الەم چەمپيوناتىنىڭ ءتورتىنشى كۇنى ورتاڭقول قۇرامالار ساناتىنداعىلار تورگە وزدى. ال بىرىنشىلىكتىڭ باستى فاۆوريتتەرى ۇپايدان شاشاۋ شىعاردى. برازيليا كۇتپەگەن جەردەن شۆەيتساريامەن تەڭ تۇسسە, الەم چەمپيونى گەرمانيا مەكسيكادان جەڭىلىپ قالدى. جاھاندىق جارىستىڭ العاشقى قىزىقتارى وسىلاي باستالدى.
40 جىلدان كەيىنگى ساتسىزدىك
ءدال وسىنشاما جىل بويى الەم چەمپيوناتتارىنداعى العاشقى ويىندارىندا برازيليا ەشقاشان ۇپايدان شاشاۋ شىعارماپتى. العاشقى ويىندارىن ۇنەمى جەڭىسپەن باستاپ وتىرعان ەكەن. شۆەيتسارياعا قارسى وتكەن ويىن برازيليالىقتار ءۇشىن جاقسى باستالىپ ەدى. كەزدەسۋدىڭ 20-مينۋتىندا فەليپە كوۋتينو الىستان جويقىن سوققى باعىتتاپ, ەسەپ اشقان.
الايدا «سەلەساو» ويىنشىلارى باسىمدىقتى ۇستاپ تۇرا المادى. ەكىنشى تايمدا شۆەيتساريا فۋتبولشىسى تسۋبەر تارازى باسىن تەڭەستىردى. نەيمار, جەزۋس, كوۋتينو, فيرمينو باستاعان سايىپقىراندار قانشا شابۋىلداعانىمەن, جەڭىستى گولعا شامالارى جەتپەدى. الەمنىڭ 5 دۇركىن چەمپيونى برازيليا ەندى 22 ماۋسىم كۇنى كوستا-ريكامەن كەزدەسەدى.
جاناردان اققان جەڭىستىڭ جاسى
گەرمانيا الەم چەمپيونى بولا تۇرا, العاشقى ويىنىن جەڭىلىسپەن باستادى. مەكسيكا قۇراماسى كىشىگىرىم سەنساتسيا جاسادى. كولۋمبيالىق باپكەر وساريونىڭ كەرەمەت تاكتيكاسىنىڭ ارقاسىندا مەكسيكا 1:0 ەسەبىمەن بۋندەس كوماندادان باسىم ءتۇستى. ويىن اياقتالعان سوڭ مەكسيكا شابۋىلشىسى حاۆەر ەرناندەس جانارىنا جاس الدى. بۇل ەلدىڭ جانكۇيەرلەرى دە الەم كۋبوگىن ۇتقانداي قۋانىپ, ماسكەۋدە ۇلكەن توي جاسادى.
ايتا كەتەيىك 1998 جىلى چەمپيون بولعان فرانتسيا كەلەسى بىرىنشىلىكتى جەڭىلىسپەن باستاعان. ال ودان كەيىن يتاليا مەن يسپانيا دا تۋرا وسىنداي جاعدايدى باستان وتكەرىپ ەدى.
مەكسيكا قۇراماسى ەندى 23 ماۋسىم كۇنى وڭتۇستىك كورەيامەن كەزدەسەدى.
كالينيچ كوماندادان قۋىلۋى مۇمكىن
حورۆاتيا قۇراماسىنىڭ شابۋىلشىسى نيكولا كالينيچ كوماندادان قۋىلۋى مۇمكىن دەپ حابارلادى الەمدىك باق. كوماندانىڭ باس باپكەرى زلاتكو داليچ نيكولانى نيگەرياعا قارسى وتكەن ويىننىڭ 85-مينۋتىندا الاڭعا شىعارماقشى بولعان. الايدا نيكولا الاڭعا شىعۋدان باس تارتادى. باپكەر تاپسىرماسىن ورىنداماعانى ءۇشىن ول كوماندادان قۋىلاتىن سەكىلدى.
حورۆاتيالىق تىلشىلەردىڭ جازۋى بويىنشا, «ميلان» ساپىندا ونەر كورسەتەتىن كالينيچ باپكەرگە بۇرىننان ريزا ەمەس ەكەن. نەگىزگى قۇرامدا الاڭعا شىعۋدى جوسپارلاعان نيكولا قوسالقى قۇرامدا قالعانىنا قاتتى قاپالانعان. بۇل وقيعا «شاقپاق جەيدەلىلەر» ءۇشىن جاعىمسىز اسەر بەرگەنى انىق. ەستەرىڭىزگە سالا كەتسەك, حورۆاتيا نيگەريانى سول ويىندا 2:0 ەسەبىمەن جەڭگەن ەدى.
پوگبا گولىنان ايىرىلدى
فيفا فرانتسيا قۇراماسىنىڭ جارتىلاي قورعاۋشىسى پول پوگبانىڭ سوققان گولىن ءازيز بەحيچتىڭ اتىنا جازدى. فرانتسيا – اۋستراليا اراسىنداعى ويىننىڭ 81-مينۋتىندا پول پوگبا قاربالاسقان ساتتە قاقپاعا گول سوعىپ, فرانتسيا جەڭىستى ج ۇلىپ اكەتتى. تورەشىلەر حاتتاماعا گول اۆتورى پول پوگبا دەپ جازدى. بىراق كەيىننەن بەينەقايتالاۋدان انىقتالعانداي, گولدىڭ اۆتورى اۋستراليا قۇراماسىنىڭ قورعاۋشىسى ءازيز بەحيچ ەكەن. جاڭادان ەنگىزىلگەن بەينەقايتالاۋ جۇيەسى وسىنداي شەشىمگە كەلىپتى. ەندى بۇكىل ستاتيستيكالىق حاتتامالاردىڭ بارلىعىندا كەتكەن ولقىلىق قايتا تۇزەتىلەدى.
فرانتسيا قۇراماسى كەلەسى ويىنىن 21 ماۋسىم كۇنى پەرۋگە قارسى وتكىزەدى.
ەرمۇحامەد ماۋلەن, «ەگەمەن قازاقستان»