ۇلتىمىزدا ء«بىر كىسى قازعان قۇدىقتان مىڭ كىسى سۋ ىشەدى» دەگەن ءسوز بار. ال ساۋلەتشى جوبالاعان شارلەردە جۇزدەگەن مىڭ ادامدار تۇرادى.
بۇل شەبەردىڭ قولى ورتاق ەكەنىن ەرتەدەن ەسكەرگەن ەلدىڭ تىلەگى كىمنىڭ ۇستىندە ەكەنىن كورسەتسە كەرەك. ءومىردىڭ ءوزى زەردەلەي قاراعان جانعا ۇزدىك ۇيلەسىم ۇلگىسى ىسپەتتى. سونىڭ ءبىرى اسەم دە ايدىك عيماراتتار تۇرعىزۋ. ارينە, سىلاعاننىڭ ءبارى سىلانىپ شىعا كەلمەيدى. كوركەم كوزقاراس, تەرەڭ تانىم, جۇيرىك وي وسىندايدا كەرەك. ساۋلەتشى تولەندى جامانكوزوۆ تە 20 جىل بۇرىن ەلوردا ارقا توسىنە كوشكەندە ەل استاناسىن كوركەيتۋگە ەرەكشە قۇلشىنىپ كىرىسكەندەر قاتارىنان بولاتىن.
ساۋلەتشى ءسابي شاعىندا قارىنداش سىندىرىپ ويناماسا دا قولىنا ىلىككەن دۇنيەمەن سۋرەت سالعاندى جانى ءسۇيىپتى. ويىن بالاسىنىڭ ونەرگە يكەمى بارىن اكە دە بايقايدى. بۇل سوعىستان كەيىنگى قيىن جىلدار ەدى. جوقشىلىق قىسىپ تۇرعان, قىل اياعى بالالاردىڭ قالام-قاعازى دا جەتىسپەيدى. بىردە بالا تولەندىنىڭ وتتىڭ ك ۇلىمەن سۋرەت سالىپ وتىرعانىن كورگەن اۋىل اقساقالدارى تولەۋبەككە « ۇلىڭنىڭ سۋرەت سالۋعا قۇشتارلىعى ەرەكشە ەكەن, وسى باستان ونەرگە باۋلى» دەپ اقىل قوسادى. تولەندىنىڭ تۋعان توپىراقتان تامىر تارتقان تانىم قاينارى وسىلاي باستالىپ ەدى...
الماتىدا پوليتەحنيكالىق ينستيتۋتتى «ساۋلەتشى» ماماندىعى بويىنشا بىتىرگەن ونىڭ قاتار وقىعان دوستارىنىڭ قاتارىندا ايگىلى «دوس-مۇقاسان» ءانسامبلىنىڭ قۇرامىندا بولعان ونەرلى جىگىتتەر دە ءجۇردى. سول جىلدارى بۇلبۇل داۋىستى روزا باعلانوۆانىڭ قولىنان ءدام تاتىپ, باتاسىن العانى دا ەرەكشە ءبىر ەستە قالارلىق ساتتەر بولاتىن. ەڭبەك جولىن قاراعاندى قالاسىنان باستاعان ول جەرگىلىكتى تۇڭعىش كاسىبي ساۋلەتشىلەردىڭ ءبىرى بولدى. «كاراگانداگورسەلپروەكت» مەملەكەتتىك جوبالاۋ ينستيتۋتىندا اۋقىمدى جوبالارعا قاتىسقان تولەندى 1989-1990 جىلدارى چەرنوبىل اتوم ەلەكتر ستانساسىندا قۇرىلىسشى-ينجەنەر بولىپ ەڭبەك ەتتى.
1998 جىلى ەلورداعا كەلگەن ساۋلەتشىلەر قاتارىندا ارقا توسىندەگى جاڭا استانانىڭ زەڭگىر اسپانعا قول سوزعان عيماراتتارىنىڭ كۇندەي ك ۇلىمدەپ, كوركەيە ساپ تۇزەۋىنە ءبىر كىسىدەي ۇلەس قوستى. 2000 جىلى «ORTA» جوبا-قۇرىلىس كومپانياسىنىڭ باس ساۋلەتشىسى, «اقتوبەمۇنايگاز» ااق, «دۋباي سترويحولدينگ» جشب, «توRE-CHINGIZIT LTD» كومپانيالارىنىڭ باس ساۋلەتشىسى, جوبالاردىڭ باس ينجەنەرى بولىپ ەڭبەك ەتتى. كۇن ساناپ ارايلانعان استانا كوڭىلىن دە ءوسىردى, شالقار شابىت سىيلادى. ەلىمىزدىڭ قۇرمەتتى ساۋلەتشىسى, كسرو جانە قازاقستان ساۋلەتشىلەر وداعىنىڭ مۇشەسى ت.جامانكوزوۆ «استانانىڭ 10 جىلدىعى» مەدالىمەن ماراپاتتالدى. زايىبى زويا دۇيسەبايقىزىمەن بىرگە وسىرگەن قىزدارى اريلانا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وقىتۋشىسى بولسا, ءلاززات بىلىكتى قۇرىلىسشى, نەمەرەسى اينۇر زاڭگەر بولىپ ەڭبەك ەتۋدە. بەرەكەلى شاڭىراقتىڭ ۇيىتقىسى بولىپ وتىرعان تولەندى تولەۋبەك ۇلى ساۋلەتشىلىكتىڭ سىنى عيماراتتاردىڭ ساپاسى مەن سانىندە ەكەنىن, ەڭ باستىسى ەڭبەكتىڭ ەرلىككە, ەرلىكتىڭ ەلدىككە جەتكىزەتىنىن ايتادى.
دۋمان اناش,
«ەگەمەن قازاقستان»