تۇركسوي حالىقارالىق ۇيىمىنىڭ ۇيىتقى بولۋىمەن تۇركيادا ءداستۇرلى ونەر فەستيۆالى ءوتتى.
مەرەكەگە ءتۇبى ءبىر تۇركى ەلدەرى ازەربايجان, قازاقستان, قىرعىزستان مەن تۇركيادان ونەرپازدار قاتىستى. وسىناۋ فەستيۆالدە قىزىلوردا وبلىسىنىڭ تۇرماعامبەت اتىنداعى حالىق اسپاپتار وركەسترى قازاقتىڭ ءداستۇرلى ءان كۇيى مەن جىراۋلىق ونەرىن كوپشىلىككە سىيلاپ, ۇلكەن قۇرمەتكە يە بولدى.
تۇركسوي حالىقارالىق ۇيىمىنا بيىل – 25 جىل. ەلباسىمىزدىڭ باستاماسىمەن 1993 جىلى قۇرىلعان ىرگەلى ۇيىم وسى ۋاقىتقا دەيىن تۇركى الەمىنىڭ مادەني-رۋحاني دۇنيەسىن جان-جاقتى ناسيحاتتاپ, باۋىرلاس ەلدەر اراسىندا ىنتىماقتاستىقتىڭ نىعايۋىنا ولشەۋسىز ۇلەس قوسىپ كەلەدى.
– قىزىلوردا وبلىستىق فيلارمونيانىڭ جانىنان قۇرىلعان تۇرماعامبەت اتىنداعى حالىق اسپاپتار وركەسترى بۇل ونەر فەستيۆالىنە قازاق ەلىنىڭ, قالا بەردى سىر بويىنىڭ جانە الىس-جاقىن ەلدەردىڭ كومپوزيتورلارىنىڭ شىعارمالارىمەن كەلىپ, تۇركىتىلدەس ەلدەردىڭ ونەر فەستيۆالىنە قاتىسىپ جاتىر. مۇنداعى حالىق ءبىزدى وتە جىلى قابىلدادى. قوشەمەتتەرىن كورسەتىپ, كونتسەرتىمىزدى جاقسى تاماشالادى.
ونەر فەستيۆالىنىڭ گالا كونتسەرتى ەلدىڭ باس قالاسى – انكارادا اشىق اسپان اياسىندا ءوتتى. كەشكە قاتىسقان تۇركيانىڭ بەلگىلى ساياساتكەرلەرى, زيالى قاۋىم مەن حالىقارالىق ۇيىمداردىڭ وكىلدەرى ساحنادا جاسىنداي جارقىلداعان قازاقستاندىق ونەرپازدارىنىڭ شەبەرلىگىنە ءتانتى بولىپ, قۇرمەت-قوشەمەت ءبىلدىردى. ۇيىمداستىرۋشىلار كەلەسى جىلى بۇل فەستيۆالدىڭ اياسىن كەڭەيتىپ, ءداستۇرلى تۇردە وتكىزۋدى جوسپارلاپ وتىر,-دەيدى قىزىلوردا وبلىستىق فيلارمونيانىڭ ديرەكتورى تالعات ماقاشوۆ.
باقتيار تايجان,
«ەگەمەن قازاقستان»
قىزىلوردا وبلىسى