مەملەكەت باسشىسى نۇرسۇلتان ءابىش ۇلى نازارباەۆتىڭ شىمكەنتكە رەسپۋبليكالىق قالا دارەجەسىن بەرۋ تۋرالى جارلىققا قول قويعانىن بارشامىز اسقان قۋانىشپەن قارسى الىپ وتىرمىز. وسى ساتتەن باستاپ ەلىمىزدە ءۇشىنشى مەگاپوليس, ون جەتىنشى ايماق پايدا بولدى.
شىنىندا دا تاريحي سانالاتىن بۇل ساتكە ءبىز ۇزاق ۋاقىت دايىندالدىق. ەندى استانا جانە الماتى تۇرعىندارىمەن بىرگە شىمكەنتتىكتەر دە ميلليوندى مەگاپوليس تۇرعىندارى اتانىپ وتىر.
ءبىزدى الدا ۇلكەن وزگەرىستەر كۇتىپ تۇر. ەڭ باستىسى, بۇل جاڭالىق شىمكەنت قالاسىن ودان ءارى دامىتۋعا جاڭا مۇمكىندىكتەر تۋعىزىپ, وڭ اسەرىن تيگىزەدى دەپ سەنەمىز. سەبەبى بىرىنشىدەن, ەلباسى اتاپ وتكەندەي, شىمكەنت تۇتاس ورتالىق ازيا ايماعىنا ينۆەستيتسيالار, تەحنولوگيالار جانە ينتەللەكتۋالدىق رەسۋرستاردى تارتاتىن جاڭا ورتالىق بولادى.
ەكىنشىدەن, الەۋمەتتىك باعدارلامالاردى قارجىلاندىرۋ كولەمى ارتادى, تيىسىنشە, بالاباقشا مەن مەكتەپ, اۋرۋحانا مەن تۇرعىن ۇيلەر كوپتەپ سالىنادى.
ۇشىنشىدەن, مەگاپوليستىڭ دامۋى قالا تۇرعىندارىنىڭ تۇرمىستىق جاعدايىن جاقسارتىپ, حالىقتى كوممۋنالدى قاجەتتىلىكپەن قامتاماسىز ەتۋ دەڭگەيى كوتەرىلەدى.
ءبىز تاريحي ءساتتىڭ, جارقىن جاڭالىقتار مەن اۋقىمدى رەفورمالار قارساڭىندا تۇرمىز. قازاقستاندا ءۇشىنشى مەگاپوليستىڭ پايدا بولۋى – اسقان جەتىستىك, ەلىمىز دامۋىنىڭ ايقىن كورسەتكىشى.
مىڭداعان جىلدىق تاريحى بار قالا ەندى اقىلدى, قاۋىپسىز ءارى كوركەم مەگاپوليسكە اينالادى! بۇل – بارشا قازاقستاندىققا ورتاق جەڭىس! دامۋدىڭ دۇرىس جولىنىڭ كورسەتكىشى.
نۇرلان ساۋرانباەۆ,
شىمكەنت قالاسىنىڭ اكىمى