شانحاي ىنتىماقتاستىق ۇيىمى اياسىندا تسيفرلاندىرۋ مەن جاڭا تەحنولوگيالار بويىنشا تاجىريبە الماساتىن الاڭ قۇرۋ قاجەت. بۇل تۋرالى بۇگىن قىتايدىڭ تسينداو قالاسىندا شانحاي ىنتىماقتاستىق ۇيىمىنا مۇشە مەملەكەتتەر باسشىلارىنىڭ كەڭەيتىلگەن قۇرامداعى وتىرىسىندا ەلباسى نۇرسۇلتان نازارباەۆ مالىمدەدى.
«الەمدە الەمدىك ۆاليۋتا سەبەتىن ءارتاراپتاندىرۋ, ۆاليۋتاعا تاۋەلدىلىكتى تومەندەتۋ جانە كريپتوۆاليۋتانىڭ پايدا بولۋى تۋرالى كوپ ايتىلىپ ءجۇر. وسىعان بايلانىستى ءبىز شىۇ-نىڭ بارلىق ەلدەرىنىڭ ۇلتتىق ۆاليۋتاسىندا ءوزارا ەسەپ ايىرىسۋعا كوشۋدى ەلدەرىمىزدىڭ ەكونوميكاسىنىڭ قاۋىپسىزدىك اسپەكتىلەرىنىڭ ءبىرى رەتىندە ويلاستىرعان ءجون. ءبىزدىڭ ەلدەرىمىزدىڭ ورتالىق بانكتەرى بۇگىنگى تسينداو سامميتىنەن كەيىن بىرگە باس قوسىپ, سايكەسىنشە جول كارتاسىن ازىرلەۋدى باستاي الار ەدى», - دەدى نۇرسۇلتان نازارباەۆ.
قازاقستان پرەزيدەنتى ءتورتىنشى ونەركاسىپتىك رەۆوليۋتسيا جاعدايىندا ەكونوميكانى تسيفرلاندىرۋ مەن روبوتتاندىرۋدا جاڭا تەحنولوگيالىق ترانسفورماتسيا ءجۇرىپ جاتقانىن ايتتى.
ەلباسى تسيفرلىق جانە زاماناۋي تەحنولوگيالاردى دامىتۋ ءۇشىن ءوزارا تاجىريبە الماسۋ قاجەتتىگىنە توقتالدى. ال شانحاي ىنتىماقتاستىق ۇيىمىنىڭ ەكونوميكالىق سەرپىلىس جاساۋىنا ينفراقۇرىلىمدىق مەگاجوبالار ىقپال ەتەدى. بۇل شارا مۋلتيپليكاتيۆتى اسەر بەرىپ قانا قويماي, ۇيىمعا مۇشە مەملەكەتتەردەگى مامانداردى جۇمىسپەن قامتيدى. بۇعان بەيجىڭ-استانا-ماسكەۋ-بەرلين باعىتىنداعى تەمىرجول ماگيسترالىنىڭ قۇرىلىسى مىسال بولا الادى. نۇرسۇلتان نازارباەۆ مۇنداي جوبالاردى قۇرىلىمعا مۇشە مەملەكەتتەردىڭ اياسىندا ىسكە اسىرۋدىڭ تيىمدىلىگىن اتاپ ءوتتى. ءارى بۇل باستامالار ەۋرازيالىق ەكونوميكالىق وداق پەن ۇيىمنىڭ ىقپالداستىعىن ارتتىرىپ, بولاشاقتا ەۋروپالىق وداقپەن دە تىعىز بايلانىس ورناتۋعا نەگىز بولا الادى. پرەزيدەنت ءسوز سوڭىندا بيزنەس قاۋىمداستىقتى «استانا» حالىقارالىق قارجى ورتالىعىمەن بىرلەسىپ جۇمىس ىستەۋگە شاقىردى.