قىزىلوردا وبلىسىندا اۋىلدىق جەرلەردەگى ۇكىمەتتىك ەمەس ۇيىمداردىڭ بەلسەندىلىگى ارتتى

وبلىس اكىمى ۇكىمەتتىك ەمەس ۇيىمدارمەن كەزدەسۋ بارىسىندا الەۋمەتتىك جوبالاردى قالىپتاستىرۋ كەزىندە عىلىمي-زەرتتەۋ ورتالىقتارىمەن جۇرگىزىلگەن زەرتتەۋ جۇمىستارىنىڭ قورىتىندىسى, وڭىرلىك ستاتيستيكالىق كورسەتكىشتەر, باق-تار مەن ينتەرنەت رەسۋرستاردا ءجيى كوتەرىلەتىن ماسەلەلەر, ۇكىمەتتىك ەمەس ۇيىمداردىڭ باستامالارى ەسكەرىلە وتىرىپ ازىرلەنىپ جاتقانىن ايتتى.

«وبلىستا اۋىلدىق دەڭگەيدەگى ۇەۇ الەۋەتىن ارتتىرۋ ءۇشىن جەرگىلىكتى بيۋدجەتتەن قارجىلاندىرۋ كولەمى جىلدان-جىلعا ارتىپ كەلەدى. ماسەلەن, 2017 جىلعى 181 جوبانىڭ 100-ءى قىزىلوردا قالاسى جانە اۋدان اكىمدىكتەرىمەن ىسكە اسقان بولسا, اعىمداعى جىلعى 139 الەۋمەتتىك جوبانىڭ 79-ى اۋداندىق دەڭگەيدە جۇزەگە اسىرىلۋدا. وسى ورايدا جوبالارىڭ باسىم بولىگى قوعامدىق كەلىسىمدى جانە ۇلتتىق بىرلىكتى نىعايتۋعا, جاستار ساياساتىن ىسكە اسىرۋ مەن بالالار باستامالارىن قولداۋ, حالىقتىڭ الەۋمەتتىك تۇرعىدان وسال توپتارىنا قولداۋ كورسەتۋ الەۋمەتتىك قىزمەت سالالارىندا ەكەنىن اتاپ وتكەن ءجون», - دەدى وبلىس اكىمى.

سونداي-اق, ايماق باسشىسى قىزىلوردا وبلىسى ۇەۇ قىزمەتىن قارجىلاندىرۋ بويىنشا كوشباسشىلار قاتارىندا ەكەنىن اتاپ ءوتتى.

«2017 جىلدىڭ قورىتىندىسى بويىنشا قىزىلوردا وبلىسى ۇكىمەتتىك ەمەس ۇيىمداردىڭ قىزمەتىن بەلسەندى ەتۋ بويىنشا قارجىلاندىرۋ جاعىنان استانا مەن الماتى قالالارىنان كەيىن 3-ءشى ورىندى يەلەندى. بۇل سىزدەر مەن بىزدەردىڭ بىرلىكتە اتقارعان جۇمىسىمىزدىڭ ناتيجەسى دەپ بىلەمىن. بۇدان باسقا, ايماقتا ۇكىمەتتىك ەمەس ۇيىمداردى بيۋدجەتتەن تىس كوزدەردەن قارجىلاندىرىلادى», - دەدى ايماق باسشىسى.

اتاپ ايتقاندا, وڭىردە «داعدارىس جاعدايىنا تاپ بولعان بالالار مەن انالارعا ارنالعان الەۋمەتتىك قوناق ءۇي» جوباسى ىسكە اسىرىلۋدا. قازاقستان رەسپۋبليكاسى ءدىن ىستەرى جانە ازاماتتىق قوعام مينيسترلىگىنىڭ گرانتى نەگىزىندە جەرگىلىكتى ۇكىمەتتىك ەمەس ۇيىمدارعا ادىستەمەلىك كومەك كورسەتۋ ءۇشىن جاريالانعان كونكۋرستىڭ جەڭىمپازى بولىپ «قىزىلوردا وبلىسىنىڭ ازاماتتىق اليانسى» قاۋىمداستىعى ۇكىمەتتىك ەمەس ۇيىمدارعا ارنالعان رەسۋرستىق ورتالىق تاعايىندالدى.

وڭىرىمىزدەگى وڭتايلى ىستەردىڭ جالعاسى رەتىندە الەۋمەتتىك جوبالاردى ۇزاق مەرزىمدى قارجىلاندىرۋ ماسەلەسى, ونىڭ ىشىندە مۇگەدەك ازاماتتاردى وڭالتۋ مەن الەۋمەتتەندىرۋگە باعىتتالعان جوبالاردى قارجىلاندىرۋ ماسەلەسى وڭ شەشىمىن تاپقان. مىسالعا: مۇگەدەكتەردىڭ اقپاراتتىق تەحنولوگيالىق ساۋاتتىلىعىن كوتەرۋ, ەلەكتروندى اكىمدىك باعدارلاماسىن قولدانۋدى ۇيرەتۋ, «ينۆاتاكسي» الەۋمەتتىك جوبالارى.

بۇدان باسقا, ايماقتاعى قوعامدىق كەڭەستەردىڭ قىزمەتىن تۇرعىندار اراسىندا كەڭىنەن ناسيحاتتاۋ ماقساتىندا ۇكىمەتتىك ەمەس ۇيىمدارمەن بىرلەسىپ, قوعامدىق باقىلاۋدى دامىتۋ الەۋمەتتىك جوباسى ىسكە اسىرىلا باستادى.

جەرگىلىكتى قوعامدىق بىرلەستىكتەردىڭ باسشىلارى سالالارى بويىنشا جۇزەگە اسىرىلىپ جاتقان جوبالار تۋرالى بايانداما جاسادى.

كەزدەسۋ بارىسىندا بيلىك پەن ۇكىمەتتىك ەمەس ۇيىمداردىڭ ءوزارا قارىم-قاتىناسىن ورنىقتىراتىن كەڭەستەر جانە ورتالىق اتقارۋ ورگاندارىندا سالالىق ۇكىمەتتىك ەمەس ۇيىمدار قاتىسۋلارىمەن كونسۋلتاتيۆتىك-كەڭەستىك ورگانداردىڭ قىزمەت جاساۋى, ەلىمىزدىڭ الەۋمەتتىك مودەرنيزاتسياسىندا ۇكىمەتتىك ەمەس ۇيىمداردىڭ الاتىن ورنى مەن بيلىكپەن بىرلەسكەن ءىس-قيمىلدىڭ ماڭىزى جايلى ايتىلدى, ازاماتتىق قوعام وكىلدەرى ۇكىمەتتىك ەمەس سەكتورىن دامىتۋ شارالارى جايلى ۇسىنىس-پىكىرلەرىن ايتتى.