حح عاسىردىڭ اياعىندا ىقىلىم زاماننان اڭساعان ارمانىنا جەتىپ, ءوز الدىنا تۋ كوتەرىپ, مەملەكەت قۇرعان ەر قازاقتىڭ ەلورداسىنىڭ اتى – استانا! استانا دەسە بويىندا قانى, كەۋدەسىندە جانى بار ءار قازاق ىشكەن اسىن جەرگە قويادى, قاناتىن كەڭگە جايادى, كورگەندە كوڭىلى تويادى. ازاتتىق پەن استانا ءبىرتۇتاس ۇعىم. ەلباسى كىندىگىن ءوزى كەسىپ, اتىن ءوزى قويعان استانا – بوستاندىقتىڭ بەل بالاسى, حالقىمىزدىڭ كوزىنىڭ نۇرى, جۇرەگىنىڭ جىرى, بابالارىمىزدىڭ بۇگىن جۇزەگە اسقان كەشەگى ارمانى, بالالارىمىزدىڭ ەرتەڭگە ءۇمىت ارتقان اسىل مۇراتى. بۇگىندە كوك بايراعى كوگىندە جايناپ, بايتەرەگى بيىككە بويلاپ, 20 جاسقا تولعانىن تويلاپ جاتقان اقوردالى استانا – جەر شارىنداعى ەڭ جاس قالا!
بىزدەر – بىرلىگى جاراسقان قازاقستان حالقى ىرگەلى ەلدەردىڭ ءىرى قالالارىمەن جاستىعىنا قاراماستان ۇزەڭگى قاعىستىرىپ, يىق تەڭەستىرىپ, سان قيلى ساياساتتا سەركەلىك تانىتىپ, الەمدى اۋزىنا قاراتىپ وتىرعان استانامىزبەن شاتتانۋعا دا, ماقتانۋعا دا تولىق حاقىمىز بار. بۇل تۇرعىدان العاندا ەلوردامىزدىڭ ەل تاريحىنان, جاھاندىق وركەنيەتتەن الاتىن ورنى ەرەكشە. كەشە عانا دۇنيەنى تىتىرەتكەن قىزىل يمپەريانىڭ قۇرساۋىنان بوساپ شىعا سالا, ۇلى دالانىڭ توسىندە الاشتىڭ ازات استاناسى شاڭىراق كوتەرەدى دەگەن وي ءۇش ۇيىقتاساق تۇسىمىزگە دە كىرمەپ ەدى. تاڭىرگە تاۋبە! تورىمىزگە تاق, باسىمىزعا باق ورنادى!
سالىنىپ جاتقان شاھار كەڭ دالادا, سىيلاسىن اسىل مۇرات ءار بالاڭا. ازاتتىق استاناسى اتالادى, قازاقتىڭ استاناسى سوندا عانا.
قاراشى, شاڭىراعى جاس قالانىڭ, اسپاننىڭ بۇلتىن سەرپىپ تاستاعانىن. بۇگىننەن باستالاتىن شەجىرەسى, اۆتورى نازارباەۆ استانانىڭ! – دەپ جىرلاعان ەدىم «بايتەرەك» پوەماسىندا وسىدان ون التى جىل بۇرىن. سول كەزدە بەستەن جاڭا عانا اسقان جەتكىنشەك استانا بۇگىندە كۇش-قۋاتى تولعان, ات ۇستىندە الىسقا كوز سالعان, ەلىنە قورعان بالۋان تۇلعالى, باتىر جۇرەكتى جىگىت بولدى.
