيمنازيانىڭ كوش باستاۋشىلارىنىڭ قاتارىندا اۋىزعا الىنىپ كەلەدى.
وتكەن كۇنى قۇرىلىمدىق مەرەكەسى تاۋەلسىزدىگىمىزدىڭ 20 جىلدىعىمەن قاتار كەلگەن گيمنازيا ۇجىمى مەن وقۋشىلارى بۇل مەرەكەلەرىن ەستە قالارلىقتاي سالتاناتتى جاعدايدا اتاپ ءوتتى. جان-جاقتان شاقىرىلعان قوناقتار دا كوپ بولدى. گيمنازيانىڭ بۇرىن ءبىتىرىپ كەتكەن تۇلەكتەرى دە شەت قالماعان. سالتاناتتى وسى باسقوسۋدا گيمنازيا ديرەكتورى ناعيما ساعاتقىزى جەتكەن جەتىستىكتەرىن باستان-اياق اعىنان جارىلا بايانداپ بەردى. سونداي-اق, الماتى وبلىستىق, اۋداندىق ءبىلىم باسقارمالارى مەن وبلىستىق ءبىلىم جەتىلدىرۋ ينستيتۋتى, قازاقتىڭ وسىمدىك جانە ەگىنشىلىك عىلىمي-زەرتتەۋ ورتالىعى, اۋداندىق اكىمدىك پەن اۋىل تۇرعىندارى جانە ءبىتىرىپ كەتكەن تۇلەكتەرى اتىنان سويلەگەن ادامدار اتاعى مەن ابىرويى الىسقا كەتكەن گيمنازيانىڭ كەمەل كەزەڭگە قادام جاساپ بارا جاتقانىن ىستىق ىقىلاستارىمەن اتاپ ءوتتى. وسى ءبىلىم ورداسىنا ەلەۋلى ەڭبەك ءسىڭىرگەن ارداگەر-ۇستازدار مەرۋەرت سارگەلەكوۆا, راۋشان داۋىتقۇلوۆا, كلارا الدابەرگەنوۆا, گۇلبارشىن داۋلەتباەۆا, ناعيما ساعاتوۆا, الدوڭعار ەگەۋباەۆ, تاعى باسقا كوپتەگەن ۇستازداردىڭ جاس ۇرپاققا بەرگەن ۇلاعاتى لايىقتى باعاسىن الدى.
گيمنازيا ۇجىمىنىڭ 20 جىلدىعى وسىلايشا تاۋەلسىزدىك مەرەكەسىمەن بىرگە كەڭىنەن اتالىپ ءوتتى. جينالعان جۇرتشىلىق گيمنازيانىڭ سان الۋان كوركەمونەرپازدار ۇيىرمەلەرىنىڭ ونەرلەرىن تاماشالادى. تاۋەلسىزدىك قۇرداسىنىڭ سالتاناتتى قۋانىشى قايتالانباس ەرەكشەلىگىمەن ەلدىڭ ەسىندە قالدى.
قانات تاكەباەۆ, جۋرناليست.
الماتى وبلىسى,
قاراساي اۋدانى,
المالىباق اۋىلى.
سۋرەتتە: مەرەكەلى ساتتەن كورىنىستەر.