باسقوسۋدا 2018 جىلعى مەملەكەتتىك سىيلىقتى الۋ ءۇشىن كەلىپ تۇسكەن جۇمىستار, سونداي-اق ولاردىڭ تىركەلۋى, قارالۋى, قويىلاتىن تالاپتارعا سايكەستىگى تۋرالى اقپارات تىڭدالدى, دەپ حابارلايدى اقوردانىڭ ءباسپاسوز قىزمەتى.
كوميسسيا وتىرىسىن اشقان گۇلشارا ابدىقالىقوۆا ەلباسى نۇرسۇلتان ءابىش ۇلى نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنداعى «جاڭعىرۋ اتاۋلى بۇرىنعىداي تاريحي تاجىريبە مەن ۇلتتىق داستۇرلەرگە شەكەدەن قاراماۋعا ءتيىس. كەرىسىنشە, زامانا سىنىنان سۇرىنبەي وتكەن وزىق داستۇرلەردى تابىستى جاڭعىرۋدىڭ ماڭىزدى العىشارتتارىنا اينالدىرا ءبىلۋ قاجەت» دەگەن سوزىنە نازار اۋداردى.
– سىيلىق وتاندىق مادەنيەتتىڭ دامۋىنا قوسىلعان قۇندى ۇلەس بولىپ سانالاتىن ادەبيەت پەن ونەر سالاسىنداعى اسا ۇزدىك شىعارمالار ءۇشىن بەرىلەدى, – دەدى مەملەكەتتىك حاتشى.
كوميسسيا قاراۋىنا كەلىپ تۇسكەن جۇمىستار 3 سەكتسيا – ادەبيەت; مۋزىكا, تەاتر جانە كينو; بەينەلەۋ ونەرى جانە ساۋلەت سەكتسيالارى بويىنشا سارالاندى. سەكتسيالاردا جالعاسقان جاسىرىن داۋىس بەرۋ قورىتىندىسى بويىنشا بايقاۋدىڭ اقتىق كەزەڭىنە جىبەرىلەتىن شىعارمالار ىرىكتەلدى. كوميسسيانىڭ ورتاق شەشىمى بويىنشا كەلەسى كەزەڭگە وتكەن ۇمىتكەرلەر ءتىزىمى بەكىتىلدى.
قازاقستان رەسپۋبليكاسىنىڭ ادەبيەت پەن ونەر سالاسىنداعى مەملەكەتتىك سىيلىعىن بەرۋ جونىندەگى كوميسسيا تۋرالى ەرەجەگە سايكەس, اۆتورلار مەن جۇمىستار جونىندەگى اقپارات قوعامدا كەڭىنەن تالقىلانۋ ءۇشىن «ەگەمەن قازاقستان» جانە «كازاحستانسكايا پراۆدا» گازەتتەرىندە جاريالاناتىن بولادى.