تاۋەلسىزدىكتىڭ العاشقى جىلدارىندا ەلىمىز ءالى ەسىن جيىپ, ەتەگىن جابا الماي جاتقان تۇستا استانانى ارقاعا كوشىرەمىز دەگەنگە ەشكىم يلانا قويعان جوق. ءتىپتى پرەزيدەنتتىڭ اينالاسىندا ات ۇستىندە جۇرگەندەردىڭ ءوزى قارسى بولعانى – تاريحي شىندىق. وسىنداي ءارى-ءسارى كەزەڭدە استانانى كوشىرۋ كوزسىز ەرلىكپەن پارا-پار ەدى. الايدا ەلباسى تاۋەكەلگە باردى. اق قار, كوك مۇزدا اق بورانعا قاراماستان استانا كوشىن اقمولاعا قاسقايىپ ءوزى باستاپ كەلدى. سوندا دا سەنە قويماي كۇڭكىلدەگەندەر كوپ بولدى.
ارشىندا, شىعار قازاق,ء ۇنىڭدى اسقاق, كىم سەنى توقتاتادى بۇگىن جاسقاپ؟! استانا اقمولاعا كەلە جاتىر, ايبىندى نۇرسۇلتانداي ۇلىڭ باستاپ! كەلەدى حالقىن باستاپ قازىناعا, اق بوران, الدىن وراپ ازىناما. قۋانىپ قالىڭ ەلى جاتقان شىعار, الايدا شىن قۋانعان ءوزى عانا, – دەگەن ەدىك سول پوەمادا تاعى دا. شىنىندا دا ءدال سول ساتتە استانانىڭ بۇگىنگى بولاشاعىن پرەزيدەنتتەن باسقا ەشكىم كوزىنە ەلەستەتە العان جوق ەدى. بۇل عاسىرلىق وقيعاعا ەلباسىنىڭ ءوزىنىڭ عانا كوزى انىق جەتتى, كوڭىلى تولىق سەندى! اقىرى, مىنە, ءوزىمىز دە سەندىك, وزگەلەر دە سەندى! كوز الدىمىزدا – الەم تامسانعان اسەم استانا! جيىرما جىل ىشىندە استانا قانشاما ءوستى. باسقانى ايتپاعاندا, ەكسپو كورمەسى وسىندا كوشتى! قانشاما الەمدىك تاريحي دا اۋقىمدى ماسەلەلەردىڭ ءتۇيىنى استانا تورىندە شەشىلدى. وسىنىڭ وزىنەن-اق استانانىڭ الەمدىك ساياسات پەن وركەنيەتتەن الاتىن ورنى قانداي ەكەنىن انىق كورۋگە بولادى.
بۇگىندە استانا قازاق رۋحانياتىنىڭ قاراشاڭىراعىنا اينالدى. قارىمدى قالامگەرلەر مەن ارىندى اقىندار, دارىندى ونەر جۇلدىزدارى كەلىپ, كۇن سايىن ەلوردا مادەنيەتىنىڭ دامۋىنا ءوز ۇلەستەرىن قوسۋدا. جارىسا بوي تۇزەپ جاتقان مادەنيەت وشاقتارى استانامىزدىڭ اجارىن تىپتەن اشا تۇسكەندەي. وسىعان ريزا بولعان حالقىمىزدىڭ دا مەرەيى وسە تۇسكەندەي. سوندىقتان دا استانا ۇلتىمىزدىڭ تىلەگىندە, ۇلكەن-كىشىنىڭ جۇرەگىندە! كەشەگى زۇلمات زاماندا تالاي جازىقسىز جانداردىڭ اقمولاعا ايدالىپ, «الجير» لاگەرىندە كوز جۇمعانىن تاريحتان جاقسى بىلەمىز. سويتكەن اقمولانىڭ بۇگىنگى استاناعا اينالىپ, بوستاندىق پەن باقىتتىڭ ورداسى بولعانىنا قالاي كوڭىلىڭ بوسامايدى, قالاي جۇرەگىڭ تەبىرەنبەيدى؟! مۇنى قالاي جىرلاماسقا؟
استانا قالاسى اكىمدىگى مادەنيەت جانە سپورت باسقارماسىنىڭ تىكەلەي قولداۋىمەن ساكەن سەيفۋللين مۋزەيىنىڭ ۇيىمداستىرۋىمەن بيىل سەگىزىنشى رەت ءوتىپ وتىرعان رەسپۋبليكالىق ءمۇشايرا – وسى پىكىرىمىزگە دالەل!
استانانى جىرلاۋ – ءوز باقىتىڭدى, ءوز مۇراتىڭدى جىرلاۋ, ۇلتىڭنىڭ تاعدىرىن, تىنىس-تىرشىلىگىنىڭ بارلىعىن جىرلاۋ! سوندىقتان دا اقىندارعا كەڭ جول اشىپ, تەبىرەنە تولعانۋعا ۇزبەي جاعداي جاساپ كەلە جاتقان استانا اكىمدىگىنە ايتار العىسىمىز مول! جىر بايگەسىندە جۇلدە العان جۇلدىزدى شىعارمالاردىڭ باسىن ءبىر كىتاپقا قوسىپ, ەلوردا تويىنا جىردان شاشۋ شاشپاق ويىمىز بار.
ال «ەل تىرەگى – ەلوردا!» دەگەن ايدارمەن استانانىڭ 20 جىلدىق تويىنا ارنالعان بيىلعى ءمۇشايرا دا ءوز مارەسىنە جەتتى. بيىلعى الامان جىر بايگەسىنە رەسپۋبليكامىزدىڭ تۇكپىر-تۇكپىرىنەن 90-عا جۋىق ۇلكەندى-كىشىلى اقىندار قاتىستى. بارلىعى دا اعىنان جارىلىپ, استانا تويىن جان-جاقتى جارقىراتا جىرلاۋعا بارىن سالىپ باعىپتى. بايگەگە تۇسكەن جىرلاردى مەملەكەتتىك سىيلىقتىڭ لاۋرەاتى, كورنەكتى جازۋشى قاجىعالي مۇحانبەتقالي ۇلى توراعالىق ەتكەن قازىلار القاسى ساراپتاي, سارالاي كەلە ءبىراۋىزدان مىنا شەشىمگە كەلدى:
باس جۇلدەگە كورنەكتى اقىن, الاش جانە حالىقارالىق سەرگەي ەسەنين سىيلىعىنىڭ لاۋرەاتى قازىبەك يسانىڭ «ەرتەگىدەي ەلوردا» ولەڭىن لايىق دەپ تاپتى.
ءبىرىنشى ورىن تالانتتى اقىن قىزىمىز, قازاقستاننىڭ ەڭبەك سىڭىرگەن قايراتكەرى ساۋلە دوسجاننىڭ «سالەم ساعان, استانا» ولەڭىنە بەرىلدى. ەكىنشى ورىننىڭ ءبىرىن ايگىلى ايتىس اقىنى, قازاقستاننىڭ ەڭبەك سىڭىرگەن قايراتكەرى, فيلولوگيا عىلىمدارىنىڭ دوكتورى امانجول ءالتاي «جيىرما جاسقا جيىرما شۋماق» جىرىمەن, ەكىنشىسىن اقتاڭگەر اقىن, قازاقستاننىڭ ەڭبەك سىڭىرگەن قايراتكەرى داۋلەتكەرەي كاپ ۇلى «اي ديدارلى استانام» ولەڭىمەن قانجىعاسىنا بايلادى.
ءۇشىنشى ءۇش ورىندى جاس اقىندار مۇقيات قويشىباي ۇلى «استانا», ءبىرجان احمەر «التىن كەمە», نۇربول مۇراتبەك «كوزىمنىڭ قاراشىعى» ولەڭدەرىمەن ءبولىستى.
استانا تويىنا ارنالعان جىر ءمۇشايراسىندا جۇلدىزى جانعان جۇيرىكتەردى شىن جۇرەكتەن قۇتتىقتايمىز! مەرەيتويىڭ قۇتتى بولسىن, اسقاقتاي بەر, جايناي بەر, جاساي بەر, اياۋلى استانا!..
نەسىپبەك ايت ۇلى, مەملەكەتتىك سىيلىقتىڭ لاۋرەاتى